ନୂଆଦିଲ୍ଲୀ,୨୧।୬: ଲୋକସଭାରେ ବିରୋଧି ଦଳ ନେତା ରାହୁଲ ଗାନ୍ଧୀ ଶନିବାର ପୁଣି ଥରେ ନିର୍ବାଚନ କମିଶନ ଉପରେ ଗମ୍ଭୀର ପ୍ରଶ୍ନ ଉଠାଇଛନ୍ତି। ଏହାର ସ୍ୱଚ୍ଛତା ଉପରେ ପ୍ରଶ୍ନ ଉଠାଇ ଅଭିଯୋଗ କରିଛନ୍ତି ଯେ ନିର୍ବାଚନ କମିଶନ ଜାଣିଶୁଣି ନିର୍ବାଚନ ସହିତ ଜଡିତ ଗୁରୁତ୍ୱପୂର୍ଣ୍ଣ ତଥ୍ୟ ନଷ୍ଟ କରିବାକୁ ଚେଷ୍ଟା କରୁଛନ୍ତି। ରାହୁଲ କହିଛନ୍ତି ଯେ ଯେତେବେଳେ କମିଶନଙ୍କ ଉତ୍ତର ଦେବା କାର୍ଯ୍ୟ. ସେତେବେଳେ ସେମାନେ ପ୍ରମାଣ ନଷ୍ଟ କରୁଛନ୍ତି। କାରଣ ନିର୍ବାଚନ କମିଶନ ନିର୍ବାଚନର ୪୫ ଦିନ ପରେ ସିସିଟିଭି, ୱେବକାଷ୍ଟିଂ ଏବଂ ଭିଡିଓ ଫୁଟେଜ୍ ନଷ୍ଟ କରିବାକୁ ତାଙ୍କ ଅଧିକାରୀମାନଙ୍କୁ ଗତ ମଇ ୩୦ ତାରିଖରେ ନିର୍ଦ୍ଦେଶ ଦେଇଛନ୍ତି।
ରାହୁଲ ନିର୍ବାଚନ କମିଶନଙ୍କ ଉପରେ ପ୍ରଶ୍ନ ଉଠାଇଛନ୍ତି। ସେ ସୋସିଆଲ ମିଡିଆ ସାଇଟ୍ ଏକ୍ସରେ ଲେଖିଛନ୍ତି ‘ଭୋଟର ଲିଷ୍ଟ ? ମେସିନ୍ ରିଡେବଲ ଫର୍ମାଟ ଦେବନି। ସିସିଟିଭି ଫୁଟେଜ୍ ? ଆଇନ ବଦଳାଇ ଲୁଚାଇ ଦେଲେ। ନିର୍ବାଚନ ଫଟୋ ଭିଡିଓ ? ଏବେ ବର୍ଷେ ନୁହେଁ ତାହା ୪୫ ଦିନରେ ନଷ୍ଟ କରିଦେବେ। ଯାହାଙ୍କଠାରୁ ଜବାବ୍ ଦରକାର ସେ ହିଁ ପ୍ରମାଣ ନଷ୍ଟ କରୁଛନ୍ତି। ସ୍ପଷ୍ଟ ଦେଖାଯାଉଛି ମ୍ୟାଚ ଫିକ୍ସିଂ ହେଉଛି। ଫିକ୍ସ କରାଯାଇଥିବା ନିର୍ବାଚନ ଲୋକତନ୍ତ୍ର ପାଇଁ ବିଷ।’ ରାହୁଲ ମହାରାଷ୍ଟ୍ର୍ର ବିଧାନସଭା ନିର୍ବାଚନରେ ଅନିୟମିତତାର ଅଭିଯୋଗ କରିଛନ୍ତି। ସେ ନିର୍ବାଚନରେ ଭୋଟରଲିଷ୍ଟ, ମତଦାତା ଡାଟା ଓ ଭିଡିଓ ଫୁଟେଜ ଦାବି କରୁଛନ୍ତି। ନିର୍ବାଚନ କମିଶନ ଏହାର ଜବାବ୍ରେ କହିଥିଲେ, ରାହୁଲ କେବଳ ଅଭିଯୋଗ କରୁଛନ୍ତି, କିନ୍ତୁ ଲିଖିତ ଅଭିଯୋଗ କରୁନାହାନ୍ତି।
ରାହୁଲଙ୍କ ଏହି ଅଭିଯୋଗ ନେଇ ନିର୍ବାଚନ କମିଶନ୍ ଜବାବ୍ ଦେଇଛନ୍ତି। ସେ କହିଛନ୍ତି, ନିର୍ବାଚନ କେନ୍ଦ୍ରର ଓ୍ବେବକାଷ୍ଟିଂ ଫୁଟେଜକୁ ସାର୍ବାଜନୀନ କରିବା ମତଦାତାଙ୍କ ଗୋପନୀୟତା ଓ ସୁରକ୍ଷା ପାଇଁ ବିପଦ। ଏଭଳି ଦାବୀ ଜନହିତ ଓ ଲୋକତାନ୍ତ୍ରିକ ବିଶ୍ବସ୍ଥତାର ସମର୍ଥନରେ ଲାଗିଥାଏ, କିନ୍ତୁ ବାସ୍ତବରେ ଏହାର ଉଦେଶ୍ୟ ଏହାର ବିପରୀତ ରହିଥାଏ।
