ନୂଆଦିଲ୍ଲୀ: ପହଲଗାମର ବୈସାରନ ଉପତ୍ୟକାରେ ହୋଇଥିବା ଆକ୍ରମଣ ପଛରେ କେବଳ ତିନି ଜଣ ଲସ୍କର-ଏ-ତୈବା ଆତଙ୍କବାଦୀଙ୍କ ହାତ ଥିଲା । ଏହି ଆକ୍ରମଣରେ ୨୬ ଜଣ ପର୍ଯ୍ୟଟକଙ୍କର ମୃତ୍ୟୁ ହୋଇଥିଲା। ଗୁରୁବାର ଦିନ ଜାତୀୟ ତଦନ୍ତ ସଂସ୍ଥା (NIA) ଏହାକୁ ନିଶ୍ଚିତ କରିଛି । ରିପୋର୍ଟରେ କୁହାଯାଇଛି ଯେ, ପହଲଗାମ ଆକ୍ରମଣରେ କେବଳ ତିନି ଜଣ ପାକିସ୍ତାନୀ ଆତଙ୍କବାଦୀ ସାମିଲ ଥିଲେ। ଆତଙ୍କବାଦୀ ମାନେ ବୈସାରନ ଉପତ୍ୟକାକୁ ବାଛିଥିଲେ, କାରଣ ବୈସାରନ ଏକ ନିର୍ଜନ ସ୍ଥାନ ଥିଲା ଏବଂ ସେଠାରେ ପର୍ଯ୍ୟଟକଙ୍କ ସଂଖ୍ୟା ସର୍ବାଧିକ ଥିଲା। ଏହି ଆକ୍ରମଣ ପଛରେ ପାକିସ୍ତାନର ସିଧାସଳଖ ଭୂମିକା ଏବେ ସାମ୍ନାକୁ ଆସିଛି। ଘଟଣାରେ ତଦନ୍ତ ଜାରି ରହିଛି ।

NIA ରିପୋର୍ଟରେ କୁହାଯାଇଛି ଯେ, ଘଟଣାସ୍ଥଳରୁ ଉଦ୍ଧାର ହୋଇଥିବା କାର୍ଟ୍ରିଜ୍ ମଧ୍ୟ ଏନକାଉଣ୍ଟର ପରେ ଆତଙ୍କବାଦୀଙ୍କ ଠାରୁ ମିଳିଥିଲା। ଅପରେସନ ମହାଦେବ ପରେ ଏଜେନ୍ସିର ଏହା ପ୍ରଥମ ସରକାରୀ ବିବୃତ୍ତି,ଯେଉଁଥିରେ ତିନିଜଣଙ୍କ ମୃତ୍ୟୁ ହୋଇଥିଲା।

ଜୀବିତ ଥିବା ଲୋକଙ୍କ ପ୍ରଥମ ବୟାନରେ ଚାରି ରୁ ପାଞ୍ଚ ଜଣ ଆକ୍ରମଣକାରୀଙ୍କ ସଙ୍କେତ ମିଳିଥିଲା। ଜମ୍ମୁ କାଶ୍ମୀର ପୋଲିସ ମଧ୍ୟ ସୂଚିତ କରିଥିଲା ଯେ, ଜଣେ ସ୍ଥାନୀୟ ଲୋକଙ୍କ ସମେତ ଏକାଧିକ ଲୋକ ଏଥିରେ ସାମିଲ ହୋଇପାରନ୍ତି। ତଥାପି, NIA ଏବେ ସ୍ପଷ୍ଟ କରିଛି ଯେ, କେବଳ ତିନି ଜଣ ପାକିସ୍ତାନୀ ଆତଙ୍କବାଦୀ ଏହି ଆକ୍ରମଣ କରିଥିଲେ।

ତଦନ୍ତରୁ ଜଣାପଡିଛି ଯେ ତିନି ଜଣ ବୈସାରନକୁ ଟାର୍ଗେଟ କରିବା ପୂର୍ବରୁ ଏହାର ରେକି କରିଥିଲେ । କାରଣ ଏହା ତୁଳନାତ୍ମକ ଭାବରେ ବିଚ୍ଛିନ୍ନ ଥିଲା, ପୋଲିସ ଉପସ୍ଥିତି କମ୍ ଥିଲା ଏବଂ ପର୍ଯ୍ୟଟକଙ୍କ ଭିଡ଼ ଥିଲା। ସେମାନେ ଖାଦ୍ୟ ଏବଂ ଆଶ୍ରୟ ବଦଳରେ ଦୁଇଜଣ ଓଭରଗ୍ରାଉଣ୍ଡ କର୍ମଚାରୀଙ୍କୁ ୩ ହଜାର ଟଙ୍କା ମଧ୍ୟ ଦେଇଥିଲେ। ଏଜେନ୍ସି ଗିରଫ କରିଥିବା ଦୁଇ OGW ଙ୍କ ବିରୁଦ୍ଧରେ ଏକ ଚାର୍ଜସିଟ୍ ଦାଖଲ କରିବାକୁ ପ୍ରସ୍ତୁତ ହେଉଛି।

ଗୃହମନ୍ତ୍ରୀ ପୂର୍ବରୁ ସଂସଦକୁ କହିଛନ୍ତି ଯେ ଅପରେସନ ମହାଦେବ ସମୟରେ ତିନି ଜଣ ଆତଙ୍କବାଦୀ ନିହତ ହୋଇଥିଲେ। NIAର ସଦ୍ୟତମ ତଦନ୍ତ ନିଶ୍ଚିତ କରେ ଯେ ପହଲଗାମ ଆକ୍ରମଣ ପାଇଁ ସେହି ବ୍ୟକ୍ତିମାନେ ଦାୟୀ ଥିଲେ।