ମୁମ୍ବାଇ: ମୁମ୍ବାଇ ବିମାନବନ୍ଦରରେ ଏକ ବଡ଼ ଦୁର୍ଘଟଣା ଟଳିଯାଇଛି। କେରଳର କୋଚିରୁ ମୁମ୍ବାଇ ଆସୁଥିବା ଏୟାର ଇଣ୍ଡିଆର ଏକ ବିମାନ ଅବତରଣ ସମୟରେ ରନୱେରୁ ତଳକୁ ଖସି ଯାଇଥିଲା। ପ୍ରବଳ ବର୍ଷା ଯୋଗୁଁ ହୋଇଥିବା ଏହି ଦୁର୍ଘଟଣାରେ ବିମାନର ତିନୋଟି ଟାୟାର ଫାଟି ଯାଇଥିବା ଜଣାପଡ଼ିଛି । କିନ୍ତୁ ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି।  ବିମାନଟି ଅବତରଣ ସମୟରେ ମୁମ୍ବାଇରେ ପ୍ରବଳ ବର୍ଷା ହେଉଥିଲା  । ଏହି କାରଣରୁ ବିମାନ - AI2744  ରନୱେରୁ ତଳକୁ ଖସି ଯାଇଥିଲା । 

ସମସ୍ତ ଯାତ୍ରୀ ଏବଂ କ୍ରୁ ସଦସ୍ୟଙ୍କୁ ସୁରକ୍ଷିତ ଭାବରେ ବାହାର କରାଯାଇଛି ବୋଲି ଏୟାର ଇଣ୍ଡିଆ ପକ୍ଷରୁ କୁହାଯାଇଛି । ଏୟାରଲାଇନ୍ସର ମୁଖପାତ୍ର କହିଛନ୍ତି, ‘ଜୁଲାଇ ୨୧ରେ, କୋଚିରୁ ମୁମ୍ବାଇ ଯାଉଥିବା ବିମାନ AI2744 ମୁମ୍ବାଇ ବିମାନବନ୍ଦରରେ ଅବତରଣ କରିବା ସମୟରେ ରନୱେରୁ  ଖସି ଯାଇଥିଲା । ଏହା ସତ୍ତ୍ବେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବରେ ବାହାର କରାଯାଇଥିଲା । ତଦନ୍ତ ପାଇଁ ବିମାନକୁ ଅସ୍ଥାୟୀ ଭାବରେ ଗ୍ରାଉଣ୍ଡେଡ୍ କରାଯାଇଛି।’

 ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦର ମଧ୍ୟ ଏହି ଘଟଣାକୁ ନେଇ ଏକ ବିବୃତ୍ତି ଜାରି କରିଛି।  ଜୁଲାଇ ୨୧, ୨୦୨୫ ସକାଳ ୦୯:୨୭ ସମୟରେ, କୋଚିରୁ ଆସୁଥିବା ଏକ ବିମାନ ମୁମ୍ବାଇ ବିମାନବନ୍ଦରର ରନୱେରେ ଅବତରଣ କରିବା ସମୟରେ ତଳକୁ ଖସି ଯାଇଥିଲା । ଘଟଣା ପରେ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା ଏବଂ ସମସ୍ତ ଯାତ୍ରୀ ଓ କ୍ରୁ ସଦସ୍ୟଙ୍କୁ ତୁରନ୍ତ ବିମାନରୁ ବାହାର କରାଯାଇଥିଲା । ସେମାନେ ସମସ୍ତେ ସୁରକ୍ଷିତ ଅଛନ୍ତି । ମୁଖ୍ୟ ରନୱେ ୦୯/୨୭ରେ ସାମାନ୍ୟ କ୍ଷତି ହୋଇଥିବା ରିପୋର୍ଟରେ କୁହାଯାଇଛି । କାର୍ଯ୍ୟ ଜାରି ରଖିବା ପାଇଁ ଦ୍ୱିତୀୟ ରନୱେ ୧୪/୩୨କୁ ସକ୍ରିୟ କରାଯାଇଛି।