କଟକ: ଦୀର୍ଘ ଦିନ ଧରି ଖରାପ ଫର୍ମରେ ଥିବା ହିଟମ୍ୟାନ୍ ରୋହିତ ଶର୍ମା ବିସ୍ଫୋରକ ଶତକ କରି ସାମଲୋଚକଙ୍କ ମୁହଁ ବନ୍ଦ କରି ଦେଇଛନ୍ତି । ବାଂଲାଦେଶ ବିପକ୍ଷରେ ଟେଷ୍ଟ ସରିଜ୍ରୁ ଆରମ୍ଭ ହୋଇଥିବା ତାଙ୍କର ଏହି ସଂଘର୍ଷ ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ସଫଳତା ଆଣିଛି । କଟକର ବାରବାଟୀରେ ଖେଳାଯାଉଥିବା ଦ୍ବିତୀୟ ଦିନିକିଆରେ ଶତକ କରିଛନ୍ତି ରୋହିତ ଶର୍ମା । ଛକା ମାରି ଶତକ ପୂରା କରିଛନ୍ତି ଭାରତୀୟ ଅଧିନାୟକ ।
ଦୀର୍ଘ ଦିନ ଧରି ଖରାପ ଫର୍ମ ସହ ସଂଘର୍ଷ କରୁଥିବା ରୋହିତ ବଡ଼ ସ୍କୋର କରିଛନ୍ତି । ରୋହିତ ଶର୍ମା ୭୬ ବଲରେ ଶତକ ପୂରଣ କରିଛନ୍ତି । ଦିନିକିଆରେ ଏହା ତାଙ୍କର ୩୨ ତମ ଶତକ । ଶତକ ପୂରା କରିବା ବେଳକୁ ରୋହିତ ୯ ଚୌକା ଓ ୭ ଛକା ମାରିଥିଲେ। ରୋହିତ ଶର୍ମା ଆଦିଲ ରସିଦଙ୍କ ବଲରେ ଛକା ମାରି ଶତକ ପୂରଣ କରିଛନ୍ତି । ଶେଷରେ ୧୧୯ ରନ୍ କରି ପାଭିଲିୟନ୍ ଫେରିଛନ୍ତି ରୋହିତ ଶର୍ମା । ଲିୟାମ ଲିଭିଂଷ୍ଟୋନ ବଲ୍ରେ ଆଦିଲ ରସିଦଙ୍କ ହାତରେ ସେ କ୍ୟାଚ୍ ଆଉଟ ହୋଇଛନ୍ତି । ଦୀର୍ଘ ଦିନ ପରେ ହିଟମ୍ୟାନ୍ ଫର୍ମକୁ ଫେରିବାକୁ ନେଇ ଖେଳପ୍ରେମୀଙ୍କ ଗହଣରେ ଉତ୍ସାହ ବଢ଼ିଯାଇଛି । ସେପଟେ ଚାମ୍ପିୟନ୍ସ ଟ୍ରଫି ଆରମ୍ଭ ହେବା ପୂର୍ବରୁ ଭାରତୀୟ ଅଧିନାୟକଙ୍କ ପ୍ରଦର୍ଶନରେ ପରିବର୍ତ୍ତନ ଜରୁରି ଥିଲା । ଆଉ ଏବେ ଏହାର ପ୍ରମାଣ ଦେଇଛନ୍ତି ରୋହିତ ଶର୍ମା ।
ରୋହିତ ଶର୍ମାଙ୍କ ବ୍ୟତୀତ ବାରବାଟୀ ଶୁଭମନ ଗିଲ୍ କମାଲ ପ୍ରଦର୍ଶନ କରିବା ସହ ୬୦ ରନ୍ କରିଛନ୍ତି । କିନ୍ତୁ ବିରାଟ କୋହଲିଙ୍କ ପୁଣି ଥରେ ନିରାଶ କରିଛନ୍ତି । ମାତ୍ର ୫ ରନ୍ କରି ଆଉଟ୍ ହୋଇଛନ୍ତି କୋହଲି । ତେବେ ଆଜି ବାରବାଟୀରେ ଭାରତ ଏବଂ ଇଂଲଣ୍ଡ ମଧ୍ୟରେ ହାଇଭୋଲଟେଜ୍ ମ୍ୟାଚ୍ ଜାରି ରହିଛି । ପ୍ରଥମେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ଭ୍ରମଣକାରୀ ଦଳ ଇଂଲଣ୍ଡ ୪୯.୫ ଓଭରରେ ୩୦୪ ରନ୍ କରିଥିଲା । ଏହା ସହ ଇଂଲଣ୍ଡ ଅଲଆଉଟ୍ ହୋଇଯାଇଥିଲା । ଆଜି ଇଂଲଣ୍ଡ ଟିମ୍ର ବେନ୍ ଡକେଟ ଏବଂ ଜୋ ରୁଟ୍ ଅର୍ଦ୍ଧଶତକ କରିଥିଲେ । ଡକେଟ୍ ୫୬ ବଲ୍ରେ ୬୫ ରନ୍ କରିଥିବା ବେଳେ ଜୁ ରୁଟ୍ ୬୯ ରନ୍ କରିଥିଲେ । ସେପଟେ ବାରବାଟୀରେ ଭାରତୀୟ ବୋଲରଙ୍କ କମାଲ ଦେଖିବାକୁ ମିଳିଛି । ଅକ୍ଷର ପଟେଲଙ୍କ ବ୍ୟତୀତ ଅନ୍ୟ ବୋଲର ଓ୍ବିକେଟ ହାସଲ କରିଛନ୍ତି । ରବୀନ୍ଦ୍ର ଜାଡେଜା ୧୦ ଓଭରରେ ମାତ୍ର ୩୫ ରନ୍ ଦେବା ସହ ସର୍ବାଧିକ ୩ଟି ଓ୍ବିକେଟ ହାସଲ କରିଛନ୍ତି । ଏହା ସହ ମହମ୍ମଦ ଶାମି, ହର୍ଷିତ ରାଣା, ବରୁଣ ଚକ୍ରବର୍ତ୍ତୀ ଏବଂ ହାର୍ଦ୍ଦିକ ପାଣ୍ଡ୍ୟା ଗୋଟିଏ ଲଖାଏଁ ଓ୍ବିକେଟ ନେଇଛନ୍ତି ।
