ନୂଆଦିଲ୍ଲୀ, ୩୦/୦୭: ରୁଷ୍ର ଉପକୂଳବର୍ତ୍ତୀ ଅଞ୍ଚଳ କାମଚଟକାରେ ବୁଧବାର ସକାଳେ ଭୂକମ୍ପ ଅନୁଭୂତ ହୋଇଛି । ଯାହାର ତୀବ୍ରତା ରିକ୍ଟର ସ୍କେଲ୍ରେ ୮.୭ ରେକର୍ଡ କରାଯାଇଛି । ବର୍ତ୍ତମାନ ସୁଦ୍ଧା କୌଣସି କ୍ଷୟକ୍ଷତିର ରିପୋର୍ଟ ମିଳିନି । ୟୁଏସ ଜିୟୋଲୋଜିକାଲ ସର୍ଭେ (USGS) ଅନୁଯାୟୀ, ଏହି ଭୂମିକମ୍ପ ସମୁଦ୍ର ତଳେ ହୋଇଥିଲା, ଯାହା ପରେ ଜାପାନ ଏବଂ ଆମେରିକାର ଏଜେନ୍ସିମାନେ ସୁନାମୀ ଆଲର୍ଟ ଜାରି କରିଛନ୍ତି । ୟୁଏସ ଜିୟୋଲୋଜିକାଲ ସର୍ଭେ ଅନୁଯାୟୀ, ଏହି ଭୂକମ୍ପର କନ୍ଦ୍ରସ୍ଥଳୀ ଭୂପୃଷ୍ଠରୁ ଅତ୍ୟନ୍ତ କମ୍ ଗଭୀରତାରେ ଥିଲା । ଯାହା ପ୍ରାୟ ୧୯.୩ କିଲୋମିଟର ରହିଥିଲା । ଯାହା ଭୂପୃଷ୍ଠରେ ଶକ୍ତିଶାଳୀ ଭୂମିକମ୍ପ ଏବଂ ସୁନାମୀ ସମ୍ଭାବନାକୁ ବୃଦ୍ଧି କରିଛି ।
ସମାଚାର ଏଜେନ୍ସି ରୟଟର୍ସ ଅନୁଯାୟୀ, ଜାପାନର ଉପକୂଳବର୍ତ୍ତୀ ଅଞ୍ଚଳରେ ୧ ମିଟର ଉଚ୍ଚତାର ଜୁଆର ଆସିବାର ସମ୍ଭାବନା ରହିଛି । ଜାପାନର ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କୁ ଏହି ପରିସ୍ଥିତି ବିଷୟରେ ଅବଗତ କରାଯାଇଛି ଏବଂ ସରକାର ଏକ ଜରୁରୀକାଳୀନ ବୈଠକ ଡାକି ରିଲିଫ ଏବଂ ଉଦ୍ଧାର କାର୍ଯ୍ୟ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ଜୁଲାଇ ମାସ ପୂର୍ବରୁ କାମଚଟକା ପାଖରେ ସମୁଦ୍ରରେ ଅନେକ ଭୂକମ୍ପ ହୋଇଛି । ଯେଉଁଥିରୁ ଗୋଟିଏର ତୀବ୍ରତା ୭.୪ ଥିଲା ।
ଜାପାନରେ ଧ୍ୱଂସ ଆଣିପାରେ ସୁନାମୀ-
ଆମେରିକାର ସୁନାମୀ ଚେତାବନୀ କେନ୍ଦ୍ର ମଧ୍ୟ କହିଛି ଯେ, ଆଗାମୀ ୩ ଘଣ୍ଟା ମଧ୍ୟରେ ରୁଷ ଏବଂ ଜାପାନର କିଛି ସ୍ଥାନରେ ବିପଦପୂର୍ଣ୍ଣ ସୁନାମୀ ହୋଇପାରେ । ଏହା ଛଡ଼ା ଫିଲିପାଇନ୍ସ, ମାର୍ଶଲ ଆଇଲାଣ୍ଡସ, ପଲାଉ ଏବଂ ଅନ୍ୟ ଦ୍ୱୀପପୁଞ୍ଜରେ ମଧ୍ୟ ଅଳ୍ପ ମାତ୍ରାରେ ସୁନାମୀ ହେବାର ଆଶଙ୍କା ରହିଛି ।
ରୁଷ୍ର ରାଜ୍ୟପାଳ କହିଛନ୍ତି ଯେ, ବର୍ତ୍ତମାନ ସୁଦ୍ଧା କେହି ଆହତ ହୋଇଥିବାର ସୂଚନା ନାହିଁ । କିନ୍ତୁ ଏକ କିଣ୍ଡରଗାର୍ଡେନ କ୍ଷତିଗ୍ରସ୍ତ ହୋଇଛି । ସେ ଏହି ଭୂମିକମ୍ପକୁ ଦଶନ୍ଧିର ସବୁଠାରୁ ଶକ୍ତିଶାଳୀ ଭୂକମ୍ପ ବୋଲି କହିଛନ୍ତି ଏବଂ ଉପରୂଳବର୍ତ୍ତୀ ଅଞ୍ଚଳବାସୀଙ୍କୁ ତୁରନ୍ତ ସୁରକ୍ଷିତ ସ୍ଥାନକୁ ଯିବାକୁ କହିଛନ୍ତି ।
ଭୂକମ୍ପ ଏବଂ ସୁନାମୀର ବିପଦ ପରେ ରୁଷ୍ର ସଖାଲିନ ଅଞ୍ଚଳର ଛୋଟ ସହର ସେବେରୋ-କୁରୀଲ୍ସ୍କରୁ ଲୋକମାନଙ୍କୁ ସ୍ଥାନାନ୍ତର କରାଯାଉଛି । ପ୍ରଶାସନ ଯୁଦ୍ଧକାଳୀନ ଭିତ୍ତିରେ ଲୋକଙ୍କ ସୁରକ୍ଷା ସୁନିଶ୍ଚିତ କରିବାରେ ନିୟୋଜିତ ରହିଛି । ସଖାଲିନର ରାଜ୍ୟପାଳ ଏହା ସୁନିଶ୍ଚିତ କରିଛନ୍ତି । ସ୍ଥାନୀୟ ଅଧିକାରୀ ଲୋକଙ୍କୁ ସତର୍କ ରହିବା, ଜରୁରୀକାଳୀନ ନିର୍ଦ୍ଦେଶ ପାଳନ କରିବା ଏବଂ ଗୁଜବଠାରୁ ଦୂରେଇ ରହିବାକୁ ଅପିଲ କରିଛନ୍ତି ।
