ବିଜାପୁର: ଛତିଶଗଡ଼ର ବିଜାପୁର ଜିଲ୍ଲାରେ ମାଓବାଦୀମାନେ ପୁଣି ଏକ ବର୍ବରକାଣ୍ଡ ଘଟାଇଛନ୍ତି। ତର୍ରେମ ଥାନା ଅଞ୍ଚଳର ଛୁଟବାଇ ଓ ବଡେ ତର୍ରେମ ଗାଁରେ ମାଓବାଦୀମାନେ ଦୁଇ ଜଣ ଗ୍ରାମବାସୀଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରି ନିର୍ମମ ହତ୍ୟା କରିଛନ୍ତି। ମୃତକମାନେ ଛୁଟବାଇ ଗାଁର ଯୋଗା କୱାସୀ (୫୦) ଓ ବଡେ ତର୍ରେମ ଗାଁର ମଙ୍ଗଲୁ କୁରସମ (୫୫) ବୋଲି ଜଣାପଡିଛି।
ପୋଲିସ ସୂଚନା ଅନୁଯାୟୀ, ମାଓବାଦୀମାନେ ଏହି ଦୁଇ ଗ୍ରାମବାସୀଙ୍କୁ ପୋଲିସ ଇନଫର୍ମର ବୋଲି ସନ୍ଦେହ କରି ହତ୍ୟା କରିଥିବା ଜଣାପଡ଼ିଛି। ଏହା ଗତ ଏକ ମାସ ମଧ୍ୟରେ ବିଜାପୁର ଅଞ୍ଚଳରେ ମାଓବାଦୀଙ୍କ ଦ୍ୱାରା ହୋଇଥିବା ଏଭଳି ତୃତୀୟ ଘଟଣା। ଯେଉଁଥିରେ ମୋଟ ଆଠଜଣଙ୍କୁ ହତ୍ୟା କରାଯାଇଛି।
ଏହି ଆକ୍ରମଣକୁ ପୋଲିସ ଅଧିକାରୀମାନେ ମାଓବାଦୀଙ୍କର ଭୟଭୀତ କରାଇବା ପାଇଁ ଏକ ପ୍ରୟାସ ବୋଲି ଅଭିହିତ କରିଛନ୍ତି। ବିଜାପୁର ଜିଲ୍ଲାରେ ମାଓବାଦୀ କାର୍ଯ୍ୟକଳାପ ଏବେ ମଧ୍ୟ ଜାରି ରହିଛି। ତେବେ ସୁରକ୍ଷା ବାହିନୀ ଗତ କିଛି ମାସରେ ନକ୍ସାଲବାଦ ବିରୋଧରେ ବଡ଼ ସଫଳତା ହାସଲ କରିଛି।
ବସ୍ତର ଅଞ୍ଚଳର ଆଇଜି ସୁନ୍ଦରରାଜ ପଟ୍ଟିଲିଙ୍ଗମ କହିଛନ୍ତି, "ମାଓବାଦୀ ଆନ୍ଦୋଳନ ଏବେ ଶେଷ ପର୍ଯ୍ୟାୟରେ ପହଞ୍ଚିଛି। ସେମାନଙ୍କର ନେତୃତ୍ୱ ବିଚ୍ଛିନ୍ନ ଓ ନୈରାଶ୍ୟଗ୍ରସ୍ତ ହୋଇପଡ଼ିଛି। ଦଣ୍ଡାକାରଣ୍ୟ ଜୋନରେ ମାତ୍ର ୩୦୦ ସଶସ୍ତ୍ର କ୍ୟାଡର ବାକି ଅଛନ୍ତି, ଯେଉଁମାନେ ହୁଏତ ଆତ୍ମସମର୍ପଣ କରିବେ ଅଥବା ନିଶ୍ଚିତ ଯୁଦ୍ଧରେ ମୁକାବିଲା କରିବେ।"
ଏହି ଘଟଣା ପୂର୍ବରୁ ଜୁନ ମାସରେ ମାଓବାଦୀମାନେ ତିନି ଜଣ ଗ୍ରାମବାସୀଙ୍କୁ ଗଳାକାଟି ହତ୍ୟା କରିଥିଲେ। ଯାହା ସ୍ଥାନୀୟ ଲୋକଙ୍କ ମଧ୍ୟରେ ଭୟ ସୃଷ୍ଟି କରିବା ପାଇଁ ଏକ ପ୍ରୟାସ ଥିଲା। ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ଏବଂ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହାଙ୍କ ନେତୃତ୍ୱରେ ମାଓବାଦୀ ବିରୋଧୀ ଅଭିଯାନକୁ ତ୍ୱରାନ୍ୱିତ କରାଯାଇଛି। ଆସନ୍ତା ୨୦୨୬ ମାର୍ଚ୍ଚ ୩୧ ତାରିଖ ସୁଦ୍ଧା ଦେଶରୁ ନକ୍ସାଲବାଦକୁ ସମ୍ପୂର୍ଣ୍ଣ ନିର୍ମୂଳ କରିବା ପାଇଁ ସରକାର ଲକ୍ଷ୍ୟ ରଖିଛନ୍ତି ବୋଲି ସେ ଘୋଷଣା କରିଛନ୍ତି।
