ମୁମ୍ବାଇ ୨୯/୧୧: ଭିକି କୌଶଲଙ୍କ ଅପ୍କମିଙ୍ଗ୍ ଫିଲ୍ମ ‘ଛାବା’କୁ ନେଇ ବଲିଉଡ୍ରେ ଖାସ୍ ହଲଚଲ । ଅଲ୍ଲୁ ଅର୍ଜୁନ୍ ଷ୍ଟାରର୍ ‘ପୁଷ୍ପା-୨’ ସହ ଫିଲ୍ମଟି ରିଲିଜ୍ ହେବା ଖବର ଆସିବା ପରଠୁ ‘ଛାବା’ର ବକ୍ସ ଅଫିସ୍ କଲେକ୍ସନ୍କୁ ନେଇ ଇଣ୍ଡଷ୍ଟ୍ରିରେ ଚର୍ଚ୍ଚା ହେଉଛି । କାରଣ ଅଲ୍ଲୁଙ୍କ ଅଭିନୀତ ‘ପୁଷ୍ପା’ ବ୍ଲକ୍ବଷ୍ଟର ହୋଇଥିଲା । ଏହାର ସିକ୍ୱେଲକୁ ଦର୍ଶକ ଚାତକ ପରି ଚାହିଁଛନ୍ତି । କିନ୍ତୁ ତାଜା ଖବର ଅନୁସାରେ, ‘ଛାବା’ର ନିର୍ମାତା ଫିଲ୍ମର ରିଲିଜ୍ ତାରିଖ ଘୁଞ୍ଚାଇ ଦେଇଛନ୍ତି । ମାତ୍ର ସପ୍ତାହ ପରେ ଫିଲ୍ମ ରିଲିଜ୍ ହେବାକୁ ଯାଉଥିବାବେଳେ ନିର୍ମାତାଙ୍କ ଏହି ନିଷ୍ପତ୍ତି ଦର୍ଶକଙ୍କୁ ଚକିତ କରିଛି ।
ସିନେ ସମୀକ୍ଷକ ତରନ ଆଦର୍ଶ ସୋସିଆଲ ମିଡିଆରେ ଏକ ପୋଷ୍ଟ୍ ଶେୟାର କରିଛନ୍ତି । ଏଥିରେ ସେ କହିଛନ୍ତି, ଭିକିଙ୍କ ‘ଛାବା’ ଆସନ୍ତା ବର୍ଷ ଫେବ୍ରୁଆରୀ ୧୪ ତାରିଖରେ ରିଲିଜ୍ ହେବ । ଫେବ୍ରୁଆରୀ ୧୯ ତାରିଖରେ ଛତ୍ରପତି ଶିବାଜୀ ମହାରାଜଙ୍କ ଜୟନ୍ତୀ ଥିବାରୁ ରିଲିଜ୍ ତାରିଖର ବିଶେଷତ୍ୱ ରହିଛି । ଐତିହାସିକ ଡ୍ରାମା ‘ଛାବା’ ଏକ ବାୟୋପିକ୍ । ଏହାର କାହାଣୀ ଛତ୍ରପତି ଶିବାଜୀ ମହାରାଜଙ୍କ ପୁଅ ଛତ୍ରପତି ଶମ୍ଭାଜୀ ମହାରାଜଙ୍କ ଜୀବନ ଉପରେ ପର୍ଯ୍ୟବସିତ । ନୂଆ ରିଲିଜ୍ ତାରିଖ ‘ଛାବା’ ପାଇଁ ଗେମ୍ ଚେଞ୍ଜର୍ ହୋଇପାରେ । ଆସନ୍ତା ଡିସେମ୍ବର ୬ ତାରିଖରେ ‘ପୁଷ୍ପା-୨’ ସହିତ ‘ଛାବା’ ରିଲିଜ୍ ହୋଇଥାନ୍ତା । ପରେ ପୁଷ୍ପା ନିର୍ମାତା ଦିନକ ଆଗରୁ ଅର୍ଥାତ୍ ୫ ତାରିଖରେ ଫିଲ୍ମ ରିଲିଜ୍ ଘୋଷଣା କଲେ । ଲକ୍ଷ୍ମଣ ଉତେକରଙ୍କ ନିର୍ଦ୍ଦେଶିତ ‘ଛାବା’ର ଟିଜର ରିଲିଜ୍ ହୋଇସାରିଛି । ଉଭୟ ‘ଛାବା’ ଓ ‘ପୁଷ୍ପା-୨’ର ମୁଖ୍ୟ ନାୟିକା ଭୂମିକାରେ ନଜର ଆସିବେ ରଶ୍ମିକା ମନ୍ଦନା । ‘ଛାବା’ରେ ସେ ଛତ୍ରପତି ଶମ୍ଭାଜୀଙ୍କ ପତ୍ନୀ ୟେସୁବାଈ ଭୋସଲେ ଭୂମିକା ନିର୍ବାହ କରିବେ । ‘ପୁଷ୍ପା୨’ରେ ପୁଷ୍ପରାଜର ଶ୍ରୀବଲ୍ଲୀ ଭୂମିକାରେ ପୁଣି ଥରେ ନଜର ଆସିବେ ।
