କରଞ୍ଜିଆ, ୨୯/୧୧: ଖସୁଛି ପାରଦ ବଢୁଛି ଶୀତ । ହାଡ଼ଭଙ୍ଗା ଶୀତରେ ଥରୁଛି ଶିମିଳିପାଳ । ଘନ କୁହୁଡ଼ି ସାଙ୍ଗକୁ ଶୀତର ଲହରୀ ଜାରି ।୫ ଡିଗ୍ରୀକୁ ଖସିଲା ପାରଦ । ଶିମିଳିପାଳ ଅଭୟାରଣ୍ୟର ଉପରବାରାକାମୁଡା ଠାରେ ସର୍ବନିମ୍ନ ୫ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ନେଇ ବନ ବିଭାଗ ପକ୍ଷରୁ ସୂଚନା ମିଳିଛି । ସେହିପରି ଶିମିଳିପାଳ ପାଦଦେଶରେ ଅବସ୍ଥିତ ଯଶିପୁର, ଠାକୁରମୁଣ୍ଡା, କରଞ୍ଜିଆ, ରରୁଆଁ ଓ ସୁକ୍ରୁଳୀ ଅଞ୍ଚଳରେ ଘନକୁହୁଡ଼ି ସାଙ୍ଗକୁ ଶୀତର ପ୍ରକୋପ ବୃଦ୍ଧି ପାଇଛି ।

ଶୀତ ବଢିବା କାରଣରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି । ବିଶେଷ କରି ବୟଷ୍କ ଲୋକ ମାନଙ୍କୁ ହାଡ ଭଙ୍ଗା ଶୀତ କଷ୍ଟ ଦେଉଛି । ଅଧିକ କୁହୁଡି କାରଣରୁ ଯାତାୟତରେ ବାଧା ସୃଷ୍ଟି ହେଉଛି । ଲୋକେ ଗାଡ଼ିର ଲାଇଟ ଲଗାଇ ଯାନବାହନ ଚଳାଚଳ କରୁଛନ୍ତି । ଶୀତ କାରଣରୁ ଅନେକ ସ୍ଥାନରେ ଲୋକେ ନିଆଁ ଜାଳି ବସୁଥିବାର ଦେଖିବାକୁ ମିଳିଛି । ଚା ଦୋକାନ ଗୁଡ଼ିକରେ ଶିତୁଆ ସକାଳରେ ଲୋକଙ୍କ ଭିଡ ଜମୁଛି । ଗରମ ଗରମ ଚାର ମଜା ନେଇ ପରସ୍ପର ମଧ୍ୟରେ କଥାବାର୍ତ୍ତା କରୁଛନ୍ତି ଲୋକେ ।