ନୂଆଦିଲ୍ଲୀ,୧୨/୦୧: ସପ୍ତାହକୁ ୧୦୦ ଘଣ୍ଟା କାମ କରି ଅଫିସ୍ ଗାଧୁଆଘରେ କାନ୍ଦୁଥିଲି । କାର୍ଯ୍ୟ ଚାପ ଯୋଗୁଁ ସବୁବେଳେ ଦୁଃଖୀ ରହୁଥିଲି । ୨ ଥର ଡାକ୍ତରଖାନାରେ ଭର୍ତ୍ତି ହୋଇଥିଲି । ଦେଶରେ କାର୍ଯ୍ୟ ନିର୍ଘଣ୍ଟକୁ ନେଇ ବିତର୍କ ବଢୁଛି । ସପ୍ତାହକୁ ୯୦ ଘଣ୍ଟା କାମ କରିବା ମନ୍ତବ୍ୟକୁ ନେଇ କିଛି ଏମିତି କହିଛନ୍ତି ମ୍ୟୁଚୁଆଲ ଫଣ୍ଡ କମ୍ପାନୀର ଭାରତର ପ୍ରଥମ ମହିଳା ସିଇଓ ତଥା ଏମଡି ରାଧିକା ଗୁପ୍ତା । ସେ ସପ୍ତାହକୁ ୧୦୦ ଘଣ୍ଟା କାମ କରିବାର ଅଭିଜ୍ଞତା ବାଣ୍ଟିଛନ୍ତି ।
ବିଶ୍ବରେ ଅନେକ ଦେଶ କର୍ମଚାରୀଙ୍କ ଉପରୁ ଚାପ ହ୍ରାସ ପାଇଁ କାର୍ଯ୍ୟ ସମୟ କମ କରିବାରେ ଲାଗିଛନ୍ତି । ଏହାରି ଭିତରେ ଭାରତରେ କର୍ମଚାରୀଙ୍କ କାର୍ଯ୍ୟ ନିର୍ଘଣ୍ଟ ବୃଦ୍ଧି କରିବାକୁ ବିଶିଷ୍ଟ ଶିଳ୍ପପତିମାନେ ଦାବି କରୁଛନ୍ତି । ଏହାକୁ ନେଇ ବିତର୍କ ବଢିବାରେ ଲାଗିଛି । ଗୋଟିଏ ଗୋଷ୍ଠୀ ଏହାକୁ ସମର୍ଥନ କରୁଥିବାବେଳେ କିଛି ଏହାକୁ ବିରୋଧ କରୁଛନ୍ତି । ଏସଏନ ସୁବ୍ରମଣ୍ୟମଙ୍କ ସପ୍ତାହକୁ ୯୦ ଘଣ୍ଟା କାମ କରିବା ମନ୍ତବ୍ୟକୁ ସମାଲୋଚନା କରାଯାଇଛି । ଏହାରି ଭିତରେ ଗତକାଲି (ଶନିବାର) ପରିମାଣ ନୁହେଁ ମାନ ଜରୁରୀ ବୋଲି କହିଥିଲେ ବିଶିଷ୍ଟ ଉଦ୍ୟୋଗପତି ଆନନ୍ଦ ମହିନ୍ଦ୍ରା । ବିକଶିତ 'ଭାରତ ୟଙ୍ଗ ଲିଡର୍ସ ଡାଏଲଗ ୨୦୨୫'କୁ ସମ୍ବୋଧନ କରି ମହିନ୍ଦ୍ରା କହିଥିଲେ, ପରିବାର ସହ ସମୟ ବିତାଇବା ଜରୁରୀ । ଅଧିକ ଘଣ୍ଟା କାମ କରିବା ପରିବର୍ତ୍ତେ ଯେତିକି ସମୟ କାମ କରୁଛ ଭଲ କାମ କର । କ୍ବାଣ୍ଟିଟି ନୁହେଁ କ୍ବାଲିଟି କାମ ଉପରେ ଫୋକସ କରିବା ଦରକାର ।
ସେହିପରି ସପ୍ତାହକୁ ୯୦ ଘଣ୍ଟା କାମ କରିବା ବିତର୍କ ଉପରେ ମ୍ୟୁଚୁଆଲ ଫଣ୍ଡ କମ୍ପାନୀର ପ୍ରଥମ ମହିଳା ସିଇଓ ତଥା ଏମଡି ରାଧିକା ଗୁପ୍ତା କହିଛନ୍ତି, ପ୍ରଥମ ଚାରିକିରେ ସପ୍ତାହକୁ ୧୦୦ ଘଣ୍ଟା କାମ କରୁଥିଲି । ୪ ମାସ ଯାଏ ସପ୍ତାହରୁ ୧୦୦ ଘଣ୍ଟା କାମ କରୁଥିଲି । ସପ୍ତାହକୁ ଦିନେ ଛୁଟି ନେଇ ପ୍ରତି ଦିନ ୧୮ ଘଣ୍ଟା କାମ କରୁଥିଲି । ସେତେବେଳେ ରବିବାର ପରିବର୍ତ୍ତେ ସୋମବାର ଛୁଟି ମିଳୁଥିଲା । କାରଣ ରବିବାର କ୍ଲାଇଣ୍ଟଙ୍କ ସହ ସାଇଟକୁ ଯିବାକୁ ପଡୁଥିଲା । ସେତେବେଳେ ରାଧିକା ୯୦ ପ୍ରତିଶତ ଦୁଃଖୀ ରହୁଥିଲି । ଅଫିସ ବାଥରୁମରେ କାନ୍ଦୁଥିଲି । ଦେହ ଖରାପ ହୋଇଯାଇଥିଲା । ୨ ଥର ଡାକ୍ତରଖାନାରେ ଭର୍ତ୍ତି ହୋଇଥିଲି । ୧୦୦ ଘଣ୍ଟା କାମ କରିବା ସତ୍ତ୍ବେ ଏହାର ପରିଣାମ ଭଲ ନଥିଲା ।
