ନୂଆଦିଲ୍ଲୀ,୨୦/୦୬: ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ଆଜିଠୁ (ଶୁକ୍ରବାର) ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଆରମ୍ଭ ହେବ । ଲିଡ୍ସରେ ଖେଳାଯିବ ପ୍ରଥମ ଟେଷ୍ଟ । ଏହା ପୂର୍ବରୁ ଇଣ୍ଡିଆ-ଇଂଲଣ୍ଡ ଟେଷ୍ଟର ନୂଆ ଟ୍ରଫି ଉନ୍ମୋଚିତ ହୋଇଛି । ଆଣ୍ଡରସନ୍ ଓ ସଚିନ୍ ଟ୍ରଫିର ନାମ ରହିଛି । ଉଭୟ କିମ୍ବଦନ୍ତୀ ଖେଳାଳି ସଚିନ ତେନ୍ଦୁଲକର ଓ ଜେମ୍ସ ଆଣ୍ଡରସନ୍ ଉପସ୍ଥିତ ରହି ଟ୍ରଫି ଉନ୍ମୋଚନ କରିଛନ୍ତି ।
୨୦୦୭ ମସିହାରୁ ଇଂଲଣ୍ଡ-ଭାରତ ଟେଷ୍ଟ ସିରିଜରେ ବିଜେତା ଦଳକୁ ପଟୌଦି ଟ୍ରଫି ପ୍ରଦାନ କରାଯାଉଥିଲା । କିନ୍ତୁ ଇଂଲଣ୍ଡ କ୍ରିକେଟ୍ ବୋର୍ଡ (ଇସିବି) ଏହାର ନାମ ପରିବର୍ତ୍ତନ କରି ଆଣ୍ଡରସନ-ସଚିନ ଟ୍ରଫି କରିବାକୁ ଯୋଜନା କରିଥିଲ । ଏ ବିଷୟରେ ବିସିସିଆଇକୁ ଜଣାଇଥିଲା । ମାତ୍ର ସଚିନ ଏ ବିଷୟରେ ଅବଗତ ହେବା ପରେ ଉଭୟ ଇସିବି ଓ ବିସିସିଆଇକୁ ଟ୍ରଫିର ନାମ ପରିବର୍ତ୍ତନ ନକରିବା ପାଇଁ ପ୍ରସ୍ତାବ ଦେଇଥିଲେ । କିପରି ପୂର୍ବତନ ଅଧିନାୟକ ମନସୁର ଅଲି ଖାନ ପଟୌଦିଙ୍କ ନାମ ସିରିଜ ସହ ଯୋଡ଼ି ହୋଇ ରହିବ ସେନେଇ ସଚିନ ଉଦ୍ୟମ ଆରମ୍ଭ କରିଥିଲେ ।
ସେ କହିଛନ୍ତି, ‘ପ୍ରଥମେ ପଟୌଦି ପରିବାର ଲୋକଙ୍କୁ ଏ ବିଷୟରେ ଜଣାଇଥିଲି ଏବଂ ଭାରତ-ଇଂଲଣ୍ଡ ସିରିଜ ସହ କିଭଳି ତାଙ୍କ ନାମ ପୂର୍ବଭଳି ଯୋଡ଼ି ରହିବ ଆମେ କଥା ହୋଇଥିଲୁ । ଏଥିପାଇଁ ବିସିସିଆଇ ଓ ଇସିବି ସହ କଥା ହୋଇ ମୋର କିଛି ପ୍ରସ୍ତାବ ରଖିଥିଲି । ଯାହା ହେଉ ଶେଷରେ ବିଜୟୀ ଦଳର ଅଧିନାୟକଙ୍କୁ ପଟୌଦି ମେଡାଲ ଦେବାକୁ ନିଷ୍ପତ୍ତି ହୋଇଥିଲା ।’ ତେଣୁ ଟ୍ରଫିର ନୂଆ ନାମକରଣ ହୋଇଥିଲେ ବି ପଟୌଦିଙ୍କ ନାମ ପୂର୍ବଭଳି ସିରିଜ ସହ ଯୋଡ଼ି ହୋଇ ରହିବ ।
ପୂର୍ବରୁ ଇଂଲଣ୍ଡରେ ପଟୌଦି ଟ୍ରଫି ଏବଂ ଭାରତରେ ଆଣ୍ଟୋନୀ ଡି ମେଲୋ ଟ୍ରଫି ପ୍ରଦାନ କରାଯାଉଥିଲା । ଏବେ କେବଳ ବିଜେତାଙ୍କୁ ଆଣ୍ଡରସନ୍-ସଚିନ ଟ୍ରଫି ଏବଂ ବିଜେତା ଦଳର ଅଧିନାୟକଙ୍କୁ ପଟୌଦି ମେଡାଲ ମିଳିବ । ଟେଷ୍ଟ କ୍ରିକେଟ୍ ଇତିହାସରେ ଆଣ୍ଡରସନ୍ ସର୍ବାଧିକ ୱିକେଟ୍ ହାସଲକାରୀ ଦ୍ରୁତ ବୋଲର । ସେମିତି ସଚିନ ହେଉଛନ୍ତି ସର୍ବକାଳୀନ ସର୍ବାଧିକ ରନ୍ ସ୍କୋରର । ସେ ୨୦୦ ଟେଷ୍ଟ ଖେଳି ୧୫୯୨୧ ରନ କରିଥିଲେ । ଯେଉଁଥିରେ ୫୧ଟି ଶତକ ସାମିଲ ରହିଥିଲା । ଆଣ୍ଡରସନ୍ ୧୮୮ଟି ଟେଷ୍ଟ ଖେଳି ୭୦୪ଟି ୱିକେଟ୍ ହାସଲ କରିଥିଲେ ।
