ପାଟନା, ୧୩।୧୦: ଏବେ ବନ୍ୟାକୁ ଆଉ ଭୟ ନାହିଁ । ବନ୍ୟା ବେଳେ ନା ଛାତ ଉପରେ ରହିବାକୁ ପଡ଼ିବ, ନାଁ ରୋଷେଇବାସ ପାଇଁ ଅସୁବିଧା ହେବ । ଏଭଳି ଏକ ଘର, ଯାହା ବନ୍ୟା ସମୟରେ ବୁଡ଼ିବା ପରିବର୍ତ୍ତେ ଭାସିବ । ଶୁଣିବାକୁ ବୋଧହୁଏ ଏହା ଆପଣଙ୍କୁ ଆଶ୍ଚର୍ଯ୍ୟ ଲାଗୁଥାଇପାରେ । କିନ୍ତୁ, ଏଭଳି ଏକ ନିଆରା ଘର ତିଆରି କରିଛନ୍ତି, ବିହାରର ପ୍ରଶାନ୍ତ କୁମାର । ପେଶାରେ ପ୍ରଶାନ୍ତ ଇଞ୍ଜିନିୟର । ୨୦୧୫ରୁ ରିସାଇକେଲିଂ ଇନଷ୍ଟଲେସନ୍ ଆର୍ଟ୍ସ ଉପରେ ସେ କାମ କରିଆସୁଛନ୍ତି । ନିଜର ଏହି ନିଆରା ରୁଚିକୁ ସଫଳ କରିବାକୁ ସେ ଏକାଧିକ ଦେଶରେ ଭ୍ରମଣ କରିଛନ୍ତି । ଆଉ ପରେ ନିଜ ଚିନ୍ତାଧାରାକୁ ବାସ୍ତବ ରୂପ ଦେଇଛନ୍ତି । ୨୦୨୦ରେ ଦେଶବିଦେଶ ଭ୍ରମଣ କରିବା ପରେ ସେ ବିହାର ଫେରିଥିଲେ । ବନ୍ୟାରେ ଏକାଧିକ ଲୋକଙ୍କ ଜୀବନ ଯାଇଥିବା ବେଳେ, ଅନେକଙ୍କର ଘର ଭାସିଯାଇଥିବା ସେ ଦେଖିବାକୁ ପାଇଲେ । ବାସହରା ହୋଇଯିବାରୁ କିଛି ଲୋକେ ବାଧ୍ୟ ହୋଇ ରାସ୍ତକଡ଼ରେ ରହିବାକୁ ଲାଗିଲେ । ଏଭଳି ସମସ୍ୟାର ସ୍ଥାୟୀ ସମାଧାନ ପାଇଁ ସେ ଚିନ୍ତା କଲେ । ଯାହା ପରେ ତାଙ୍କ ମୁଣ୍ଡକୁ ଏକ ଉପାୟ ଆସିଲା । ବନ୍ୟାରେ ଲୋକଙ୍କୁ ସାହାର ଦେଉଥିବା ଏକ ଘର ନିର୍ମାଣ କରିବାକୁ ଚିନ୍ତା କଲେ । ଏହି ଘର ନିର୍ମାଣ କରିବାକୁ ୨୦୨୧ରେ ସେ କିଛି ଲୋକଙ୍କ ସାହାଯ୍ୟ ନେଇଥିଲେ ।
୨୦୨୨ରେ ନିର୍ମାଣ କରିଥିଲେ ଏହି ଘରର ପ୍ରଥମ ସାମ୍ପଲ । ଆଉ ୨୦୨୩ରେ ସଫଳ ହୋଇଥିଲା ତାଙ୍କର ଏହି ପ୍ରୋଜେକ୍ଟ । ଗଙ୍ଗା ନଦୀର ବକ୍ସରଠାରେ ଶେଷରେ ସେ ଏହି ଘରକୁ ନିର୍ମାଣ କରିବାରେ ସଫଳ ହେଲେ । ଯାହା ପରେ ଏହା ଭାରତର ପ୍ରଥମ କ୍ଲାଇମେଟ୍ ରେଜିଲିଏଣ୍ଟ ଫ୍ଲୋଟିଙ୍ଗ୍ ହାଉସ୍ ଭାବେ ପରିଚିତ ହେଲା । ଏହି ଫ୍ଲୋଟିଙ୍ଗ୍ ହାଉସରେ ୧୦/୧୨ ଫିଟ୍ର ମୋଟ୍ ୩ଟି କୋଠରୀ ରହିଛି । ଏହା ବ୍ୟତୀତ ଏଥିରେ ଏକ ରୋଷେଇ ଘର ଓ ଏକ ଶୌଚାଳୟ ମଧ୍ୟ ରହିଛି । ଏହି ଘର ମାଟି ଓ ଗୋବରରେ ନିର୍ମିତ ଇଟାରେ ତିଆରି । ଏହି ଘରର ତଳଭାଗରେ ରିସାଇକେଲ ପ୍ଲାଷ୍ଟିକ୍ ଡ୍ରମ୍ ବ୍ୟବହାର ହୋଇଛି । ଯାହା ଏହାକୁ ବନ୍ୟା ସମୟରେ ପାଣିରେ ବୁଡ଼ିବା ପରିବର୍ତ୍ତେ ଭାସିବାରେ ସାହାଯ୍ୟ କରେ ।
ସେହିପରି ବିଜୁଳି ପାଇଁ ଘର ଉପରେ ସୋଲାର ଏନର୍ଜିର ବ୍ୟବହାର କରାଯାଇଛି । ଏହି ଘରେ ମୋଟ୍ ୬ରୁ ୭ ଜଣ ଲୋକ ଆରାମରେ ରହିବାର ବ୍ୟବସ୍ଥା ରହିଛି । ଏହି ଘରକୁ ପ୍ରଶାନ୍ତ ୬ ଲକ୍ଷ ଟଙ୍କା ବ୍ୟୟରେ ତିଆରି କରିଛନ୍ତି । ବର୍ଷେ ହେଲାଣି ଏହି ପ୍ରୋଜେକ୍ଟକୁ ସେ ନିର୍ମାଣ କରିଛନ୍ତି । ଏ ପର୍ଯ୍ୟନ୍ତ ଏହି ଘର ବନ୍ୟା, ଖରା, ଶୀତ, ବର୍ଷା ଆଦିର ଦୃଢ଼ ମୁକାବିଲା କରିସାରିଛି । ବର୍ତ୍ତମାନ ପ୍ରଶାନ୍ତଙ୍କର ଆଉ ଏକ ବଡ଼ ସ୍ୱପ୍ନ । ଅବିକଳ ଏହି ଫ୍ଲୋଟିଙ୍ଗ୍ ହାଉସ୍ ପରି ସେ ଏକ ଫ୍ଲୋଟିଙ୍ଗ ଭିଲେଜର କଳ୍ପନା କରୁଛନ୍ତି । ଏଥିପାଇଁ ସେ ଏକ ଛୋଟ ଗାଁ ଆରାଠାରେ ସେଣ୍ଟର ଅଫ୍ ରେଜିଲିଏନ୍ସ ଓଆର୍ଜି ନାମକ ସଂସ୍ଥା ମଧ୍ୟ ଆରମ୍ଭ କରିଛନ୍ତି । ପ୍ରଶାନ୍ତଙ୍କ କହିବାନୁସାରେ, ତାଙ୍କର ଏହି ପ୍ରୋଜେକ୍ଟ ପରବର୍ତ୍ତୀ ପିଢ଼ିଙ୍କ ପାଇଁ ଏକ ବରଦାନ ସ୍ୱରୂପ ।
