କୋଲକାତା,୧୮/୬:କାଞ୍ଚନଜଙ୍ଗା ଏକ୍ସପ୍ରେସ୍‌ ଟ୍ରେନ ଦୁର୍ଘଟଣା ଘଟଣା। ଗତକାଲି ପଶ୍ଚିମବଙ୍ଗର ଫାନ୍‌ସିଦେବା ଠାରେ ମାଲବାହୀ ଟ୍ରେନ୍‌ ଧକ୍କାରେ ଦୁର୍ଘଟଣାର ଶିକାର ହୋଇଥିବା କାଞ୍ଚନଜଙ୍ଗା ଏକ୍ସପ୍ରେସ ସିଆଲଦା ଷ୍ଟେସନରେ ପହଞ୍ଚିଛି। ସେପଟେ ଦୁର୍ଘଟଣାର ୧୨ ଘଣ୍ଟା ମଧ୍ୟରେ ଦାର୍ଜିଲିଂ ରୁଟ୍‌ରେ ଥିବା ରେଳ ଟ୍ରାକ୍ ରିଷ୍ଟୋର୍‌ ହୋଇଥିବା ବେଳେ ରେଳ ସେବା ପୁଣି ଥରେ ଆରମ୍ଭ ହୋଇଛି।

ଦୁର୍ଘଟଣାର ଶିକାର ହୋଇଥିବା ତିନୋଟି ବଗିକୁ ଛାଡି ବାକି କାଞ୍ଚନଜଙ୍ଗା ଏକ୍ସପ୍ରେସ ଆଜି ଭୋରୁ ସିଲଦାଠାରେ ପହଞ୍ଚିଛି। ପରେ ଯାତ୍ରୀମାନଙ୍କୁ ବସ୍ ମାଧ୍ୟମରେ ସେମାନଙ୍କ ଘରକୁ ପଠାଯାଇଥିଲା। ଯଦିଓ ମାଲଗାଡି ଟ୍ରେନ୍‌ ଡ୍ରାଇଭରଙ୍କ ଅବହେଳା ଯୋଗୁ ଏହି ଟ୍ରେନ୍ ଦୁର୍ଘଟଣାର ଘଟିଥିବା କୁହାଯାଉଛି, ତଥା ରେଳ ମନ୍ତ୍ରଣାଳୟ ଏହି ଦୁର୍ଘଟଣାର ଯାଞ୍ଚ ପାଇଁ ଏକ ଟିମ୍ ଗଠନ କରିଛି। ତେବେ ଏହି ଟ୍ରେନ୍‌ ଦୁର୍ଘଟଣାରେ ୯ ଜଣଙ୍କ ମୃତ୍ୟୁ ହୋଇଥିବା ବେଳେ ଏଥିସହ ୫୦ ଜଣ ଆହତ ହୋଇଛନ୍ତି। ରେଳବାଇ ତରଫରୁ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ସହାୟତା ରାଶି ଘୋଷଣା କରାଯାଇଛି। ଏଥିସହ ଗୁରୁତରଙ୍କୁ ଅଢ଼େଇ ଲକ୍ଷ ଓ ଆହତଙ୍କୁ ୫୦ ହଜାର ଟଙ୍କା ସହାୟତା ରାଶି ଘୋଷଣା କରାଯାଇଛି।