ନୂଆଦିଲ୍ଲୀ: ବିହାରର କ୍ରିକେଟର ବୈଭବ ସୂର୍ଯ୍ୟବଂଶୀ ଏବେ ଚର୍ଚ୍ଚାରେ । ଆଇପିଏଲ ଅକ୍ସନ ଇତିହାସରେ ସର୍ବକନିଷ୍ଠ ପ୍ଲେୟାର ଭାବରେ ସାମିଲ ହୋଇଥିବା ବୈଭବଙ୍କୁ ୧ କୋଟି ୧୦ ଲକ୍ଷ ଟଙ୍କାରେ କିଣିଛି ରାଜସ୍ଥାନ ରୟାଲ୍ସ । ସବୁଠୁ ଆଶ୍ଚର୍ଯ୍ୟର କଥା ହେଉଛି, ବୈଭବ ସୂର୍ଯ୍ୟବଂଶୀଙ୍କ ବୟସ ମାତ୍ର ୧୩ ବର୍ଷ । ଏଥର ଆଇପିଏଲ୍ ମେଗା ନିଲାମୀରେ ଓହ୍ଲାଇବାରେ ବୈଭବ ସର୍ବକନିଷ୍ଠ କ୍ରିକେଟର । ତାଙ୍କର ମୂଳ ମୂଲ୍ୟ ୩୦ ଲକ୍ଷ ଟଙ୍କା ଥିଲା ।
ନିଲାମ ପାଇଁ ବିସ୍ଫୋରକ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ନାଁ ଆସିବା କ୍ଷଣି ତାଙ୍କୁ କିଣିବା ପାଇଁ ଦିଲ୍ଲୀ କ୍ୟାପିଟାଲ୍ସ ଓ ରାଜସ୍ଥାନ ରୟାଲ୍ସ ମଧ୍ୟରେ ଛକାପଞ୍ଝା ଚାଲିଥିଲା । ଡାକରା ୩୦ ଲକ୍ଷରୁ ଆରମ୍ଭ ହୋଇ ୧.୧୦ କୋଟି ଟଙ୍କାରେ ପହଞ୍ଚିଥିଲା। ଆଉ ଶେଷ ଡାକରା ରାଜସ୍ଥାନ ଡାକିଥିଲା ଏବଂ ଦିଲ୍ଲୀ ଓହରି ଯାଇଥିଲା । ଏହି ଯୁବ ବ୍ୟାଟର ଏବେ ସଞ୍ଜୁ ସାମସନଙ୍କ ନେତୃତ୍ଵାଧୀନ ରାଜସ୍ଥାନ ରୟାଲ୍ସ ପକ୍ଷରୁ ଖେଳିବେ।
ବୈଭବ ସୂର୍ଯ୍ୟବଂଶୀ ନିକଟରେ ଚର୍ଚ୍ଚାରେ ରହିଥିଲେ। ସେ ଅନ୍ତର୍ଜାତୀୟ ସ୍ତରରେ ଶତକ ହାସଲକାରୀ ଯୁବ ଖେଳାଳି ହୋଇଥିଲେ। ସେ ଏହି ଉପଲବ୍ଧି ଭାରତର ୧୯ ବର୍ଷରୁ କମ ଟେଷ୍ଟ ମ୍ୟାଚ୍ରେ ଅଷ୍ଟ୍ରେଲିଆ ବିପକ୍ଷରେ ଖେଳିଥିଲେ । ବୈଭବ ଉକ୍ତ ମ୍ୟାଚରେ ମାତ୍ର ୬୨ ବଲରୁ ୧୦୪ ରନର ଇନିଂସ ଖେଳିଥିବା ବେଳେ ୫୯ ବଲରୁ ଶତକ ପୂରଣ କରିଥିଲେ।
ସୂର୍ଯ୍ୟବଂଶୀ ଚଳିତ ବର୍ଷ ବିହାର ପକ୍ଷରୁ ରଣଜୀରେ ପଦାର୍ପଣ କରି ପ୍ରଥମ ଥର ଚର୍ଚ୍ଚାକୁ ଆସିଥିଲେ। ସେହି ସମୟରେ ବୈଭବଙ୍କୁ ମାତ୍ର ୧୨ ବର୍ଷ ବୟସ ହୋଇଥିଲା। ସେ ଭାରତ ପାଇଁ ପ୍ରଥମ ଶ୍ରେଣୀ ଟୁର୍ଣ୍ଣାମେଣ୍ଟ ଖେଳିବାରେ ସବୁଠୁ ଯୁବ ଖେଳାଳି ହୋଇଥିଲେ।ଯୁବରାଜ ସିଂ ଏବଂ ସଚ୍ଚିନ ତେନ୍ଦୁଲକରଙ୍କ ଅପେକ୍ଷା ସୂର୍ଯ୍ୟବଂଶୀ କମ୍ ବୟସରେ ଟୁର୍ଣ୍ଣାମେଣ୍ଟ ଖେଳି ରେକର୍ଡ କରିଥିଲେ ।
