ନୂଆଦିଲ୍ଲୀ,୦୧/୦୬:ଉତ୍ତର ସିକ୍କିମରେ ଭୂସ୍ଖଳନ । ଶନିବାର ନିରନ୍ତର ବର୍ଷା ଯୋଗୁଁ ଅନେକ ସ୍ଥାନରେ ଭୂସ୍ଖଳନ ହୋଇଛି। ଯାହା ଫଳରେ ଅନେକ ରାସ୍ତା ବନ୍ଦ ହୋଇଯାଇଥିବା ବେଳେ ୧୫୦୦ରୁ ଉର୍ଦ୍ଧ୍ବ ଯାତ୍ରୀ ଫସିଥିବା ବେଳେ ୮ ଜଣ ନିଖୋଜ ଥିବା ଜଣାପଡ଼ିଛି ।ସେହିପରି ସିକ୍କିମର ମଙ୍ଗନ ଜିଲ୍ଲାରେ ଏକ ପର୍ଯ୍ୟଟକ ଗାଡ଼ି ପ୍ରାୟ ହଜାର ଫୁଟ ଗଭୀର ଖାଇରେ ଖସି ପଡ଼ିଥିଲା, ଯାହା ପରେ ଏହା ହାୱା ସ୍ଥିତ ତିସ୍ତା ନଦୀରେ ବୁଡ଼ି ଯାଇଥିଲା। ଏହି ଦୁର୍ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଗୁରୁତର ଆହତ ହୋଇଛନ୍ତି।
ଗାଡ଼ିରେ ମୋଟ ୧୧ ଜଣ ଥିଲେ। ଏଥିରେ ଓଡ଼ିଶା, ତ୍ରିପୁରା ଏବଂ ଉତ୍ତର ପ୍ରଦେଶର ପର୍ଯ୍ୟଟକ ଥିଲେ। ପ୍ରଶାସନ ନଦୀ କୂଳରୁ ଚାରିଟି ପରିଚୟପତ୍ର ଏବଂ ଛଅଟି ମୋବାଇଲ୍ ଫୋନ୍ ଉଦ୍ଧାର କରିଛି, କିନ୍ତୁ ନିଖୋଜ ଲୋକଙ୍କର ଏପର୍ଯ୍ୟନ୍ତ ସନ୍ଧାନ ମିଳିନାହିଁ। ଦୁର୍ଘଟଣାରେ ଡ୍ରାଇଭର ପାସାଙ୍ଗ ଡେନୁ ଶେର୍ପା ମଧ୍ୟ ସାମିଲ ଅଛନ୍ତି।ଏସପି ଭୂତିଆଙ୍କ ଅନୁଯାୟୀ, ଲାଚେନରେ ୧୧୫ ଜଣ ପର୍ଯ୍ୟଟକ ଏବଂ ଲାଚୁଙ୍ଗରେ ପ୍ରାୟ ୧,୩୫୦ ଜଣ ପର୍ଯ୍ୟଟକ ଫସି ରହିଛନ୍ତି। ଉଭୟ ପାର୍ଶ୍ୱରୁ ରାସ୍ତା ବନ୍ଦ ଅଛି, ତେଣୁ ସମସ୍ତଙ୍କୁ ହୋଟେଲରେ ରହିବାକୁ ପରାମର୍ଶ ଦିଆଯାଇଛି। ଶୁକ୍ରବାରଠାରୁ ବିଦ୍ୟୁତ୍ ସେବା ବନ୍ଦ ଥିଲା, ଯାହା ଶନିବାର ସନ୍ଧ୍ୟାରେ ପୁନଃସ୍ଥାପିତ ହୋଇଥିଲା। ପ୍ରାୟ ୨୪ ଘଣ୍ଟା ପରେ ଅପରାହ୍ନ ୩ଟାରେ ମୋବାଇଲ୍ ନେଟୱାର୍କ ମଧ୍ୟ ଆରମ୍ଭ ହୋଇଥିଲା। ପ୍ରଶାସନ ରବିବାର ସୁଦ୍ଧା ଜଳ ଯୋଗାଣ ଆରମ୍ଭ କରିବାକୁ ଚେଷ୍ଟା କରୁଛି।
