ନୂଆଦିଲ୍ଲୀ: ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ (HAL) ର ନାସିକ ୟୁନିଟ ପ୍ରଥମ ଲାଇଟ କମ୍ବାଟ ଏୟାରକ୍ରାଫ୍ଟ (LCA) ତେଜସ Mk1A ପାଇଁ ଫ୍ଲାଇଟ କ୍ଲିୟରାନ୍ସ ପାଇଛି। ଏହା ଭାରତୀୟ ବାୟୁସେନା (IAF) ପାଇଁ ତେଜସ Mk1A ର ବିତରଣକୁ ତ୍ୱରାନ୍ୱିତ କରିବ। ଯାହା ପୁରୁଣା ମିଗ-୨୧ ଯୁଦ୍ଧବିମାନକୁ ବଦଳାଇବା ପାଇଁ ଡିଜାଇନ କରାଯାଇଛି।

ନାସିକରେ ଥିବା HAL ୟୁନିଟ ତେଜସ Mk1A ପାଇଁ ଫ୍ଲାଇଟ କ୍ଲିୟରାନ୍ସ ପାଇଛି। ଯାହା ପରୀକ୍ଷଣ ଓ ପ୍ରମାଣୀକରଣ ପରେ ବିତରଣ ପାଇଁ ପ୍ରସ୍ତୁତିକୁ ସୂଚାଇଛି। ଏହି ସୁବିଧା ବେଙ୍ଗାଲୁରୁରେ ଥିବା ଦୁଇଟି ଉତ୍ପାଦନ ଲାଇନକୁ ସମର୍ଥନ କରୁଛି ଏବଂ ବାର୍ଷିକ ୮ଟି ତେଜସ Mk1A ଉତ୍ପାଦନ କରି ମୋଟ ଉତ୍ପାଦନକୁ ୧୬ରୁ ୨୪କୁ ବୃଦ୍ଧି କରିଛି। ତେଜସ Mk1A ରେ AESA ରାଡାର, ଇଲେକ୍ଟ୍ରୋନିକ ୱାରଫେୟାର ସୁଟ, ଅସ୍ତ୍ର ମିସାଇଲ ଏବଂ ଏୟାର-ଟୁ-ଏୟାର ରିଫ୍ୟୁଏଲିଂ ଭଳି ଆଧୁନିକ ସାମରିକ ପ୍ରଣାଳୀ ରହିଛି।

ଜେନେରାଲ ଇଲେକ୍ଟ୍ରିକରୁ ଏଫ୪୦୪ ଇଞ୍ଜିନ ଯୋଗାଣରେ ବିଳମ୍ବ ହେତୁ ବିତରଣ ଜୁନ ୨୦୨୫ ପର୍ଯ୍ୟନ୍ତ ପଛେଇ ଯାଇଥିଲା। ବର୍ତ୍ତମାନ ଇଞ୍ଜିନ ଯୋଗାଣ ସ୍ଥିର ହେବାରୁ HAL ଜୁନ ୨୦୨୫ ସୁଦ୍ଧା ପ୍ରଥମ ବିମାନ ବିତରଣ କରିବ ବୋଲି ଅନୁମାନ କରାଯାଉଛି। IAF ସମୁଦାୟ ୮୩ଟି ତେଜସ Mk1A ଫାଇଟର ଜେଟ ପାଇଁ ୪୮,୦୦୦ କୋଟି ଟଙ୍କାର ଚୁକ୍ତି ସ୍ୱକ୍ଷରିତ କରିଛି। ଏହା ସହିତ ଆହୁରି ୯୭ଟି ଅତିରିକ୍ତ ବିମାନ ପାଇଁ ମଧ୍ୟ ୬୭,୦୦୦ କୋଟି ଟଙ୍କାର ଅର୍ଡର ବର୍ତ୍ତମାନ ବିଚାରାଧୀନ ରହିଛି। ତେବେ HAL ୨୦୩୧ ସୁଦ୍ଧା ୧୮୦ଟି ବିମାନ ବିତରଣ କରିବ ବୋଲି ଘୋଷଣା କରିଛି।

ତେଜସ Mk1A ଫାଇଟର ଜେଟ ଭାରତର ‘ଆତ୍ମନିର୍ଭର ଭାରତ’ ଅଭିଯାନର ଏକ ଅଂଶ। ଯେଉଁଥିରେ ୬୫% ରୁ ଅଧିକ ଉପାଦାନ ସ୍ୱଦେଶୀ ଜ୍ଞାନ କୌଶଳରେ ବିକାଶ କରାଯାଇଛି। ବିଳମ୍ବ ସତ୍ତ୍ୱେ IAF ର ୩୧ ସ୍କ୍ୱାଡ୍ରନକୁ ଶକ୍ତିଶାଳୀ କରିବା ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଚୁକ୍ତି। HAL ୨୦୨୮ ସୁଦ୍ଧା ୮୩ଟି ଫାଇଟର ଜେଟ ଯୋଗାଇ ଦେବାକୁ ଲକ୍ଷ୍ୟ ରଖିଛନ୍ତି। ଯାହା ଭାରତୀୟ ବାୟୁସେନାର ଆଧୁନିକୀକରଣ ଓ ସ୍ୱଦେଶୀ ପ୍ରତିରକ୍ଷା ଉତ୍ପାଦନକୁ ଆଗେଇ ନେବ ବୋଲି ବିଶେଷଜ୍ଞମାନେ ମତ୍ତ ପ୍ରକାଶ କରିଛନ୍ତି।