ନୂଆଦିଲ୍ଲୀ,୦୩/୧୨: ସିଗାରେଟ, ତମାଖୁ ସେବନ କରୁଥିବା ଲୋକଙ୍କ ପକେଟ୍ ହୋଇଯିବ ଖାଲି । ଆଗାମୀ ଦିନରେ ସେମାନଙ୍କ ଖର୍ଚ୍ଚ ବଢିବାକୁ ଯାଉଛି । ଏହି ଜିନିଷ ଉପରେ ଜିଏସଟି ବଢିବ । ଜିଏସଟି କାଉନସିଲ ବୈଠକ ପୂର୍ବରୁ ମନ୍ତ୍ରୀଙ୍କ ମଧ୍ୟରେ ବସିଥିବା ଏକ ବୈଠକରେ ତମାଖୁ ସାମଗ୍ରୀ ଉପରେ ୨୮%ରୁ ବଢି ୩୫% କରିବାକୁ ସୁପାରିଶ ହୋଇଛି । ଏ ନେଇ ଆସନ୍ତା ୨୧ ତାରିଖରେ ଜିଏସଟି କାଉନସିଲ ବୈଠକରେ ନିଷ୍ପତ୍ତି ନିଆଯିବ ।

ମହଙ୍ଗା ହେବ ତମାଖୁ ସାମଗ୍ରୀ- ମିଳିଥିବା ସୂଚନା ଅନୁସାରେ, ଜିଏସଟି ଦରକୁ ନେଇ ମନ୍ତ୍ରୀ ସମୂହଙ୍କ ମଧ୍ୟରେ ବୈଠକ ହୋଇଥିଲା । ଏଥିରେ ସିଗାରେଟ, ତମାଖୁ ଭଳି ହାନିକାରକ ସାମଗ୍ରୀ ସହ କୋଲ୍ଡ ଡ୍ରିଙ୍ଗ ବା ମୃଦ୍ୟୁପାନୀୟ ଉପରେ ଜିଏସଟି ବୃଦ୍ଧି କରାଇବାକୁ ସୁପାରିସ ହୋଇଥିଲା । ବର୍ତ୍ତମାନ ଏହି ସାମଗ୍ରୀ ଉପରେ ଜିଏସଟି ୨୮% ରହିଛି । ଏହାକୁ ୩୫% କରିବାକୁ ସୁପାରିଶ ହୋଇଛି । ଏହା ଉପରେ ଫାଇନାଲ ନିଷ୍ପତ୍ତି ଡିସେମ୍ବର ୨୧ ତାରିଖରେ ନିଆଯିବ । ଯଦି ସରକାର ଜିଏସଟି ବଢାଇବାକୁ ନିଷ୍ପତ୍ତି ନେଉଛନ୍ତି ତେବେ ଏହା ଦର ଏକ ଲମ୍ବା ଡିଆଁ ଦେବ ।

ରେଡିମେଡ ଡ୍ରେସ୍ ଉପରେ ବଢିବ ଜିଏସଟି- ବୈଠକରେ ମୋଟ ୧୪୮ଟି ଆଇଟମ୍ ଉପରେ ଜିଏସଟି ଟିକସ ପରିବର୍ତ୍ତନ ପାଇଁ ପ୍ରସ୍ତାବ ଦିଆଯାଇଛି । ତେବେ ରେଡିମେଡ କପଡା ଉପରେ ମଧ୍ୟ ଜିଏସଟି ବୃଦ୍ଧି କରିବାକୁ ଆଲୋଚନା ହୋଇଛି । ୧, ୫୦୦ ଟଙ୍କା ଡ୍ରେସ୍ ଉପରେ ୫ ପ୍ରତିଶତ, ୧,୫୦୦ରୁ ୧୦,୦୦୦ ଟଙ୍କା ମଧ୍ୟରେ ୧୮ ପ୍ରତିଶତ ଓ ୧୦,୦୦୦ରୁ ଅଧିକ ହେଲେ ୨୮ ପ୍ରତିଶତ ଟ୍ୟାକ୍ସ ଦେବାକୁ ପଡିବ ।  ଏହି ସଂଶୋଧନ ରାଜସ୍ବ ଉପରେ ସକରାତ୍ମକ ପ୍ରଭାବ ପକାଇବ ବୋଲି ଆଶା କରାଯାଉଛି ।

ଡିସେମ୍ବର ୨୧ରେ ଜିଏସଟି ପରିଷଦ ବୈଠକ- ଆସନ୍ତା ୨୧ ତାରିଖରେ ଜିଏସଟି କାଉନସିଲ ବୈଠକ ହେବ । ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ବସିବ ୫୫ତମ ଜିଏସଟି ପରିଷଦ ବୈଠକ । ଏହି ବୈଠକରେ ନିଷ୍ପତ୍ତି ନିଆଯିବ ।

୨୦୧୭ରେ ଲାଗୁ ହୋଇଥିଲା ଜିଏସଟି- ୨୦୧୭ରେ ଦେଶରେ ସାମଗ୍ରୀ ଓ ସେବା ଟିକସ (ଜିଏସ୍‌ଟି) ଲାଗୁ ହୋଇଥିଲା । ଦେଶ ସ୍ବାଧୀନ ପରେ ଏହା ସବୁଠୁ ବଡ ଟିକସ ସୁଧାର ବୋଲି କୁହାଯାଏ । ୨୦୧୭ ମାର୍ଚ୍ଚ ୨୯ରେ ଜିଏସଟି ବିଲ୍ ପାସ୍ ହୋଇଥିଲା । ଜୁଲାଇ ୧ରେ ନୂଆ ଟିକସ୍ ବ୍ୟବସ୍ଥା ଲାଗୁ ହୋଇଥିଲା ।