ନୂଆଦିଲ୍ଲୀ,୧୧।୮: ଦିଲ୍ଲୀରେ ବୁଲା କୁକୁରଙ୍କ ପ୍ରାଦୃଭାବ ବଢି ଚାଲିଛି। ଏହାକୁ ଦୃଷ୍ଟିରେ ରଖି ବୁଲା କୁକୁରଙ୍କୁ ଆୟତ୍ତ କରିବାକୁ ସୁପ୍ରିମକୋର୍ଟଙ୍କ ବଡ଼ ଆକ୍ସନ। ଏବେ ରାସ୍ତାଘାଟରେ ମନଇଛା ବୁଲି ପାରିବେନି କୁକୁର। କାରଣ ବୁଲା କୁକୁରଙ୍କ କାମୁଡାରେ ଅନେକଙ୍କ ମୃତ୍ୟୁ ହେଉଛି। ତେଣୁ ତାଙ୍କ ପାଇଁ ତିଆରି ହେବ ସ୍ବତନ୍ତ୍ର ସେଲ୍ଠର ହୋମ୍। ଆଉ ଏହି କାମ ପାଇଁ କୌଣସି ବ୍ୟକ୍ତି କିମ୍ବା ସଂଗଠନ ବାଧା ପକାଇବାକୁ ଚେଷ୍ଟା କଲେ ତାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୁପ୍ରିମକୋର୍ଟ କହିଛନ୍ତି ।
ମାମଲାର ଗମ୍ଭୀରତାକୁ ଦେଖି ସୁପ୍ରିମକୋର୍ଟ ଦିଲ୍ଲୀ ସରକାର ଓ ମ୍ୟୁନିସିପାଲିଟିକୁ କଡା ନିର୍ଦେଶ ଦେଇଛନ୍ତି। ଖୁବଶୀଘ୍ର ସବୁ ଅଞ୍ଚଳରୁ ବୁଲା କୁକୁରଙ୍କୁ ଉଠାଇ ନେଇ ତାଙ୍କୁ ସ୍ବତନ୍ତ୍ର ଭାବରେ ନିର୍ମିତ ସେଲ୍ଟର ହୋମ୍ରେ ରଖାଯାଉ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି । ଯଦି ଏଥିରେ କୌଣସି ସଂସ୍ଥା କିମ୍ବା ବ୍ୟକ୍ତି ହସ୍ତକ୍ଷେପ କରନ୍ତି ତେବେ ତାଙ୍କ ବିରୋଧରେ ଆକ୍ସନ ନିଆଯିବ। ଏହା ସହ କୋର୍ଟ ପ୍ରଶ୍ନ କରିଛନ୍ତି, କ’ଣ ଏଭଳି ଲୋକ ତାଙ୍କୁ ଫେରାଇ ପାରିବେ, ଯେଉଁ ଲୋକେ ରାବିସ୍ର ଶିକାର ହୋଇଛନ୍ତି ? ଜଷ୍ଟିସ ଜେବି ପାଦରିଓ୍ବାଲ ଓ ଜଷ୍ଠିସ୍ ଆର ମହାଦେବନ୍ଙ୍କୁ ନେଇ ଗଠିତ ଖଣ୍ଡପୀଠ ଆଜି ଏହି ମାମଲାର ଶୁଣାଣି କରିଛନ୍ତି। ଖଣ୍ଡପୀଠ କହିଛନ୍ତି, ବର୍ତ୍ତମାନ ପ୍ରାୟ ୫ ହଜାର ବୁଲା କୁକୁରଙ୍କ ପାଇଁ ସେଲ୍ଟର ହୋମ୍ ତିଆରି କରାଯିବା ଦରକାର। କୁକୁର ବନ୍ଧ୍ୟାକରଣ ଏବଂ ଟୀକାକରଣ ପାଇଁ ପର୍ଯ୍ୟାପ୍ତ ସଂଖ୍ୟାରେ କର୍ମଚାରୀ ମୁତୟନ କରାଯିବା ଦରକାର। ବୁଲା କୁକୁରଙ୍କୁ ଡଗ୍ ସେଲ୍ଟର ହୋମରେ ରଖାଯାଉ। ତାଙ୍କୁ ସଡକ, କଲୋନୀ ଓ ସାର୍ବଜନୀନ ସ୍ଥାନରେ ଛଡା ନଯାଉ।
ସୁପ୍ରିମକୋର୍ଟ ୨୮ ଜୁଲାଇରେ ଦିଲ୍ଲୀରେ କୁକୁର କାମୁଡା ଦ୍ବାରା ରାବିଜ୍ ବ୍ୟାପିବା ନେଇ ମିଡିଆ ରିପୋର୍ଟ ଉପରେ ଶୁଣାଣି କରିଥିଲେ। ସର୍ବୋଚ୍ଚ ନ୍ୟାୟାଳୟ ଅଧିକାରୀଙ୍କୁ ସପ୍ତାହେ ଭିତରେ ହେଲପଲାଇନ୍ ତିଆରି କରିବାକୁ ନିର୍ଦେଶ ଦେଇଛନ୍ତି। ସୁପ୍ରିମକୋର୍ଟ ଦିଲ୍ଲୀ ସରକାର, ମ୍ୟୁନିସିପାଲିଟି ଓ ଏନ୍ଡିଏମ୍ସିଙ୍କୁ ଦିଲ୍ଲୀରୁ କୁକୁର ହଟାଇବାର କାମ ଆରମ୍ଭ କରିବାକୁ କହିଛନ୍ତି। କୋର୍ଟ ଏହା ମଧ୍ୟ କହିଛନ୍ତି ନବଜାତ ଓ ଛୋଟ କୁକୁର ଛୁଆକୁ ଛାଡି ଅନ୍ୟ କୁକୁରକୁ ଧରାଯାଉ। ଧରିବା ପରେ ପୁଣିଥରେ ତାଙ୍କୁ ଛଡା ନଯାଉ। ସେଲ୍ଟର ହୋମ୍କୁ ସିସିଟିଭି ସର୍ଭିଲାନ୍ସରେ ସବୁବେଳେ ରଖାଯିବା ଦରକାର। ଫଳରେ ଯେପରି କୁକୁରମାନେ ବାହାରକୁ ନଯିବେ।
