ଭୁବନେଶ୍ୱର ୧୮/୦୪: ଅନୁଭବ ଆଉଟ୍, ବର୍ଷା ଇନ୍। ବିଜୁ ଜନତା ଦଳରେ ସାମିଲ ହେଲେ ଚର୍ଚ୍ଚିତ ଅଭିନେତ୍ରୀ ବର୍ଷା ପ୍ରିୟଦର୍ଶିନୀ। ଶଙ୍ଖ ଭବନରେ ଚାଲିଥିବା ମହାମିଶ୍ରଣ ପର୍ବରେ ବର୍ଷା ପ୍ରିୟଦର୍ଶିନୀ ପ୍ରାଥମିକ ସଦସ୍ୟ ଭାବେ ବିଜେଡିରେ ମିଶିଛନ୍ତି। ପୂର୍ବତନ ସ୍ଵାମୀ ଅନୁଭବ ମହାନ୍ତି ବିଜେଡିରୁ ଆଉଟ୍ ହେବା ପରେ ସେ ଶଙ୍ଖ ଶିବିରରେ ଇନ୍ ମାରିଛନ୍ତି। କିଛି ବର୍ଷ ହେବ ପାରିବାରିକ ବିବାଦ ଯୋଗୁଁ ଚର୍ଚ୍ଚାରେ ଥିଲେ ଅଭିନେତ୍ରୀ। କେନ୍ଦ୍ରାପଡା ସାଂସଦ ଅନୁଭବ ମହାନ୍ତିଙ୍କ ସହ ଚାଲିଥିଲା ଛାଡପତ୍ର ମାମଲା। ୨୦୧୯ ନିର୍ବାଚନ ଓ କଟକ ମହାନଗର ନିଗମ ନର୍ବାଚନରେ ପ୍ରଚାରକ ଭାବେ ବିଜେଡି ପାଇଁ ପ୍ରଚାର କରିଥିଲେ। ତେବେ ଏଥର ନିର୍ବାଚନରେ ଦଳ ତାଙ୍କ ଉପରେ ଭରସା କରି ପ୍ରାର୍ଥୀ କରିବ ନା ସେ କର୍ମୀ ହୋଇ ରହିବେ ତାହାକୁ ନେଇ ଜାରି ରହିଛି ସସପେନ୍ସ।
ସୂଚନାନୁଯାୟୀ, ୨୦୧୩ ଏପ୍ରିଲ ୨୭ରେ ବିଜେଡିରେ ସାମିଲ ହୋଇଥିଲେ ଅନୁଭବ ମହାନ୍ତି। ବିଭିନ୍ନ ନିର୍ବାଚନରେ ତାଙ୍କୁ ଷ୍ଟାର ପ୍ରଚାରକ ଭାବେ ଘୋଷଣା କରିଥିଲା ଦଳ। ୨୦୧୪ରେ ରାଜ୍ୟସଭା ପାଇଁ ହୋଇଥିଲେ ମନୋନୀତ। ଦେଶର ସବୁଠୁ କମ୍ ବୟସ୍କ ନେତା ଭାବେ ରାଜ୍ୟସଭାକୁ ମନୋନୀତ ହୋଇ ନିଜ ନାମରେ କରିଥିଲେ ରେକର୍ଡ। ଏହାପରେ ୨୦୧୯ରେ କେନ୍ଦ୍ରାପଡ଼ା ଲୋକସଭା ଆସନରୁ ବୈଜୟନ୍ତ ପଣ୍ଡାଙ୍କ ସହ କରିଥିଲେ ଫାଇଟ୍। ବିଜେଡିର ଲୋକପ୍ରିୟତା ଏବଂ ଅନୁଭବଙ୍କ କ୍ରେଜ୍ ଆଗରେ ହାର୍ ମାନିଥିଲେ ବୈଜୟନ୍ତ। ପରେ ପାରିବାରିକ ବିବାଦ ଏବଂ ମତଭେଦ କାରଣରୁ ଦଳ ଠାରୁ ନିଜକୁ ଦୂରେଇ ରଖୁଥିଲେ। ବିଜେଡିରେ କୋଣ ଠେସା ହୋଇ ରହିଥିଲେ ଅନୁଭବ। ପରେ କେନ୍ଦ୍ରାପଡ଼ାରୁ ବିଜେଡି ଅଂଶୁମାନ ମହାନ୍ତିଙ୍କୁ ପ୍ରାର୍ଥୀ କରିବା ପରେ ଅଭିମାନ କରି ଦଳ ଛାଡିଥିଲେ ଅନୁଭବ। ତାଙ୍କ ପରେ ଏବେ ବିଜେଡିରେ ମିଶିଛନ୍ତି ପୂର୍ବତନ ସ୍ତ୍ରୀ।
ଜଣେ ଶିଶୁ କଳାକାର ଭାବେ ଓଲିଉଡ୍ରେ ଏଣ୍ଟ୍ରି ମାରିଥିଲେ ବର୍ଷା । ପରେ ପରେ ନିଜର ନିଖୁଣ ଅଭିନୟ ପାଇଁ ଆଗଧାଡିର ନାୟିକା ଭାବେ ବେଶ୍ ପରିଚିତ ହୋଇଥିଲେ । ଓଲିଉଡ୍ ସହ ବଙ୍ଗଳା ଫିଲ୍ମରେ ମଧ୍ୟ ଅଭିନୟ କରିଛନ୍ତି ବର୍ଷା ପ୍ରିୟଦର୍ଶିନୀ । ପରେ ଓଲିଉଡ୍ ର ଷ୍ଟାର ନାୟକ ଅନୁଭବ ମହାନ୍ତିଙ୍କୁ ବିବାହ କରିଥିଲେ । ହେଲେ ଉଭୟଙ୍କ ପାରିବାରିକ ସମ୍ପର୍କ ଭଲରେ ଚାଲିନଥିଲା । ଏମିତିକି ଉଭୟଙ୍କ ପାରିବାରିକ ବିବାଦ କୋର୍ଟରେ ପହଞ୍ଚିଥିଲା । ଉଭୟଙ୍କ ଛାଡପତ୍ର ପାଇଁ ହାଇକୋର୍ଟ ଅନୁମତି ଦେଇସାରିଛନ୍ତି।
Also Read :-