ନୂଆଦିଲ୍ଲୀ: ଭାରତ ଗୁରୁବାର ପାକିସ୍ତାନର ବରିଷ୍ଠ ନେତୃତ୍ୱଙ୍କ ଦ୍ୱାରା ଦିଆଯାଇଥିବା ଘୃଣାପୂର୍ଣ୍ଣ ମନ୍ତବ୍ୟକୁ କଡା ନିନ୍ଦା କରିଛି। ଏବଂ ଚେତାବନୀ ଦେଇଛି ଯେ ପାକିସ୍ତାନ ଭାରତ ବିରୁଦ୍ଧରେ ଯେକୌଣସି ପଦକ୍ଷେପ ଗ୍ରହଣ କରିବ ତାର ଗମ୍ଭୀର ଏବଂ ଭୟଙ୍କର ପରିଣାମ ଭୋଗିବ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଗୁରୁବାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରୀଫ ଏବଂ ଅନ୍ୟାନ୍ୟ ବରିଷ୍ଠ ନେତାଙ୍କ ଦ୍ୱାରା ଜମ୍ମୁ ଓ କାଶ୍ମୀର ସମ୍ପର୍କିତ ସମ୍ପ୍ରତି ଦିଆଯାଇଥିବା ବିବାଦୀୟ ମନ୍ତବ୍ୟ "ଅଗ୍ରହଣୀୟ ଏବଂ ଅନୁଚିତ"।
ଆପଣଙ୍କୁ ଜଣାଇରଖୁ ଯେ, ନିକଟରେ ଶେହବାଜ ଶରୀଫ କହିଛଥିଲେ ଯେ ପାକିସ୍ତାନ ଜମ୍ମୁ ଓ କାଶ୍ମୀରରେ ଭାରତର ଅନ୍ୟାୟକୁ ବିରୋଧ କରିବ ଏବଂ କାଶ୍ମୀରୀ ଜନତାଙ୍କ ପାଇଁ ନ୍ୟାୟ ଦାବି କରିବ। ଏହା ସହିତ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ ମଧ୍ୟ କାଶ୍ମୀର ସମସ୍ୟାକୁ ଆନ୍ତର୍ଜାତୀୟ ମଞ୍ଚରେ ଉଠାଇବାକୁ ଦାବି କରିଛନ୍ତି। ଏହି ମନ୍ତବ୍ୟଗୁଡ଼ିକ ଭାରତର ୭୮ତମ ସ୍ୱାଧୀନତା ଦିବସ ପୂର୍ବରୁ ଆସିଛି। ଯାହା ଦୁଇ ଦେଶ ମଧ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରିଛି।
ସେହିଭଳି ପାକିସ୍ତାନ ସେନା ମୁଖ୍ୟ ଅସୀମ ମୁନିର ମଧ୍ୟ ଆମେରିକାରେ ଥାଇ ବିଭିନ୍ନ ଭାରତ ବିରୋଧି ମନ୍ତବ୍ୟ ଜାରି କରୁଥିଲେ। ଯାହାକୁ ନେଇ ଭାରତରେ ଅଶାନ୍ତି ପରିଲକ୍ଷିତ ହୋଇଥିଲା। ଆମେରିକାର ସାହାସରେ ସେଠାରେ ରହି ଭାରତକୁ ଆଙ୍ଗୁଟି ଦେଖାଇବାକୁ ଚେଷ୍ଟା କରୁଥିବ ମୁନୀରଙ୍କୁ କିନ୍ତୁ ଉପଯୁକ୍ତ ଜବାବ ଫେରାଇଛି ଭାରତ। ଅସୀମ ମୁନିରଙ୍କ କଥାକୁ ଆମେ ଗୁରୁତ୍ତ୍ୱ ଦେଉନାହୁଁ ବୋଲି ଭାରତ ପକ୍ଷରୁ ବିବୃତ୍ତି ଜାରି କରାଯାଇଛି। କିନ୍ତୁ ପାକିସ୍ତାନର ପ୍ରଧାନମନ୍ତ୍ରୀଙ୍କ ଅପମାନସୂଚକ ଦାବିର ଉପଯୁକ୍ତ ଜବାବ ଦିଆଯାଇଛି।
ଏନେଇ ଜୟସୱାଲ ଜୋର ଦେଇ କହିଛନ୍ତି ଯେ, "ଜମ୍ମୁ ଓ କାଶ୍ମୀର ଭାରତର ଏକ ଅବିଚ୍ଛେଦ୍ୟ ଅଙ୍ଗ ଅଟେ ଏବଂ ଏହା ସମ୍ପର୍କରେ କୌଣସି ଅନୁଚିତ ମନ୍ତବ୍ୟ ବା ହସ୍ତକ୍ଷେପ ସହ୍ୟ କରାଯିବ ନାହିଁ।" ସେ ଆହୁରି କହିଛନ୍ତି ଯେ ପାକିସ୍ତାନ ନିଜର ଆଭ୍ୟନ୍ତରୀଣ ସମସ୍ୟା, ଯେପରିକି ଅର୍ଥନୈତିକ ଅସ୍ଥିରତା ଏବଂ ଆତଙ୍କବାଦ, ଉପରେ ଧ୍ୟାନ ଦେବା ଉଚିତ। ଭାରତୀୟ ଅଧିକାରୀମାନେ ମଧ୍ୟ ଅଭିଯୋଗ କରିଛନ୍ତି ଯେ ପାକିସ୍ତାନ ସୀମାପାର ଆତଙ୍କବାଦକୁ ସମର୍ଥନ କରୁଛି। ଯାହା ଦୁଇ ଦେଶ ମଧ୍ୟରେ ଶାନ୍ତି ଆଲୋଚନାରେ ବାଧା ସୃଷ୍ଟି କରୁଛି।
ପାକିସ୍ତାନର ଏହି ମନ୍ତବ୍ୟ ତାର ଆଭ୍ୟନ୍ତରୀଣ ରାଜନୈତିକ ଚାପ ଏବଂ ଆନ୍ତର୍ଜାତୀୟ ସମର୍ଥନ ହାସଲ କରିବା ପାଇଁ ଏକ ପ୍ରୟାସ ହୋଇପାରେ ବୋଲି ବିଶେଷଜ୍ଞମାନେ ଅନୁମାନ କରୁଛନ୍ତି। ତେବେ, ଭାରତ ସ୍ପଷ୍ଟ କରିଛି ଯେ ଏଭଳି ମନ୍ତବ୍ୟକୁ ଦେଶ ଗମ୍ଭୀରତାର ସହ ନେଉଛି ଏବଂ ଆବଶ୍ୟକ ହେଲେ ଏହା ବିରୁଦ୍ଧରେ କଠୋର ପଦକ୍ଷେପ ମଧ୍ୟ ନିଆଯିବ। ଏହି ଘଟଣା ଦୁଇ ପଡ଼ୋଶୀ ଦେଶ ମଧ୍ୟରେ ଚାଲିଥିବା ଉତ୍ତେଜନାକୁ ଆହୁରି ବୃଦ୍ଧି କରିଛି। ଯେଉଁଥିରେ ଶାନ୍ତିପୂର୍ଣ୍ଣ ସମାଧାନର ସମ୍ଭାବନା କ୍ଷୀଣ ହୋଇ ଚାଲିଛି।
