ଭୁବନେଶ୍ୱର, ୦୯/୦୭ : ବର୍ଷା ଆଣିଲା ‘ଆଖିଧରା’ ବା କଞ୍ଜକ୍ଟିଭାଇଟିସ ସଂକ୍ରମଣ । ଘରକୁ ଘର ମାଡ଼ିଲାଣି ଆଖିଧରା ସଂକ୍ରମଣ । ବର୍ତ୍ତମାନ ହସ୍ପିଟାଲ୍ ଚକ୍ଷୁ ବିଭାଗରେ ସଂକ୍ରମିତଙ୍କ ଭିଡ଼ ଲାଗିଛି । ବିଶେଷ କରି ଛାତ୍ରଛାତ୍ରୀ ବହୁମାତ୍ରାରେ ସଂକ୍ରମିତ ହେଉଛନ୍ତି। ରାଜ୍ୟର ବିଭିନ୍ନ ଜିଲ୍ଲାରେ ୮୫୦ ହେବ ସଂକ୍ରମିତ ଚିହ୍ନଟ ହୋଇଛନ୍ତି । ନୟାଗଡ଼, ପୁରୀ, ଭଦ୍ରକ, ବାଲେଶ୍ୱର, କେନ୍ଦ୍ରାପଡ଼ା, ଜଗସିଂହପୁର, କଟକ ଆଦି ଜିଲ୍ଲାରେ ସଂକ୍ରମଣ ଅଧିକ ଦେଖାଦେଇଛି । ଆଦିବାସୀ ବହୁଳ ଜିଲ୍ଲାରେ ମଧ୍ୟ ସଂକ୍ରମଣ ବ୍ୟାପିବାରେ ଲାଗିଛି ।
କ୍ୟାପିଟାଲ ହସ୍ପିଟାଲ୍ ଚକ୍ଷୁ ବିଭାଗ ବିଶେଷଜ୍ଞ ଡା ସି.ଏସ୍ ଓଝା କହିଛନ୍ତି, ଏହି ରୋଗ ହେଲେ ଆଖି ଲାଲ୍ ପଡ଼ିବା ସହ କୁଣ୍ଡେଇ ହୁଏ । ଆଖିରୁ ପାଣି ବୋହିବା ସହ ଲେଞ୍ଜରା ବାହାରେ । ସାଧାରଣତଃ ଆଖିଧରା ଉଭୟ ଭୂତାଣୁ ଓ ଜୀବାଣୁ ଜନିତ । ଭୂତାଣୁଜନିତ ଆଖିଧରାରେ ଆଖି ଲାଲ୍ ପଡ଼ିବା ସହ ଲୁହ ବାହରିଥାଏ । ଜୀବାଣୁଜନିତ ଆଖିଧରାରେ ପ୍ରଚୁର ପରିମାଣର ଲେଞ୍ଜରା ବାହାରିଥାଏ । ଏହାକୁ ଆଖିଧରା ବା କଞ୍ଜକ୍ଟିଭାଇଟିସ ବା ପିଙ୍କ୍ ଆଇ ବୋଲି କୁହାଯାଏ । ଛୋଟ ପିଲା ମୁଖ୍ୟତଃ ସ୍କୁଲ ଛାତ୍ରଛାତ୍ରୀଙ୍କଠାରେ ଏହା ଅଧିକ ସଂକ୍ରମଣ ହେବାର ଆଶଙ୍କା ରହିଛି । ରୋଗୀଙ୍କ ସଂସ୍ପର୍ଶରେ ଆସିଲେ ଏହା ସଂକ୍ରମିତ ହୋଇଥାଏ । ତେବେ ରୋଗୀର ଆଖିକୁ ଦେଖିବା ଦ୍ୱାରା ଆଖିଧରା ବ୍ୟାପି ନ ଥାଏ । ଡାକ୍ତରଙ୍କ ପରାମର୍ଶ ନେଇ ଔଷଧ ବ୍ୟବହାର କରନ୍ତୁ । ଏଡିନୋ ଭୂତାଣୁ ଏହି ରୋଗର କାରଣ । ମିଳିଥିବା ସୂଚନା ଅନୁଯାୟୀ, କ୍ୟାପିଟାଲ୍ ହସ୍ପିଟାଲକୁ ସପ୍ତାହ ପୂର୍ବେ ଦୈନିକ ୧୦ରୁ୧୫ ରୋଗୀ ଆସୁଥିଲେ । ହେଲେ ବର୍ତ୍ତମାନ ୩୦ ପାଖାପାଖି ସଂକ୍ରମିତ ଚିକିତ୍ସା ପାଇଁ ଆସୁଛନ୍ତି ।
