ନୂଆଦିଲ୍ଲୀ: ଅହମ୍ମଦାବାଦ ବିମାନ ଦୁର୍ଘଟଣା ପରେ ଯାତ୍ରୀଙ୍କ ମନରେ ଏବେ ବି ଭୟ ଲାଗି ରହିଛି । ଏହି ଦୁର୍ଘଟଣା ପରେ ମଧ୍ୟ ବିଭିନ୍ନ ବିମାନରେ ଯାନ୍ତ୍ରୀକ ତ୍ରୁଟି ନେଇ ଖବର ଲୋକଙ୍କୁ ବିଚଳିତ କରୁଛି । ଆଜି ମୁମ୍ବାଇ ଏୟାରପୋର୍ଟରେ ଅବତରଣ ବେଳେ ଏକ ଏୟାର ଇଣ୍ଡିଆ ବିମାନ ରନଓ୍ବେରୁ ତଳକୁ ଖସିଯାଇଥିଲା । ଏତେ ବଡ଼ ଅଘଟଣରୁ ଅଳ୍ପକେ ବର୍ତ୍ତିଥିଲେ ଯାତ୍ରୀ । ଏହା ପରେ ସନ୍ଧ୍ୟାରେ ଆଉ ଏକ ଏୟାର ଇଣ୍ଡିଆ ବିମାନ ଯାନ୍ତ୍ରିକ ତ୍ରୁଟି ଯୋଗୁଁ ଦିଲ୍ଲୀ ଏୟାରପୋର୍ଟରୁ ଉଡ଼ାଣ ଭରିପାରି ନଥିଲା ।
ଏହି ଖବର ମଧ୍ୟରେ ଏକ ଇଣ୍ଡିଗୋ ବିମାନରେ ଯାନ୍ତ୍ରିକ ତ୍ରୁଟି ନେଇ ଖବର ଚିନ୍ତା ବଢ଼ାଇଛି । ଗୋଆରୁ ଇନ୍ଦୋର ଆସୁଥିବା ଏକ ଇଣ୍ଡିଗୋ ବିମାନରେ ହଠାତ ଲ୍ୟାଣ୍ଡିଂ ଗିୟର ଖରାପ ହୋଇଯାଇଥିଲା । ଅବତରଣ କରିବା ପୂର୍ବରୁ ଏଭଳି ସମସ୍ୟା ଉପୁଜିଥିଲା । ଏହି ବିମାନରେ ୧୪୦ ଯାତ୍ରୀ ଥିଲେ । ଅନେକ ସମୟ ଆକାଶରେ ଚକ୍କର କାଟିବା ପରେ, ବହୁ ପ୍ରଚେଷ୍ଟା ପରେ ଖୋଲିଥିଲା ଲ୍ୟାଣ୍ଡିଂ ଗିୟର । ପରେ ବିମାନକୁ ସୁରକ୍ଷିତ ଲ୍ୟାଣ୍ଡ କରିବାରେ ସଫଳ ହୋଇଥିଲେ ପାଇଲଟ୍ ।
ଇନ୍ଦୋରର ଦେବୀ ଅହଲ୍ୟାବାଇ ହୋଲକର ବିମାନବନ୍ଦରରେ ସୋମବାର ଦିନ ଗୋଆରୁ ଇନ୍ଦୋର ଆସୁଥିବା ଏକ ଇଣ୍ଡିଗୋ ବିମାନର ପାଇଲଟ୍ ATC ଟାୱାର ସହିତ ଯୋଗାଯୋଗ କରି ଜରୁରୀକାଳୀନ ଅବତରଣ ପାଇଁ ଅନୁମତି ମାଗିଥିଲେ । ଇନ୍ଦୋର ବିମାନବନ୍ଦରରେ ଅବତରଣ କରିବା ପୂର୍ବରୁ, ପାଇଲଟ୍ ବିମାନର ନିୟନ୍ତ୍ରଣ ପ୍ରଣାଳୀରେ ଏକ ଅଣ୍ଡର କ୍ୟାରେଜ୍ ସତର୍କତା ସଙ୍କେତ ପାଇଥିଲେ । ଯାହା ସୂଚିତ କରେ ଯେ, ଲ୍ୟାଣ୍ଡିଂ ଗିୟର ଠିକ୍ ଭାବରେ କାମ କରୁନାହିଁ କିମ୍ବା ସମ୍ପୂର୍ଣ୍ଣ ଖୋଲା ନାହିଁ । ସୂଚନା ପରେ, ବିମାନବନ୍ଦରରେ ତୁରନ୍ତ ସମସ୍ତ ଜରୁରୀକାଳୀନ ପ୍ରସ୍ତୁତି କରାଯାଇଥିଲା। ପାଇଲଟ୍ ମଧ୍ୟ ଆକାଶରେ ଚକ୍କର ମାରିବା ପରେ ବିମାନକୁ ସୁରକ୍ଷିତ ଭାବରେ ଅବତରଣ କରିଥିଲେ ।
ଏହିପରି ଭାବରେ ଇନ୍ଦୋର ବିମାନବନ୍ଦରରେ ଏକ ବଡ଼ ବିମାନ ଦୁର୍ଘଟଣା ଟଳିଯାଇଛି । ଗୋଆରୁ ଇନ୍ଦୋର ଆସୁଥିବା ଇଣ୍ଡିଗୋ ବିମାନ 6E 813 ସନ୍ଧ୍ୟା ୪.୪୦ରେ ଇନ୍ଦୋରରେ ପହଞ୍ଚିଥିଲା । କିନ୍ତୁ ଅବତରଣ କରିବା ପୂର୍ବରୁ ପାଇଲଟଙ୍କୁ ଲ୍ୟାଣ୍ଡିଂ ଗିୟରରେ ତ୍ରୁଟି ଥିବାର ସଙ୍କେତ ମିଳିଥିଲା। ଏହା ବିମାନର ସୁରକ୍ଷିତ ଅବତରଣରେ ସମସ୍ୟା ସୃଷ୍ଟି କରିଥିଲା । ବିମାନରେ ୧୪୦ ଜଣ ଯାତ୍ରୀ ଥିଲେ।
ସିଷ୍ଟମ ସତର୍କ କରିବା ମାତ୍ରେ ପାଇଲଟ୍ ସତର୍କତା ଦେଖାଇ ATC ସହିତ ଯୋଗାଯୋଗ କରି ଜରୁରୀକାଳୀନ ଅବତରଣ ପାଇଁ କହିଥିଲେ । ଏହା ସହ ଅବତରଣ ନକରି ଆକାଶରେ ଚକ୍କର ମାରିଥିଲେ । ଏହା ବିମାନରେ ବସିଥିବା ଯାତ୍ରୀମାନଙ୍କ ମଧ୍ୟରେ ଆତଙ୍କ ସୃଷ୍ଟି କରିଥିଲା। ପ୍ରାୟ ଅଧ ଘଣ୍ଟା ଧରି ଉପରେ ଘୂରି ବୁଲିବା ପରେ ପାଇଲଟ୍ ଏବଂ ବୈଷୟିକ ଦଳର ବୁଝାମଣା ଯୋଗୁଁ ଲ୍ୟାଣ୍ଡିଂ ଗିୟର ପୁନର୍ବାର ସକ୍ରିୟ ହୋଇଥିଲା । ଫଳରେ ବିମାନଟି ସନ୍ଧ୍ୟା ୫.୧୫ ରେ ସୁରକ୍ଷିତ ଭାବରେ ଅବତରଣ କରିଥିଲା।
ଇନ୍ଦୋର ବିମାନବନ୍ଦରରେ ଅବତରଣ କରିବା ପରେ, ଇଞ୍ଜିନିୟରମାନେ ବିମାନର ଯାନ୍ତ୍ରିକ ତ୍ରୁଟି ଯାଞ୍ଚ କରିଥିଲେ। ବିମାନର ଯାନ୍ତ୍ରିକ ତ୍ରୁଟି ଗୋଟିଏ ଘଣ୍ଟା ମଧ୍ୟରେ ଠିକ୍ କରାଯାଇଥିଲା। ଏହା ପରେ ବିମାନଟି ରାୟପୁର ଅଭିମୁଖେ ଯାତ୍ରା କରିଥିଲା। ଏହି ବିମାନଟି ଗୋଆରୁ ସନ୍ଧ୍ୟା ୪.୫୫ ରେ ଇନ୍ଦୋରରେ ପହଞ୍ଚିଥାଏ ଏବଂ ପ୍ରାୟ ୫.୧୫ ରେ ରାୟପୁର ଅଭିମୁଖେ ଯାତ୍ରା କରେ । ଯାନ୍ତ୍ରିକ ତ୍ରୁଟି ଯୋଗୁଁ, ବିମାନଟି ରାତି ୮ ଟାରେ ରାୟପୁର ଅଭିମୁଖେ ଯାତ୍ରା କଲା ।
