ନୂଆଦିଲ୍ଲୀ: ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ପାକିସ୍ତାନର ୭ ବିଲିୟନ ଡଲାର ଋଣ କାର୍ଯ୍ୟକ୍ରମର ସମୀକ୍ଷା କରି ୧ ବିଲିୟନ ଡଲାର (ପ୍ରାୟ ୮,୫୦୦ କୋଟି ଟଙ୍କା) ମଞ୍ଜୁର କରିଛି। ଭାରତର ତୀବ୍ର ବିରୋଧ ଏବଂ ଆତଙ୍କବାଦ ପ୍ରତି ପାକିସ୍ତାନର ସମର୍ଥନ ଓ ଅସ୍ଥିର ଋଣ ସ୍ତର ସମ୍ପର୍କରେ ଉଠିଥିବା ଚିନ୍ତା ସତ୍ତ୍ୱେ ଆଇଏମଏଫ ଏହି ନିଷ୍ପତ୍ତି ଗ୍ରହଣ କରିଛି।
ଏହି ଘଟଣା ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଘଟିଛି। ପହଲଗାମ ଆତଙ୍କବାଦୀ ଆକ୍ରମଣ ଓ ତା’ର ପ୍ରତିଶୋଧ ସ୍ୱରୂପ ଭାରତର ‘ଅପରେସନ୍ ସିନ୍ଦୁର’ ପରେ ଦୁଇଦେଶ ମଧ୍ୟରେ ଉତ୍ତେଜନା ଆହୁରି ବୃଦ୍ଧି ପାଇଛି। ଗତ ମଇ ୮ ତାରିଖରେ ଭାରତର ବୈଦେଶିକ ସଚିବ ବିକ୍ରମ ମିଶ୍ରୀ ଆଇଏମଏଫ ବୋର୍ଡ ବୈଠକରେ ପାକିସ୍ତାନକୁ ଆର୍ଥିକ ସହାୟତା ବିରୋଧରେ ଭାରତର ଦୃଢ଼ ଆପତ୍ତି ଉଠାଇବ ବୋଲି ଘୋଷଣା କରିଥିଲେ।
ଭାରତର ଆଇଏମଏଫ ଏକ୍ସିକ୍ୟୁଟିଭ ଡାଇରେକ୍ଟର ପରମେଶ୍ୱରନ ଆୟାର ମଇ ୯ ତାରିଖରେ ହୋଇଥିବା ବୋର୍ଡ ବୈଠକରେ ଭାରତର ଅବସ୍ଥାନ ଉପସ୍ଥାପନ କରି ପାକିସ୍ତାନର ଆତଙ୍କବାଦ ବିରୋଧରେ ବିଫଳତା ଏବଂ ଋଣର ଅପବ୍ୟବହାର ସମ୍ପର୍କରେ ଉଦ୍ବେଗ ପ୍ରକାଶ କରିଥିଲେ। ଭାରତ ଏହା ମଧ୍ୟ ଉଲ୍ଲେଖ କରିଥିଲା ଯେ ପାକିସ୍ତାନର ଉଚ୍ଚ ଋଣ ଭାର ଆଇଏମଏଫ ପାଇଁ “ବିଫଳ ଋଣଖୋର” ହୋଇପାରେ। ତେବେ ଋଣ ଦେବା ନେଇ ହୋଭଥିବା ଭୋଟିଂରୁ ଭାରତ ନିଜକୁ ଦୂରେଇ ରଖିଥିଲା।
ଆଇଏମଏଫ ଡାଟା ଅନୁସାରେ, ୧୯୫୮ ରୁ ୨୦୨୪ ମଧ୍ୟରେ ପାକିସ୍ତାନ ମୋଟ ୨୫ଟି କିସ୍ତିରେ ଋଣ ଗ୍ରହଣ କରିଛି। ଯାହାର ମୋଟ ମଞ୍ଜୁର ରାଶି ୪୪.୫୭ ବିଲିୟନ ଡଲାର ରହିଛି। ଏଯାଏ ପାକିସ୍ତାନକୁ ୨୮.୨ ବିଲିୟନ ଡଲାରର ପାଣ୍ଠି ବଣ୍ଟନ ହୋଇଛି। ବର୍ତ୍ତମାନ ପାକିସ୍ତାନ ଆଇଏମଏଫକୁ ୮.୩ ବିଲିୟନ ଡଲାର ଋଣ ଦେବାର ବାକି ରହିଛି। ପାକିସ୍ତାନର ଅର୍ଥନୀତି ଚାପରେ ଥିବାବେଳେ ଏହା ଚୀନ, ସାଉଦି ଆରବ ଓ କାତାର ଭଳି ଦେଶ ଏବଂ ଆଇଏମଏଫ, ବିଶ୍ୱ ବ୍ୟାଙ୍କ ଓ ଏସୀୟ ବିକାଶ ବ୍ୟାଙ୍କ ଭଳି ଅନୁଷ୍ଠାନଙ୍କଠାରୁ ଆର୍ଥିକ ସହାୟତା ଉପରେ ନିର୍ଭର କରି ନିଜ ଦେଶର ଆର୍ଥିକ କାରବାର ପୁରଣ କରୁଛି।
ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ କାର୍ଯ୍ୟାଳୟ ଏହି ଋଣ ଅନୁମୋଦନକୁ ସ୍ୱାଗତ କରିଛି। କିନ୍ତୁ ଆଇଏମଏଫ ଏ ସମ୍ପର୍କରେ ଆନୁଷ୍ଠାନିକ ମନ୍ତବ୍ୟ ଜାରି କରିନାହିଁ। ଅନ୍ୟପକ୍ଷରେ, ଭାରତ ଅନ୍ୟ ବହୁପାକ୍ଷିକ ଆର୍ଥିକ ଅନୁଷ୍ଠାନଙ୍କୁ ମଧ୍ୟ ପାକିସ୍ତାନକୁ ପ୍ରଦାନ କରାଯାଉଥିବା ଋଣ ଓ ଅନୁଦାନର ସମୀକ୍ଷା କରିବାକୁ ଅନୁରୋଧ କରିବାକୁ ଯୋଜନା କରୁଛି।
ସାମାଜିକ ଗଣମାଧ୍ୟମ ଏକ୍ସରେ ଥିବା ୟୁଜର୍ସ ଆଇଏମଏଫର ଏହି ନିଷ୍ପତ୍ତିକୁ କଡା ନିନ୍ଦା କରିଛନ୍ତି। ତେବେ, ଏହି ଋଣ ପାକିସ୍ତାନର ଅର୍ଥନୈତିକ ସଙ୍କଟ ଦୂର କରିବ ନା ଆଞ୍ଚଳିକ ଉତ୍ତେଜନାକୁ ଆହୁରି ବଢ଼ାଇବ, ତାହା ଆଗାମୀ ଦିନରେ ସ୍ପଷ୍ଟ ହେବ।
