ପୁରୀ, ୪/୬ : ପୁରୀ ରଥଖଳାରେ ତିନି ରଥର ମୋଟ ୪୨ ଚକ ସହ ୨୧ଟି ଅଖ ସଂଯୋଗ ଶେଷ ହୋଇଛି। ତାଳଧ୍ୱଜର ୧୪ ଚକ ସହ ୭ ଅଖ, ନନ୍ଦିଘୋଷର ୧୬ ଚକ ସହ ୮ ଅଖ ଓ ଦେବଦଳନର ୧୨ ଚକ ସହ ୬ ଅଖ ଭୁଞ୍ଜାଯାଇଛି । ପଞ୍ଚମହାଦେବ ରଥ ଖଳାରେ ବିଜେ ପରେ ରଥ ଚକ ଓ ଅଖ ଯୋଡ଼ାଯାଇଛି । ଏଥିସହ ଫ୍ରେମ୍ ପଡ଼ିଥିବା ଦଣ୍ଡା କଳସା ସରି ନମ୍ବରିଂ ହୋଇ ଫିଟିଂ ଖୋଲାଯାଇଛି । ମହାପ୍ରଭୁଙ୍କ ଭଉଁରି ଉତ୍ସବରେ ୩ ରଥର ନାହାକା ଚକ ଓ ଅଖ ୯ଟି ସଂଯୋଗ ହୋଇଥିଲା । ମଙ୍ଗଳବାର ତିନି ରଥର ବାକି ୩୬ଟି ଚକ ସହ ୧୮ ଅଖ ସଂଯୋଗ କରାଯାଇଛି । ଭୋଇ ସର୍ଦ୍ଦାର ରବି ଭୋଇଙ୍କ ଦାୟିତ୍ୱରେ ବଳିଷ୍ଠ ଭୋଇ ସେବକମାନେ ବିଶ୍ୱକର୍ମାଙ୍କ ମାର୍ଗଦର୍ଶନରେ ଏହି କାର୍ଯ୍ୟ ସମ୍ପନ୍ନ କରିଛନ୍ତି ।
ଚକଗୁଡ଼ିକରେ ବନ୍ଧ ଦିଆଯାଇଛି । ଏଣିକି ଚକ ଓ ଅଖ ଥାକ ସରିଲେ ମେଣ୍ଢି ସ୍ଥାପନା ହୋଇ ଦଣ୍ଡା ପଡ଼ିବ । ଦଣ୍ଡାରେ ଗରଗରା ପଡ଼ିଲେ ସେଥିରେ ଚାରି ନାହାକା ଉଠିବ । ଦଣ୍ଡା ଓ ଗରଗରା ଉପରେ ରଥର ଉପର ଅଂଶର ସମସ୍ତ ଭାରା ରହିବ । ଚାରିନାହାକା ଉଠିଲେ ରଥର ଉପରିଭାଗ କାର୍ଯ୍ୟ ଆରମ୍ଭ ହୋଇଯିବ । ରଥର ଧୂଳିଦଣ୍ଡା କାର୍ଯ୍ୟ ଆରମ୍ଭ ହୋଇଯାଇଛି । ପ୍ରଭା ପଛକୁ ଧୂଳିଦଣ୍ଡା ରହିବ। ଜଗତପୃଷ୍ଠ ଶେଣି ହଣା ଚାଲିଛି । ୫ଟି ଜଗତପୃଷ୍ଠ ଶେଣି ଉପରେ ଠାକୁରଙ୍କ ସିଂହାସନ ରହିବ। ଏପଟେ ରଥ ଖଳାରେ ରୂପକାର ସେବକମାନେ ପ୍ରଭା ଅପସରା ଅଳଙ୍କରଣ କାମ ସାରି ସୋମବାର ନାଟଗୋଡ଼ ତିଆରି ଆରମ୍ଭ କରିଛନ୍ତି । କରତି ସେବକମାନେ ରଥର ଗୟଳ ଚିରଟ କରୁଛନ୍ତି । ବିଶ୍ୱକର୍ମାମାନେ ଗୟଳକୁ ଖଳାରେ ପକାଇ ବାରିସିରେ ପ୍ରସ୍ତୁତ କରୁଛନ୍ତି । ତିନୋଟି ପୃଥକ ଶାଳରେ କମାର ତଥା ଓଝା ସେବକ ରଥର ଲୁହା ସାମଗ୍ରୀ ତିଆରିରେ ବ୍ୟସ୍ତ ରହିଛନ୍ତି ।
