ନୂଆଦିଲ୍ଲୀ,୧୧/୦୮: ଭାରତର ସୌନ୍ଦର୍ଯ୍ୟ ଏବଂ ଏହାର ପର୍ଯ୍ୟଟନ ସ୍ଥଳୀର ଅନେକ ଦିୱାନା ରହିଛନ୍ତି । ବର୍ଷ ସାରା ବିଶ୍ୱରୁ ପର୍ଯ୍ୟଟକ ଏଠାକୁ ବୁଲି ଆସିଥାନ୍ତି । ଏମାନଙ୍କ ମଧ୍ୟରେ ପଡ଼ୋଶୀ ଦେଶ ପାକିସ୍ତାନର ଲୋକଙ୍କର ସଂଖ୍ୟା ବି ରହିଛି । 'ଅପରେସନ୍ ସିନ୍ଦୂର' ପୂର୍ବରୁ ୨୦୨୪ରେ ମୋଟ୍ ୨୬ ହଜାରରୁ ଅଧିକ ପାକିସ୍ତାନୀ ପର୍ଯ୍ୟଟକ ଭାରତକୁ ବୁଲିବାକୁ ଆସିଛନ୍ତି । ରାଜ୍ୟସଭାରେ ପର୍ଯ୍ୟଟନ ମନ୍ତ୍ରଣାଳୟ ଦ୍ୱାରା ଉପସ୍ଥାପିତ ତଥ୍ୟ ଅନୁଯାୟୀ, ୨୦୨୪ରେ ମୋଟ୍ ୨୬,୬୨୫ଜଣ ପାକିସ୍ତାନୀ ଭାରତ ଆସିଥିଲେ । ଯାହା ୨୦୨୨ ପରଠାରୁ ଏହା ସର୍ବାଧିକ। ସେହିପରି ୩୦, ୬୨୦ ଭାରତୀୟ ମଧ୍ୟ ପାକିସ୍ତାନ ଗସ୍ତ କରିଥିଲେ ।
୨୦୨୫ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ପର୍ଯ୍ୟଟକଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣ ମଧ୍ୟରେ ଦୁଇ ଦେଶ ମଧ୍ୟରେ ସମ୍ପର୍କ ଉତ୍ତେଜନାମୂଳକ ରହିଛି । ପହଲଗାମରେ ଆତଙ୍କବାଦୀମାନେ ୨୬ଜଣ ନୀରିହ ପର୍ଯ୍ୟଟକଙ୍କୁ ଗୁଳି କରି ହତ୍ୟା କରିଥିଲେ । ଏହା ପରେ ଭାରତ ସରକାର ତୁରନ୍ତ ଆକ୍ସନ ନେଇ ପାକିସ୍ତାନୀ ନାଗରିକଙ୍କ ପାଇଁ ଭିସା ବାତିଲ କରିଥିଲା । ୨୭ ଏପ୍ରିଲ୍ ୨୦୨୫ ଠାରୁ ପାକିସ୍ତାନୀ ନାଗରିକଙ୍କୁ ପ୍ରଦାନ କରାଯାଇଥିବା ସମସ୍ତ ଭାରତୀୟ ଭିସା ବାତିଲ ହୋଇଛି । ପାକିସ୍ତାନ ମଧ୍ୟ ଭାରତୀୟମାନଙ୍କୁ ପ୍ରଦାନ କରାଯାଇଥିବା ଭିସା ବାତିଲ କରିଥିଲା । ପାକିସ୍ତାନରେ ଥିବା ଭାରତୀୟ ଦୂତାବାସ ସରକାରୀ ୱେବସାଇଟ୍ ଅନୁଯାୟୀ, ଭାରତ ପରିଦର୍ଶନ କରିବାକୁ ଚାହୁଁଥିବା ଲୋକଙ୍କୁ ୧୦ଟି ବର୍ଗରେ ଭିସା ଦିଆଯାଇଥିଲା - ଯେଉଁଥିରେ ନିଯୁକ୍ତି, ବ୍ୟବସାୟ, ସମ୍ମିଳନୀ, ସାମ୍ବାଦିକତା, ଚିକିତ୍ସା, ସରକାରୀ, ତୀର୍ଥଯାତ୍ରୀ, ଛାତ୍ର, ପରିବହନ ଏବଂ ପରିଦର୍ଶକ ଅନ୍ତର୍ଭୁକ୍ତ ।
ସେହି ସମୟରେ, ପାକିସ୍ତାନ ଭାରତୀୟଙ୍କ ପାଇଁ ଯାତ୍ରା, ବ୍ୟବସାୟ, ସମ୍ମିଳନୀ, ତୀର୍ଥଯାତ୍ରା ଏବଂ କୂଟନୈତିକ କାର୍ଯ୍ୟ ପାଇଁ ଭିସା ପ୍ରଦାନ କରିଥିଲା। ଏଗୁଡ଼ିକ ବ୍ୟତୀତ, ଛାତ୍ର, ସାମ୍ବାଦିକ ଏବଂ ଜାତିସଂଘ କିମ୍ବା ଅନ୍ୟାନ୍ୟ ଅନ୍ତର୍ଜାତୀୟ ସଂଗଠନ ସହିତ କାର୍ଯ୍ୟ କରୁଥିବା ବ୍ୟକ୍ତିବିଶେଷଙ୍କୁ ମଧ୍ୟ ଭିସା ପ୍ରଦାନ କରାଯାଇଥିଲା । ୨୦୧୯ ପରେ, ୨୦୨୪ରେ ଦ୍ୱିତୀୟ ଥିଲା ଯେତେବେଳେ ପାକିସ୍ତାନ ଗସ୍ତ କରୁଥିବା ଭାରତୀୟଙ୍କ ସଂଖ୍ୟା ଭାରତ ଗସ୍ତ କରୁଥିବା ପାକିସ୍ତାନୀମାନଙ୍କ ଅପେକ୍ଷା ଅଧିକ ଥିଲା । ୨୦୨୦ ଏବଂ ୨୦୨୧ ପାଇଁ ସଂଖ୍ୟା ପ୍ରକାଶ କରାଯାଇ ନଥିଲା କାରଣ ଏହି ସମୟ ମଧ୍ୟରେ ପର୍ଯ୍ୟଟନ ବାଧାପ୍ରାପ୍ତ ହୋଇଥିଲା । ସେହିପରି ୨୦୨୪ରେ ଭାରତକୁ ୧୮ ଲକ୍ଷରୁ ଅଧିକ ଆମେରିକୀୟ ପର୍ଯ୍ୟଟକ ଭ୍ରମଣରେ ଆସିଛନ୍ତି ।
