ନୂଆଦିଲ୍ଲୀ : ୨୬ / ୧୧ ମୁମ୍ୱାଇ ଆତଙ୍କୀ ହମଲାର ମାଷ୍ଟର ମାଇଣ୍ଡ ତହବୁର ରାଣାକୁ ଶେଷରେ ଭାରତ ଅଣାଯାଇଛି ଏବଂ ଏବେ ତାକୁ କୋର୍ଟରେ ଠିଆ କରାଇ ମୁମ୍ୱାଇ ହମଲାରେ ପୀଡ଼ିତଙ୍କୁ ନ୍ୟାୟ ଦେବାର ଦାୟିତ୍ୱ ବରିଷ୍ଠ ଓକିଲ ଦୟାନ କୃଷ୍ଣନଙ୍କ ଉପରେ ରହିଛି। ଦୟାନ କୃଷ୍ଣନ କେବଳ ରାଷ୍ଟ୍ରୀୟ ଯାଞ୍ଚ ଏଜେନ୍ସି (ଏନଆଇଏ) ପକ୍ଷରୁ କୋର୍ଟରେ ହାଜର ହେବେନି ବରଂ ଏହି କେସ୍ରେ ସରକାରୀ ପକ୍ଷକୁ ସଂପୂର୍ଣ୍ଣ କମାଣ୍ଡ ମଧ୍ୟ ନେବେ । ମୁଖ୍ୟ କଥା ଏହା ଯେ, ସେ ଏହି ମାମଲାରେ ୨୦୧୦ରୁ ହିଁ ଯୋଡ଼ି ହୋଇ ରହିଛନ୍ତି ଏବଂ ସେ ଆମେରିକାରୁ ରାଣାର ପ୍ରତ୍ୟର୍ପଣ ପ୍ରକ୍ରିୟାରେ ଆମେରିକୀୟ କୋର୍ଟରେ ଭାରତର ପକ୍ଷ ମଧ୍ୟ ରଖି ସାରିଛନ୍ତି।
ଆମେରିକାରେ ରାଣାର ପ୍ରତିନିଧିତ୍ୱ ବ୍ରିଟିଶ ବାରିଷ୍ଟର ପଲ୍ ଗାର୍ଲିକ କରୁଥିଲେ , ଯେତେବେଳେ କି ବରିଷ୍ଠ ଓକିଲ ଦୟାନ କୃଷ୍ଣନ ରାଣାଙ୍କ ବିରୁଦ୍ଧରେ ଭାରତର ପ୍ରତ୍ୟର୍ପଣ ପ୍ରକ୍ରିୟାରେ ଆମେରିକୀୟ ପବ୍ଲିକ୍ ପ୍ରସିକ୍ୟୁଟରମାନଙ୍କୁ ନିଃଶୁଳ୍କ ସହାୟତା କରୁଥିଲେ। କୃଷ୍ଣନ ପୂର୍ବରୁ ଦିଲ୍ଲୀ ଗଣଦୁଷ୍କର୍ମ , କମନୱେଲଥ୍ ଦୁର୍ନୀତି ମାମଲା ଇତ୍ୟାଦି ସମ୍ୱେଦନଶୀଳ ମାମଲାରେ ମଧ୍ୟ ହାଜର ହୋଇ ସାରିଛନ୍ତି।
ଦୟାନ କୃଷ୍ଣନ ଦେଶର ସବୁଠୁ ପ୍ରତିଷ୍ଠିତ କ୍ରିମିନାଲ ଓକିଲଙ୍କ ମଧ୍ୟରେ ଗଣା ହୁଅନ୍ତି। ସେ ୧୯୯୩ ମସିହାରେ ଭାରତର ପ୍ରଥମ ନ୍ୟାସନାଲ ଲ’ ୟୁନିଭର୍ସିଟିରୁ ଗ୍ରାଜୁଏସନ ପାସ୍ କରିଥିଲେ ଏବଂ ସେ ସେହି ୟୁନିଭର୍ସିଟିର ପ୍ରଥମ ବ୍ୟାଚ୍ର ସଦସ୍ୟ ଥିଲେ। ୧୯୯୯ରେ ସେ ନିଜର ପ୍ରାକ୍ଟିସ୍ ସ୍ୱାଧୀନ ଭାବେ ଆରମ୍ଭ କରିଥିଲେ ଏବଂ ୨୦୦୧ର ସଂସଦ ହମଲା, କାବେରୀ ଜଳ ବିବାଦ ଓ ଅନେକ ବଡ଼ ବଡ଼ ମାମଲାରେ ନିଜର ଆଇନଗତ ଦକ୍ଷତା ପ୍ରମାଣିତ କରିଥିଲେ। ସେ ୧୯୯୯ରେ ବିଚାରପତି ଜେଏସ୍ ବର୍ମା ଆୟୋଗ ସହ ମଧ୍ୟ ଯୋଡ଼ି ରହି ଥିଲେ ଏବଂ ୨୦୧୨ର ଦିଲ୍ଲୀ ଗଣଦୁଷ୍କର୍ମ ମାମଲାରେ ମଧ୍ୟ ସ୍ୱତନ୍ତ୍ର ସରକାରୀ ଓକିଲ ଭାବେ ସରକାରଙ୍କ ପକ୍ଷରୁ ଉପସ୍ଥିତ ହୋଇଥିଲେ।
ଏବେ ତହବୁର ରାଣାର କେସ୍ରେ ଦୟାନ କୃଷ୍ଣନଙ୍କ ସହ ସ୍ୱତନ୍ତ୍ର ପବ୍ଲିକ୍ ପ୍ରସିକ୍ୟୁଟର ନରେନ୍ଦ୍ର ମାନ, ଓକିଲ ସଞ୍ଜୀବୀ ଶେଷାଦ୍ରୀ ଓ ଶ୍ରୀଧର କାଲେ ମଧ୍ୟ ଉପସ୍ଥିତ ରହିବେ। କେନ୍ଦ୍ର ସରକାର ଏହି ମୋକଦମା ପାଇଁ ନରେନ୍ଦ୍ର ମାନଙ୍କୁ ସ୍ୱତନ୍ତ୍ର ସରକାରୀ ଓକିଲ ଭାବେ ନିଯୁକ୍ତ କରିଛନ୍ତି। ଏହି ଟିମ୍ କେବଳ ରାଣା ବିରୁଦ୍ଧରେ ଦୃଢ ପ୍ରମାଣ ଉପସ୍ଥାପିତ କରିବେ ନାହିଁ , ଏହାସହ ଏହା ମଧ୍ୟ ସ୍ପଷ୍ଟ କରିବେ ଯେ , ଏହି ଜଘନ୍ୟ ଆତଙ୍କୀ ହମଲାର ଦୋଷୀକୁ ଯଥା ସମ୍ଭବ କଠୋର ସଜା ଦିଆଯାଇ ପାରିବ। ଅନ୍ୟପଟେ ଓକିଲ ପିୟୁଷ ସଚଦେବଙ୍କୁ ରାଣାର ଓକିଲ ଭାବେ ନିଯୁକ୍ତ କରାଯାଇଛି। ଏନଆଇଏ କୋର୍ଟରେ ସଚଦେବ ରାଣାର ପକ୍ଷ ରଖିବେ।
