ନୂଆଦିଲ୍ଲୀ: ବିହାରରେ ମୌସୁମୀ ବର୍ଷା ଯୋଗୁଁ ସୃଷ୍ଟି ହୋଇଥିବା ବନ୍ୟା ସ୍ଥିତି ଗମ୍ଭୀର ହୋଇପଡ଼ିଛି। ଭାରତର ବିଭିନ୍ନ ଅଞ୍ଚଳ ମଧ୍ୟରେ ବିହାର ସବୁଠାରୁ ଅଧିକ ପ୍ରଭାବିତ ହୋଇଛି। ସେଣ୍ଟିନେଲ-୨ ଉପଗ୍ରହ ଡାଟା ଆଧାରରେ ଜାତୀୟ ଗଣମାଧ୍ୟମ ଭାରତ ଟୁଡେ ଓ ଏସଆଇଏନଟି ଟିମ୍ ବିହାରରେ ବନ୍ୟା ପ୍ରଭାବିତ ଅଞ୍ଚଳଗୁଡ଼ିକର ସଠିକ ମାନଚିତ୍ର ପ୍ରସ୍ତୁତ କରିଛି। ଏହି ଚିତ୍ରଗୁଡ଼ିକରୁ ଜଣାପଡ଼ିଛି ଯେ ଗଙ୍ଗା ଏବଂ ଅନ୍ୟ ନଦୀଗୁଡ଼ିକ ବିପଦ ସ୍ତରକୁ ଅତିକ୍ରମ କରି ବନ୍ଧ ଭାଙ୍ଗି ବନ୍ୟା ସୃଷ୍ଟି କରିଛନ୍ତି।
ବିହାରରେ ପ୍ରବଳ ବର୍ଷା ଯୋଗୁଁ ପ୍ରାୟ ୧୭ ଲକ୍ଷ ଲୋକ ୧୦ଟି ଜିଲ୍ଲାରେ ପ୍ରଭାବିତ ହୋଇଛନ୍ତି। ଭୋଜପୁର, ପାଟନା, ଭାଗଲପୁର, ବୈଶାଳୀ, ଲଖିସରାଇ, ସାରଣ, ମୁଙ୍ଗେର, ଖଗଡ଼ିଆ, ସୁପୌଲ ଏବଂ ବେଗୁସରାଇ ଆଦି ଜିଲ୍ଲାଗୁଡ଼ିକରେ ନଦୀରେ ବନ୍ୟା ପାଣି ବିଲ ବାଡି ଆଦି ବୁଡାଇ ଦେଇଛି। ଭାଗଲପୁର ଜିଲ୍ଲାରେ କୁରସେଲା, ବରାରୀ, ମଣିହାରୀ, ଅମଦାବାଦ, ମନସାହୀ ଏବଂ ପ୍ରଣପୁର ଆଦି ଛଅଟି ବ୍ଲକ ସବୁଠାରୁ ଅଧିକ ପ୍ରଭାବିତ ହୋଇଛି। ପ୍ରାୟ ୫ ଲକ୍ଷ ଲୋକଙ୍କ ଘର ବନ୍ୟା ଘେରରେ ଫଶି ରହିଛନ୍ତି।
କେନ୍ଦ୍ରୀୟ ଜଳ ଆୟୋଗ (ସିଡବ୍ଲୁସି) ଅନୁଯାୟୀ, ଭାଗଲପୁର ଷ୍ଟେସନ ନିକଟରେରେ ଗଙ୍ଗା ନଦୀର ଜଳସ୍ତର ୩୪.୮୬ ମିଟରରେ ପହଞ୍ଚିଛି। ଯାହା ବିପଦ ସ୍ତର ୩୩.୬୮ ମିଟରଠାରୁ ଅଧିକ। କାହାଲଗାଓଁ ଏବଂ ଏକଚାରୀ ଅଞ୍ଚଳରେ ମଧ୍ୟ ସ୍ଥିତି ଗମ୍ଭୀର ରହିଛି।
ସେଣ୍ଟିନେଲ-୨ ଉପଗ୍ରହ ଚିତ୍ରରୁ ଦେଖାଯାଇଛି ଯେ ଭାଗଲପୁର ନିକଟ ଗଙ୍ଗା ନଦୀ ଅକବରନଗର, ତିଲକପୁର ଏବଂ ବେଲଥୁ ଅଞ୍ଚଳରେ ପ୍ରାୟ ୧୯ କିଲୋମିଟର ପର୍ଯ୍ୟନ୍ତ ବନ୍ୟା ପାଣି ମାଡି ଯାଇଛି। ବିହାରର ଚନ୍ଦନ ଅଞ୍ଚଳ ଏବଂ ଝାଡ଼ଖଣ୍ଡର ଇଚାଗଡ଼ ଅଞ୍ଚଳରେ ମଧ୍ୟ ବିସ୍ତୀର୍ଣ୍ଣ ଅଞ୍ଚଳ ଜଳମଗ୍ନ ହୋଇଛି। ଝାଡ଼ଖଣ୍ଡର ସାହେବଗଞ୍ଜ ଜିଲ୍ଲାରେ ଗଙ୍ଗା ବିପଦ ସ୍ତର ଅତିକ୍ରମ କରି ପ୍ରାୟ ୨୦,୦୦୦ ଲୋକଙ୍କୁ ପ୍ରଭାବିତ କରିଛି।
ବିହାର ବ୍ୟତୀତ ଉତ୍ତରପ୍ରଦେଶ, ଉତ୍ତରାଖଣ୍ଡ, ଆସାମ ଏବଂ ଝାଡ଼ଖଣ୍ଡରେ ମଧ୍ୟ ବନ୍ୟା ସ୍ଥିତି ଗମ୍ଭୀର ରହିଛି। ଉତ୍ତରପ୍ରଦେଶରେ ଗଙ୍ଗା, ଘାଗରା ଏବଂ ଯମୁନା ନଦୀ ବିପଦ ସ୍ତର ଉପରେ ପ୍ରବାହିତ ହେଉଛି। ଆସାମରେ ବ୍ରହ୍ମପୁତ୍ର ଏବଂ ପଶ୍ଚିମବଙ୍ଗରେ ଇଚାମତୀ ନଦୀ ମଧ୍ୟ ବିପଦ ସ୍ତର ଅତିକ୍ରମ କରିଛି।
ଭାରତୀୟ ପାଣିପାଗ ବିଭାଗ (ଆଇଏମଡି) ସିକିମ, ଆସାମ ଏବଂ ମେଘାଳୟ ପାଇଁ ରେଡ ଆଲର୍ଟ ଏବଂ ବିହାର, ହିମାଚଳ ପ୍ରଦେଶ ଏବଂ ଅରୁଣାଚଳ ପ୍ରଦେଶ ପାଇଁ ଅରେଞ୍ଜ ଆଲର୍ଟ ଜାରି କରିଛି। ଏହା ସୂଚାଏ ଯେ ଆଗାମୀ ଦିନରେ ମଧ୍ୟ ପ୍ରବଳ ବର୍ଷା ଜାରି ରହିପାରେ।
ବିହାର ସରକାର ଏବଂ କେନ୍ଦ୍ରୀୟ ଜଳ ଆୟୋଗ ବନ୍ୟା ନିୟନ୍ତ୍ରଣ ପାଇଁ କାର୍ଯ୍ୟ ଜାରି ରଖିଛନ୍ତି। ରାଷ୍ଟ୍ରୀୟ ବିପର୍ଯ୍ୟୟ ନିରାକରଣ ବଳ (ଏନଡିଆରଏଫ) ଏବଂ ରାଜ୍ୟ ବିପର୍ଯ୍ୟୟ ନିରାକରଣ ବଳ (ଏସଡିଆରଏଫ) ଉଦ୍ଧାର ଓ ରିଲିଫ କାର୍ଯ୍ୟରେ ନିୟୋଜିତ ଅଛନ୍ତି।
ଏହି ସଙ୍କଟ ସମୟରେ ସରକାର ଏବଂ ସ୍ଥାନୀୟ ପ୍ରଶାସନ ପ୍ରଭାବିତ ଅଞ୍ଚଳରେ ରିଲିଫ କ୍ୟାମ୍ପ ସ୍ଥାପନ କରିଛନ୍ତି। ଯେଉଁଠାରେ ଲୋକମାନଙ୍କୁ ଖାଦ୍ୟ, ପାନୀୟ ଜଳ ଏବଂ ଅନ୍ୟାନ୍ୟ ଆବଶ୍ୟକ ସାମଗ୍ରୀ ଯୋଗାଇ ଦିଆଯାଉଛି।
ବିହାରରେ ବନ୍ୟା ସ୍ଥିତି ଏବେ ମଧ୍ୟ ଗମ୍ଭୀର ରହିଛି। ଉପଗ୍ରହ ଚିତ୍ର ଏବଂ ସରକାରୀ ରିପୋର୍ଟ ଅନୁଯାୟୀ, ସ୍ଥିତି ନିୟନ୍ତ୍ରଣ ପାଇଁ ସମସ୍ତ ପ୍ରକାର ପ୍ରୟାସ କରାଯାଉଛି। ପାଣିପାଗ ବିଭାଗର ଚେତାବନୀକୁ ଦୃଷ୍ଟିରେ ରଖି ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି।
