ଚେନ୍ନାଇ,୧୮/୦୬: ନିକଟରେ ଶେଷ ହୋଇଥିବା ଲୋକସଭା ନିର୍ବାଚନରେ ତାମିଲନାଡୁରେ ଏଆଇଏଡିଏମ୍କେ ଗୋଟିଏ ହେଲେ ଆସନ ଜିତିପାରିନାହିଁ । ଦଳ ୩୨ଟି ଆସନରେ ଲଢ଼ିଥିଲା ବେଳେ ସବୁ ଆସନରେ ପରାଜୟ ବରଣ କରିବାକୁ ପଡିଥିଲା । ଯାହାକୁ ସହଜରେ ଗ୍ରହଣ କରିପାରିନାହାନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ଦଳର ମୁଖ୍ୟ ସ୍ୱର୍ଗତ ଜେ. ଜୟଲଳିତାଙ୍କ ବାନ୍ଧବୀ ଭି.କେ ଶଶୀକଳା । ସେ ପୁଣି ରାଜନୀତିକୁ ଫେରିବେ ବୋଲି ଘୋଷଣା କରିଛନ୍ତି । କହିଛନ୍ତି ଏଆଇଏଡିଏମ୍କେ କାହାଣୀର ଅନ୍ତ ଘଟିନାହିଁ । ଏବେ ତାଙ୍କର ରାଜନୈତିକ କ୍ୟାରିଅର ଆରମ୍ଭ ହୋଇଛି । ଦଳକୁ ପୁଣିଥରେ ଠିଆ କରାଇବେ ଏବଂ ରାଜ୍ୟରେ କ୍ଷମତାସୀନ ମଧ୍ୟ କରାଇବେ ।
ଚେନ୍ନାଇ ଠାରେ ଦଳୀୟ କାର୍ଯ୍ୟକର୍ତ୍ତାଙ୍କୁ ସମ୍ବୋଧନ କରିବା ଅବସରରେ ସେ କହିଛନ୍ତି ଆଗାମୀ ୨୦୨୬ ବିଧାନସଭା ନିର୍ବାଚନରେ ରାଜ୍ୟରେ ନିଶ୍ଚିତ ଭାବେ ଏଆଇଏଡିଏମ୍କେ କ୍ଷମତାସୀନ ହେବ । ରାଜ୍ୟରେ ପୁଣିଥରେ ଆମ୍ମା (ଜୟଲଳିତା)ଙ୍କ ସରକାର ବନିବ । ତାହା ପୁଣି ପୂର୍ଣ୍ଣ ବହୁମତର ସହିତ । ଏବେ ସମୟ ଆସିଯାଇଛି । ଚିନ୍ତା କରିବାର କୌଣସି କାରଣ ନାହିଁ । ତାମିଲନାଡୁର ଜନତା ତାଙ୍କୁ ନିଶ୍ଚିତ ଭାବେ ସମର୍ଥନ କରିବେ । ସେ ବର୍ତ୍ତମାନ ସମ୍ପୂର୍ଣ୍ଣ ମଜଭୁତ ଅଛନ୍ତି ବୋଲି କହିଛନ୍ତି । ଲୋକସଭା ନିର୍ବାଚନ ହାରିବା ସମ୍ପର୍କରେ ସେ କହିଛନ୍ତି କିଛି ସ୍ୱାର୍ଥପର ନେତାଙ୍କ ପାଇଁ ଦଳର ଏଭଳି ପରାଜୟ ଘଟିଛି । ସେ ସବୁକିଛି ନୀରବରେ ଦେଖିଆସୁଛନ୍ତି । ଏଆଇଏଡିଏମ୍କେର ପ୍ରତିଷ୍ଠାତା ଏମଜି ରାମଚନ୍ଦ୍ରନଙ୍କ ସିଦ୍ଧାନ୍ତର ଉଦାହରଣ ଦେଇ ଶଶୀକଳା କହିଛନ୍ତି ଏମ୍ଜିଆର ଲୋକଙ୍କୁ କ୍ଷମା କରିବା ଓ ସେମାନଙ୍କୁ ସାଥୀରେ ନେଇ ଚାଲିବା ଉପରେ ବିଶ୍ୱାସ କରିଥାନ୍ତି । ସେ ମଧ୍ୟ ଏହି ରାସ୍ତା ଗ୍ରହଣ କରିବେ ।
୨୦୧୬ ଡିସେମ୍ବର ୫ରେ ଜୟଲଳିତାଙ୍କ ମୃତ୍ୟୁ ପରେ ସେହିବର୍ଷ ଡିସେମ୍ବର ୨୯ରେ ଶଶୀକଳାଙ୍କୁ ଏଆଇଏଡିଏମ୍କେର ମହାସଚିବ ନିଯୁକ୍ତ କରାଯାଇଥିଲା । ତାଙ୍କୁ ମୁଖ୍ୟମନ୍ତ୍ରୀ ପଦ ପାଇଁ ୨୦୧୭ ଫେବ୍ରୁଆରୀରେ ମନୋନୀତ କରାଯାଇଥିଲା । କିନ୍ତୁ ଆୟବହିର୍ଭୂତ ସମ୍ପତ୍ତି ଠୁଳ ମାମଲାରେ ସୁପ୍ରିମକୋର୍ଟ ତାଙ୍କୁ ୪ ବର୍ଷ ଜେଲ୍ଦଣ୍ଡରେ ଦଣ୍ଡିତ କରିଥିଲେ । ଯାହାଫଳରେ ତାଙ୍କୁ ଜେଲ୍ ଯିବାକୁ ପଡିଥିଲା । ହେଲେ ଜେଲ୍ ଯିବା ପୂର୍ବରୁ ସେ ଦଳର ଅନ୍ୟତମ ବରିଷ୍ଠ ନେତା କେ. ପାଲାନିସ୍ୱାମୀଙ୍କୁ ମୁଖ୍ୟମନ୍ତ୍ରୀ ନିଯୁକ୍ତ କରିଥିଲେ । ହେଲେ ଦଳରେ କ୍ଷମତାକୁ ନେଇ ବିଦ୍ରୋହ ଦେଖିବାକୁ ମିଳିଥିଲା । ଶେଷରେ ୨୦୧୭ ସେପ୍ଟେମ୍ବରରେ ଶଶୀକଳାଙ୍କୁ ଦଳରୁ ବହିଷ୍କାର କରାଯାଇଥିଲା । ଏହା ବିରୋଧରେ ସେ କୋର୍ଟକୁ ଯାଇଥିଲେ ମଧ୍ୟ ବିଫଳ ହୋଇଥିଲେ ।
୨୦୨୧ ଜାନୁଆରୀରେ ସେ ଜେଲ୍ରୁ ମୁକ୍ତ ହୋଇଥିଲେ । ହେଲେ ତାଙ୍କର ମୁଖ୍ୟମନ୍ତ୍ରୀ ହେବାର ଆଶା ଅଧୁରା ରହିଗଲା । ସେହିବର୍ଷ ଅନୁଷ୍ଠିତ ବିଧାନସଭା ନିର୍ବାଚନରେ ଡିଏମ୍କେ କ୍ଷମତାକୁ ଫେରିଥିଲା । ଏହା ପରେ ୨୦୨୨ ଅକ୍ଟୋବରରେ ତାମିଲନାଡୁ ସରକାର ଜୟଲଳିତାଙ୍କ ମୃତ୍ୟୁ ରିପୋର୍ଟ ସାର୍ବଜନୀନ କରିଥିଲେ । ସେଥିରେ ଶଶୀକଳାଙ୍କ ଭୂମିକା ଉପରେ ସନ୍ଦେହ ପ୍ରକଟ କରାଯାଇଥିଲା । ତେଣୁ କମିଟି ପୁଣିଥରେ ମାମଲାର ପୁଙ୍ଖାନୁପୁଙ୍ଖ ତଦନ୍ତ କରିବା ଲାଗି ସରକାରଙ୍କୁ ସୁପାରିସ କରିଥିଲା
