ନୂଆଦିଲ୍ଲୀ, ୧।୫: କେନ୍ଦ୍ର ସରକାରଙ୍କ ‘ଏକ ରାଜ୍ୟ, ଏକ ଗ୍ରାମୀଣ ବ୍ୟାଙ୍କ’ ନୀତି । ଗୁରୁବାରଠୁ ଅର୍ଥାତ୍ ଆଜିଠୁ ୧୫ଟି ଗ୍ରାମୀଣ ବ୍ୟାଙ୍କ ବନ୍ଦ ହେବାକୁ ଯାଉଛି ! ବ୍ୟାଙ୍କିଙ୍ଗ ସେବାକୁ ଅଧିକ ମଜବୁତ ଓ ପ୍ରଭାବଶାଳୀ କରିବା ଲକ୍ଷ୍ୟରେ ଏଭଳି ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । କେନ୍ଦ୍ର ସରକାରଙ୍କ ‘ଏକ ରାଜ୍ୟ, ଏକ ଗ୍ରାମୀଣ ବ୍ୟାଙ୍କ’ ନୀତି ଅନୁସାରେ, ୧ ମେ ୨୦୨୫ଠାରୁ ଦେଶର ୧୫ଟି ଗ୍ରାମୀଣ ବ୍ୟାଙ୍କ ବନ୍ଦ ହେବାକୁ ଯାଉଛି । ଏହି ବ୍ୟାଙ୍କଗୁଡ଼ିକୁ ଅନ୍ୟ ଗ୍ରାମୀଣ ବ୍ୟାଙ୍କ ସହିତ ମିଶ୍ରଣ କରାଯିବ । ଫଳରେ ଦେଶରେ ଗ୍ରାମୀଣ ବ୍ୟାଙ୍କର ସଂଖ୍ୟା ୪୩ରୁ ହ୍ରାସ ପାଇ ୨୮କୁ ଖସିବ । କେଉଁ କେଉଁ ବ୍ୟାଙ୍କଗୁଡ଼ିକ ବନ୍ଦ ରହିବ ଆସନ୍ତୁ ଜାଣିବା ।
ସୂଚନାନୁସାରେ, ଏହି ୧୫ଟି ଗ୍ରାମୀଣ ବ୍ୟାଙ୍କ ଅନ୍ୟ ବ୍ୟାଙ୍କ ସହିତ ମିଶ୍ରଣ ହେବ । ଏଥିରେ ଆନ୍ଧ୍ରପ୍ରଦେଶ ଗ୍ରାମୀଣ ବ୍ୟାଙ୍କ, ଉତ୍ତରପ୍ରଦେଶ ଗ୍ରାମୀଣ ବ୍ୟାଙ୍କ, ବରୋଦା ଗ୍ରାମୀଣ ବ୍ୟାଙ୍କ, ପଶ୍ଚିମବଙ୍ଗ ଗ୍ରାମୀଣ ବ୍ୟାଙ୍କ ଏବଂ ଗୁଜରାଟର ଦୁଇଟି ଗ୍ରାମୀଣ ବ୍ୟାଙ୍କ ସାମିଲ ରହିଛି । ପ୍ରତ୍ୟେକ ରାଜ୍ୟରେ ଏକ ଗ୍ରାମୀଣ ବ୍ୟାଙ୍କ ରହିବାକୁ ଯୋଜନା କରାଯାଇଛି, ଯାହା ସେହି ରାଜ୍ୟର ସମସ୍ତ ଗ୍ରାମୀଣ ବ୍ୟାଙ୍କକୁ ଏକତ୍ରିତ କରିବ । ଏଠି ପ୍ରଶ୍ନ ଉଠୁଛି ଏହି ବ୍ୟାଙ୍କଗୁଡ଼ିକରେ ଥିବା ଗ୍ରାହକଙ୍କ ଟଙ୍କା ସୁରକ୍ଷିତ ରହିବ କି ? ସରକାରୀ ସୂତ୍ର ଅନୁସାରେ, ଗ୍ରାହକଙ୍କ ଟଙ୍କା ସମ୍ପୂର୍ଣ୍ଣ ସୁରକ୍ଷିତ ରହିବ । ଏହି ମିଶ୍ରଣ ପ୍ରକ୍ରିୟାରେ ଗ୍ରାହକଙ୍କ ଆକାଉଣ୍ଟ, ଜମା ରାଶି, ଋଣ ଓ ଅନ୍ୟାନ୍ୟ ସେବା ନୂଆ ମିଶ୍ରିତ ବ୍ୟାଙ୍କକୁ ସ୍ଥାନାନ୍ତର ହେବ । ଗ୍ରାହକଙ୍କୁ କୌଣସି ଆର୍ଥିକ କ୍ଷତି ହେବ ନାହିଁ । ବ୍ୟାଙ୍କ ଶାଖାଗୁଡ଼ିକର ସଂଖ୍ୟାରେ କୌଣସି ହ୍ରାସ ହେବ ନାହିଁ ବରଂ ଡିଜିଟାଲ ବ୍ୟାଙ୍କିଙ୍ଗ ଓ ଗ୍ରାହକ ସେବାରେ ଉନ୍ନତି ହେବ ।
କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ଗ୍ରାମୀଣ ବ୍ୟାଙ୍କଗୁଡ଼ିକର ଆର୍ଥିକ ଦୃଢ଼ତା ବୃଦ୍ଧି କରିବା ଓ ସେବାର ଗୁଣବତ୍ତା ଉନ୍ନତ କରିବା ଲକ୍ଷ୍ୟ ରଖିଛି । ବ୍ୟାଙ୍କଗୁଡ଼ିକର ଡିଜିଟାଲ ଓ ଗ୍ରାହକ ସେବା ଅବସଂରଚନା ଅଧିକ ମଜବୁତ ହେବ । ଗ୍ରାହକମାନେ ଅଧିକ ଆଧୁନିକ ବ୍ୟାଙ୍କିଙ୍ଗ ସୁବିଧା ପାଇବେ, ଯେପରିକି ମୋବାଇଲ ବ୍ୟାଙ୍କିଙ୍ଗ, ଇଣ୍ଟରନେଟ ବ୍ୟାଙ୍କିଙ୍ଗ ଓ ଏଟିଏମ ସେବା । ଏକତ୍ରିତ ବ୍ୟାଙ୍କଗୁଡ଼ିକ ଆର୍ଥିକ ଦୃଷ୍ଟିରୁ ଅଧିକ ସକ୍ଷମ ହେବେ, ଯାହା ଗ୍ରାମାଞ୍ଚଳରେ ଋଣ ଓ ଅନ୍ୟାନ୍ୟ ସେବା ପ୍ରଦାନରେ ସହାୟକ ହେବ ।
