ଭୁବନେଶ୍ୱର,୨୧/୧୦: ସମସ୍ତଙ୍କ ମନରେ ଥିଲା ଉତ୍ସାହ, ଉଦ୍ଦୀପନା । ଦୀର୍ଘଦିନ ପରେ ଏକାଠି ହୋଇଥିବାରୁ ଖୁସିରେ ଆତ୍ମବିଭୋର ହୋଇ ପଡୁଥିଲେ ସଭିଏଁ । ଏମିତି ଏକ ମାହୋଲ୍ ଭିତରେ ଅନୁଷ୍ଠିତ ହୋଇଛି ବିଜେବି ଏମ୍ଏଜେଏମ୍ସି ଆଲୁମିନ୍ର ପ୍ରଥମ ବନ୍ଧୁମିଳନ ।
ଖଣ୍ଡଗିରି ନିକଟ ଜୟଦେବ ବାଟିକାରେ ଆୟୋଜିତ ଏହି ମିଳନ ପର୍ବରେ ୨ ଶହରୁ ଅଧିକ ପୁରାତନ ଛାତ୍ରଛାତ୍ରୀ ଏକାଠି ହୋଇଥିଲେ । ଛାତ୍ରଛାତ୍ରୀ କର୍ମ କ୍ଷେତ୍ରର ଅଭିଜ୍ଞତା ଆଦାନ ପ୍ରଦାନ କରିବା ସହ କଲେଜରେ ବିତିଥିବା ସ୍ମରଣୀୟ ମୁହୂର୍ତ୍ତକୁ ପୁନଃ ସ୍ମରଣ କରିଥିଲେ । ନାଚଗୀତ ଓ ଭୋଜିଭାତର ମଜା ନେଇଥିଲେ । ଆଲୁମିନ୍ର ଶତାଧିକ ସଦସ୍ୟଙ୍କୁ ଚାରା ବଣ୍ଟନ କରାଯାଇଥିଲା । ଦିବଙ୍ଗତ ପୁରାତନ ଛାତ୍ରଛାତ୍ରୀଙ୍କ ଉଦ୍ଦେଶ୍ୟରେ ଏକ ମିନିଟ୍ ନିରବ ପ୍ରାର୍ଥନା କରାଯାଇଥିଲା । ମୁଖ୍ୟଅତିଥି ଭାବେ ଯୋଗ ଦେଇଥିଲେ ବିଜେବି କଲେଜର ସାମ୍ବାଦିକତା ଓ ଗଣଯୋଗାଯୋଗ ବିଭାଗ ମୁଖ୍ୟ ପ୍ରଫେସର ନଳୀନ କୁମାର ପାତ୍ର । ଉପଦେଷ୍ଟା ସ୍ୱୟଂପ୍ରକାଶ ମହାପାତ୍ର, ସଭାପତି ଦିଲ୍ଲୀପ କୁମାର ରାଉତ, ସାଧାରଣ ସମ୍ପାଦକ ଲିପୁନ କୁମାର ପରିଡ଼ାଙ୍କ ସମେତ ଆଲୁମିନ୍ ଆସୋସିଏସନ୍ର ବରିଷ୍ଠ ସଦସ୍ୟ ପ୍ରମୁଖ ଉପସ୍ଥିତ ଥିଲେ । ଯୁଗ୍ମ ସମ୍ପାଦକ ବିବର୍ତ୍ତନ ପଣ୍ଡା କାର୍ଯ୍ୟକ୍ରମ ପରିଚାଳନା କରିଥିଲେ ।