ପାରାଦୀପ,୭।୭(ଆପ୍ର): ବାଂଲାଦେଶରୁ ପଳେଇ ଆସିଥିବା ଗୋଟିଏ ପରିବାର ର ୪ ଜଣଙ୍କୁ ସୋମବାର ଉଠେଇ ନେଇଛି ପାରାଦୀପ ଲକ୍ ଥାନା ପୁଲିସ। ପାରାଦୀପ ଲକ୍ ଥାନା ଅର୍ନ୍ତଗତ ଜର୍ଦ୍ଦାରିପଡ଼ା ଅଞ୍ଚଳରେ ରହୁ ଥିବା ୪ ଜଣଙ୍କୁ ଉଠେଇ ନେଇ ଅଜ୍ଞାତ ସ୍ଥାନରେ ପୁଲିସ ରଖିଛି। କିନ୍ତୁ ସୁରକ୍ଷା ଦୃଷ୍ଟିରୁ ଏ ବିଷୟରେ ପାଟି ଖୋଲୁନି ପୁଲିସ । ସେମାନେ ଜର୍ଦ୍ଦାରିପଡ଼ାର ସୁଜନ ଗାଏନଙ୍କ ଘରେ ପ୍ରଥମେ ଆସି ରହୁଥିଲେ। କିଛି ଦିନ ରହିଲା ପରେ ଏବେ ସେମାନେ ରାମ ସାହୁଙ୍କ ଘରେ ଭଡାନେଇ ରହୁଛନ୍ତି।
ବାଂଲାଦେଶର ଖୁନଲା ଜିଲ୍ଲାର ଡ଼ାକପ ଥାନା ଅର୍ନ୍ତଗତ ବାଣିସାନ୍ତା ଅଞ୍ଚଳର ଏହି ପରିବାର ବୋଲି ସୁଜନ ଗାଏନଙ୍କ ସ୍ତ୍ରୀ କମଳା ଗାଏନ କହିଛନ୍ତି। କମଳା ଗାଏନଙ୍କ କହିବା ଅନୁସାରେ ସେମାନେ ବାଂଲାଦେଶ ରୁ ଗତ ମେ ମାସରେ ଲୁଚି ପଳେଇ ଆସି ପଶ୍ଚିମବଙ୍ଗର ପିଆଲିରେ ରହୁଥିଲେ।ସୁଜନ ଗାଏନଙ୍କ ଭଉଣୀ ଘର ହେଉଛି ପଶ୍ଚିମବଙ୍ଗ ପିଆଲି। ସୁଜନ ତାଙ୍କ ଭଉଣୀ ଘରକୁ ଯାଇଥିଲେ। ସେମାନଙ୍କ ସହ ସୁଜନ ଗାଏନଙ୍କ ପରିଚିତ ହୋଇଥିଲା। ତେଣୁ ସୁଜନ ଗାଏନଙ୍କ ସାଥିରେ ସେହି ବାଂଲାଦେଶର ୪ ଜଣ ସଦସ୍ୟ ପାରାଦୀପ ଆସିଥିଲେ। ସେମାନଙ୍କର ଏଠାରେ କୌଣସି କାଗଜପତ୍ର ହୋଇ ନ ଥିବା କମଳା କହିଛନ୍ତି।
ପୋଲିସ ଉଠେଇ ଆଣିଥିବା ବାଂଲାଦେଶର ୪ ଜଣ ସଦସ୍ୟ ମଧ୍ୟ ମାନୁ ଛନ୍ତି ଯେ ସେମାନେ ବାଂଲାଦେଶ ର ନାଗରିକ। ସୋମବାର ଅପରାହ୍ନ ରେ ଜଗତସିଂହପୁର ଉପଜିଲ୍ଲାପାଳ ପ୍ରଶାନ୍ତ ତରାଇଙ୍କ ଅଧ୍ୟକ୍ଷତାରେ କୁଜଙ୍ଗ ଭାରପ୍ରାପ୍ତ ତହସିଲଦାର ତଥା ପାରାଦୀପ ପୌର ନିର୍ବାହୀ ଅଧିକାରୀ ଅଭିଷେକ ପଣ୍ଡା,କୁଜଙ୍ଗ ଗୋଷ୍ଠୀ ଶିକ୍ଷା ଅଧିକାରୀ ମନୋଜ ବେହେରା,ବ୍ଲକ ସାମାଜିକ ସୁରକ୍ଷା ଅଧିକାରି ସ୍ୱାଗତିକା ମିଶ୍ର ଓ ସିଡିଏମଓ ଙ୍କ ପ୍ରତିନିଧି ଡଃ ବସନ୍ତ କୁମାର ରାଉତ,ପାରାଦୀପ ଲକ୍ ଥାନା ଅଧିକାରୀ ରଶ୍ମି ରଞ୍ଜନ ଦାଶ ସଦସ୍ୟ ମାନେ ଯାଞ୍ଚ କରିବା ସହ ଏକ ରିପୋର୍ଟ ଜିଲ୍ଲା କମିଟିକୁ ଦେଇଥିବା ସୂଚନା ମିଳିଛି। ପରେ ଏହାକୁ (ବିଏସଏଫ)କୁ ହସ୍ତାନ୍ତର କରାଯିବାର ନିୟମ ରହିଛି ବୋଲି ଏକ ବିଶେଷ ସୂତ୍ରରୁ ଜଣାପଡ଼ିଛି।
