ସୁନ୍ଦରଗଡ଼, ୦୨/୦୬ : ହେମଗିରି ଥାନା ଅଞ୍ଚଳରେ ନାବାଳିକାଙ୍କୁ ଦୁଷ୍କର୍ମ ମାମଲାର ଆସିଲା ରାୟ। ନାବାଳିକା ଦୁଷ୍କର୍ମ ଅଭିଯୁକ୍ତଙ୍କୁ ୧୦ ବର୍ଷ କାରାଦଣ୍ଡାଦେଶ ସହ ୨୫ ହଜାର ଟଙ୍କାର ଜରିମାନା ନିର୍ଦ୍ଦେଶ ଦେଲେ ସୁନ୍ଦରଗଡ଼ ପୋକ୍ସୋ କୋର୍ଟ। ଜରିମାନା ଅନାଦେୟ ହେଲେ ଅଧିକ ଦେଢ ବର୍ଷ କାରାଦଣ୍ଡ ଭୋଗିବାକୁ ରାୟ ଦେଇଛନ୍ତି ପୋକ୍ସୋ କୋର୍ଟର ବିଚାରପତି।
ସୂଚନାନୁଯାୟୀ, ହେମଗିରି ଅଞ୍ଚଳର ଜଣେ ୧୬ ବର୍ଷୀୟା ନାବାଳିକାଙ୍କୁ କୁତ୍ରା ଅଞ୍ଚଳର ଯୁବକ ଅର୍ଜ୍ଜୁନ ମୁଣ୍ଡା ପ୍ରେମ କରି ବିବାହ କରିବ ବୋଲି ପ୍ରତିଶୃତି ଦେଇ ଦେବଗଡ଼ ନେଇ ସେଠାରେ ଶାରିରୀକ ସମ୍ପର୍କ ରଖିଥିଲା। ଗୋଟିଏ ମାସ ଦେବଗଡ଼ରେ ରହି ସୁନ୍ଦରଗଡ଼ ଆସି ବନ୍ଧପାଲି ଗ୍ରାମରେ ଦୁହେଁ ଏକାସାଙ୍ଗେ ରହୁଥିଲେ। କିଛିଦିନ ପରେ ଅର୍ଜ୍ଜୁନ ନାବାଳିକାଙ୍କୁ ମାରପିଟ୍ କରି ଘରୁ ବାହାର କରି ଦେଇଥିଲା। ନାବାଳିକା ବାପଘରକୁ ଫେରି ଘଟଣା ସମ୍ପର୍କରେ ଜଣାଇବା ପରେ ୨୦୧୫ ମସିହା ସେପ୍ଟେମ୍ଵର ୨୧ ତାରିଖରେ ହେମଗିରି ଥାନାରେ ଦୁଷ୍କର୍ମ ଅଭିଯୋଗ କରିଥିଲେ। ହେମଗିରି ପୁଲିସ ଯୁବକକୁ ଗିରଫ କରି କୋର୍ଟ ଚାଲାଣ କରିଥିଲା। ପୋକ୍ସୋ କୋର୍ଟରେ ଆଜି ଏହି ମାମଲାର ଶୁଣାଣି ହୋଇଛି। ମାନ୍ୟବର ବିଚାରପତି ୧୫ ଜଣଙ୍କ ସାକ୍ଷ୍ୟ ଗ୍ରହଣ କରି ଆସାମୀକୁ ୧୦ ବର୍ଷ କାରାଦଣ୍ଡ ସହ ୨୫ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦେୟ ହେଲେ ଦେଢ଼ ବର୍ଷ ଅଧିକ କାରାଦଣ୍ଡ ଭୋଗିବାକୁ ରାୟ ଦେଇଛନ୍ତି। ଏହାସହିତ ପୀଡ଼ିତାଙ୍କୁ ୫ ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ ଡିଏଲସିସିକୁ ନିର୍ଦ୍ଦେଶ ଦେଇଛନ୍ତି।
