ନୂଆଦିଲ୍ଲୀ: ନରଓ୍ବେର ଯୁବରାଣୀ ମେଟେ ମ୍ୟାରିଟଙ୍କ ବଡ଼ ପୁଅକୁ ପୁଣି ଥରେ ପୋଲିସ ଗିରଫ କରିଛି । ଏଥର ଦୁଷ୍କର୍ମ ଅଭିଯୋଗରେ ମାରିୟସ୍‌ ବୋର୍ଗ ହୋଇବିଙ୍କୁ ସୋମବାର ବାନ୍ଧିଛି ପୋଲିସ । ସେ ନରଓ୍ବେ ରାଜବଂଶର ଉତ୍ତରାଧିକାରୀ ଯୁବରାଜ ହ୍ୟାକନଙ୍କ ସାବତ ପୁଅ ଏବଂ ଯୁବରାଣୀ ମେଟ-ମ୍ୟାରିଟ ଓ ତାଙ୍କ ପୂର୍ବତନ ସାଥିଙ୍କ ପୁଅ । ତେବେ ମାରିୟସ୍‌ ବୋର୍ଗ ହୋଇବିଙ୍କୁ ରାଜ ପରିବାରରେ କୌଣସି ଉପାଧି କିମ୍ବା ଦାୟିତ୍ବ ମିଳିନାହିଁ । ମାରିୟସ୍‌ ବୋର୍ଗ ହୋଇବି ସମ୍ଭବତଃ ନିସ୍ତେଜ ଅବସ୍ଥାରେ ଥିବା କିମ୍ବା ତାଙ୍କୁ ପ୍ରତିରୋଧ କରିପାରି ନଥିବା ଜଣେ ମହିଳାଙ୍କ ସହ ଶାରୀରିକ ସଂପର୍କ ସ୍ଥାପନ କରିଥିଲେ ବୋଲି ପୋଲିସ କହିଛି ।

ଦୁଷ୍କର୍ମ ଘଟଣାଟି କେଉଁଠି ଘଟିଥିଲା ସେନେଇ ପୋଲିସ କିଛି କହିନାହିଁ । ଅନ୍ୟ ଏକ ମିଡିଆ ରିପୋର୍ଟ ଅନୁସାରେ, ଦୁଷ୍କର୍ମ ଅଭିଯୋଗକୁ ଖଣ୍ଡନ କରିଛନ୍ତି ମାରିୟସ୍‌ ବୋର୍ଗ ହୋଇବି । ଦୁଷ୍କର୍ମ ପୀଡ଼ିତାଙ୍କ ଓକିଲ ହେଜେ ସାଲୋମନ କହିଛନ୍ତି, ମହିଳାଜଣଙ୍କ ଅତି କଷ୍ଟରେ ଅଛନ୍ତି । ସେପଟେ ମହିଳାଙ୍କ ପରିଚୟ ମିଳିପାରି ନାହିଁ । ମାରିୟସ୍‌ ବୋର୍ଗ ହୋଇବିଙ୍କ ମାମଲାରେ ରାଜ ପରିବାର ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ  । 

ଏହା ପୂର୍ବରୁ ଅଗଷ୍ଟ ୪ରେ ଓସଲୋରେ ଉପଦ୍ରବ କରିଥିବା ଅଭିଯୋଗରେ ମାରିୟସ୍‌ ବୋର୍ଗ ହୋଇବିଙ୍କୁ ପୋଲିସ ଅଟକ ରଖିଥିଲା ଏବଂ ପରେ ତାଙ୍କୁ ଜାମିନ ମିଳିଯାଇଥିଲା । ଏହା ବ୍ୟତୀତ ମାରିୟସ୍‌ ବୋର୍ଗ ହୋଇବିଙ୍କ ବିରୋଧରେ ଅନେକ ମାମଲା ରହିଛି । ସେ ବହୁ ନିର୍ଦ୍ଦେଶକୁ ଅବମାନନା କରିଥିଲେ ଏବଂ ଡ୍ରାଇଭିଂ ଲାଇସେନ୍ସ ବିନା  ଗାଡ଼ି ଚଳାଇ ଫସିଥିଲେ । ନରଓ୍ବେ ରାଜ ପରିବାର ବେଶ ଲୋକପ୍ରିୟ ହୋଇଥିବାରୁ ଏହି ଖବରଟି ଖୁବ ଚର୍ଚ୍ଚା ସାଉଁଟିଥିଲା ।  ୨୭ ବର୍ଷୀୟ ବୋର୍ଗ ହୋଇବି ରାଜ ଦମ୍ପତିଙ୍କ ସହ ରହୁଛନ୍ତି । ୨୦୦୧ରେ ଭବିଷ୍ୟତର ମହାରାଣୀ ମେଟ-ମ୍ୟାରିଟ(ବୋର୍ଗ ହୋଇବିଙ୍କ ମା’) ଯୁବରାଜ ହ୍ୟାକନଙ୍କୁ ବିବାହ କରି ଚର୍ଚ୍ଚାକୁ ଆସିଥିଲେ । ସେ ସିଙ୍ଗଲ ମଦର ହୋଇଥିବା ବେଳେ ଜଣେ ସାଥିଙ୍କ ସହ ଜୀବନ ବିତାଉଥିଲେ । ତାଙ୍କର ଏହି ସାଥି ଡ୍ରଗ୍ସ ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ ।