ମୁମ୍ବାଇ,୨୫/୦୧: ୯୦ ଦଶକର ଟପ୍ ହିରୋଇନ ଥିଲେ ମମତା କୁଲକର୍ଣ୍ଣି । ଏବେ ତାଙ୍କର ନୂଆ ପରିଚୟ ହୋଇଛି । କିନ୍ନର ଆଖଡାର ମହାମଣ୍ଡଳେଶ୍ବର ହୋଇଛନ୍ତି ମମତା । ମହାମଣ୍ଡଳେଶ୍ବର ହେବା ପରେ ତାଙ୍କ ପରିଚୟ ବଦଳିଛି । ମମତା କୁଲକର୍ଣ୍ଣିରୁ ସେ ଶ୍ରୀ ୟମାଇ ମମତା ନନ୍ଦଗିରି ହୋଇଛନ୍ତି । ଦିନେ ତାଙ୍କ ନାମରେ ଅଣ୍ଡରୱାର୍ଲ୍ଡ କନେକ୍ସନ ଥିଲା । ଡ୍ରଗ୍ସ ମାଫିଆଙ୍କୁ ବିବାହ କରିଥିଲେ । ବୋଲ୍ଡ ଫଟୋସୁଟକୁ ନେଇ ଦେଶ ତମାତ ହଙ୍ଗାମା ହୋଇଥିଲା । ତେବେ ଆସନ୍ତୁ ଜାଣିବା ବଲିଉଡ ଅଭିନେତ୍ରୀଙ୍କ ବିବାଦୀୟ ଅତୀତରୁ ଆଧ୍ୟତ୍ମିକ ଯାତ୍ରା ବିଷୟରେ ।
ମଡେଲ ତଥା ଟପ୍ ହିରୋଇନ୍ ଥିଲେ ମମତା କୁଲକର୍ଣ୍ଣି । ୧୯୭୨ ଏପ୍ରିଲ ୨୦ରେ ମାୟାନଗରୀ ମୁମ୍ବାଇରେ ତାଙ୍କର ଜନ୍ମ । ତାଙ୍କ ପ୍ରକୃତ ନାମ ମମତା ମୁକୁନ୍ଦ କୁଲକର୍ଣ୍ଣି । ୧୯୯୨ରେ ବଲିଉଡରେ ପାଦ ଥାପିଥିଲେ ମମତା । ତ୍ରିରଙ୍ଗା ଥିଲା ତାଙ୍କର ଡେବ୍ୟୁ ଫିଲ୍ମ । ଏହା ପରେ ବହୁ ହିଟ୍ ଫିଲ୍ମ ଭେଟି ଥିଲେ ମମତା । 'ଆଶିକି ଆୱାରା', 'ମେରେ ଦିଲ୍ ତେରେ ଲିଏ', 'ବିଷ୍ଣୁ ବିଜୟ', 'କରନ ଅର୍ଜୁନ', 'ସବସେ ବଡା ଖିଲାଡୀ', 'ଚାଇନା ଗେଟ' , ଛୁପା ରୁସ୍ତମ ଭଳି ବଲିଉଡ ଫିଲ୍ମରେ ଦମଦାର ଅଭିନୟ କରିଥିଲେ ମମତା । ଖାଲି ହିନ୍ଦୀ ନୁହେଁ ବହୁ ଭାଷା ଚଳଚ୍ଚିତ୍ରରେ ଅଭିନୟ ଯାଦୁ ଦେଖାଇଛନ୍ତି ସେ । ବହୁ ବର୍ଷ ଧରି ଫିଲ୍ମ ଦୁନିଆରୁ ଦୂରେଇ ଯାଇଥିଲେ ମମତା । ୨୦୧୩ରୁ ମମତା କୁଲକର୍ଣ୍ଣି ଫିଲ୍ମ ଇଣ୍ଡଷ୍ଟ୍ରୀ ଛାଡିଥିଲେ ।
ଡ୍ରଗ୍ସ ମାଫିଆ ବିକ୍କି ଗୋସ୍ବାମୀଙ୍କୁ ଦୁବାଇରେ ବିବାହ କରିଥିଲେ ମମତା । ଡ୍ରଗ୍ସ ତସ୍କରୀକୁ ନେଇ ୧୨ ବର୍ଷ ଜେଲରେ ରହିଥିଲେ ବିକ୍କି । ମାତ୍ର ମମତା ଏହି ଅଭିଯୋଗକୁ ଖଣ୍ଡନ କରିଥିଲେ । ୨୦୧୬ରେ ବିକ୍କିଙ୍କ ନାମରେ ମୁମ୍ବାଇ ପୋଲିସ ଆରେଷ୍ଟ ୱାରେଣ୍ଟୀ ଜାରି କରିଥିଲା । ମମତାଙ୍କ ନାମରେ ଅଣ୍ଡରୱାର୍ଲ୍ଡ କନେକ୍ସନ ଥିବା ଅଭିଯୋଗ ହୋଇଥିଲା । ଅଣ୍ଡରୱାର୍ଲ୍ଡ ଡନ୍ ଅବୁ ସଲେମକୁ ମନ ଦେଇଥିଲେ ମମତା । ୧୯୯୯ରେ ଏକ ମାଗାଜିନ ପାଇଁ ମମତା ବୋଲ୍ଡ ଫଟୋସୁଟ କରିଥିଲେ ଯାହାକୁ ନେଇ ଦେଶରେ ହଙ୍ଗମା ହୋଇଥିଲା । ଦିନେ ଯିଏ ବୋଲ୍ଡ ଫୋଟସୁଟକୁ ନେଇ ଚର୍ଚ୍ଚାରେ ଥିଲେ ଆଜି ସେ ମହାମଣ୍ଡଳେଶ୍ବର ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେବେ ଏହା ମହାଦେବ ଓ ମହାକାଳୀଙ୍କ ଆଦେଶ ଥିଲା ବୋଲି କହିଛନ୍ତି ମମତା ।
ଗତକାଲି (ଶୁକ୍ରବାର) ପ୍ରୟାଗରାଜ ମହାକୁମ୍ଭ ମେଳାର ସଙ୍ଗମା ଘାଟରେ ନିଜ ପିଣ୍ଡ ଦାନ କରିଥିଲେ ମମତା । ସାଥୀ ସନ୍ୟାସିନୀଙ୍କ ସହ ବୁଡ ପକାଇବା ସହ ମହାମଣ୍ଡଳେଶ୍ବର ବନିବାର ସମସ୍ତ ବିଧି ପାଳନ କରିଥିଲେ । ପଟ୍ଟାଭିଷେକ ବେଳେ ମମତାଙ୍କ ଆଖିରୁ ଲୁହ ଝରିଥିବା ଦେଖିବାକୁ ମିଳିଥିଲା । ଟପ୍ ହିରୋଇନ ମମତା କୁଲକର୍ଣ୍ଣିରୁ ସେ ହୋଇଛନ୍ତି ଶ୍ରୀ ୟମାଇ ମମତା ନନ୍ଦଗିରି । ଯାହାକୁ ନେଇ ଏବେ ଖୁବ ଚର୍ଚ୍ଚା । ସଂସାର ତ୍ୟାଗ କରି କାହିଁକି ଏପରି ନିଷ୍ପତ୍ତି ନେଲେ ମମତା ତାକୁ ନେଇ ଫ୍ୟାନ୍ସଙ୍କ ମନରେ ଅନେକ ପ୍ରଶ୍ନ ଉଙ୍କି ମାରିଛି ।
