ଗୁଣପୁର, ୧୦/୧୦ : ଚାରିଆଡ଼େ ପାର୍ବଣର ମାହୋଲ । ବିଭିନ୍ନ ସ୍ଥାନରେ ଚାଲିଛି ନବରାତ୍ର ପୂଜା । ଆଉ ଦୁଇଦିନ ପରେ ଦଶହରା । ଏହି ପରିପ୍ରେକ୍ଷୀରେ ଏବେଠୁ ହିଁ ଦଶହରା ବଳି ପାଇଁ ଚିନ୍ତା ବଢ଼ିଛି । ଏହାକୁ ଦୃଷ୍ଟିରେ ରଖି ବଜାରରେ ଦେଶୀ ଗଞ୍ଜାର ଅହେତୁକ ଦର ବୃଦ୍ଧି ହୋଇଛି । ଗୋଟିଏ ଦେଶୀ ଗଞ୍ଜା ହଜାରେ ଟଙ୍କାରେ ବିକ୍ରି ହେଉଥିବା ଦେଖିବାକୁ ମିଳିଛି । 

ଗୁଣପୁରରେ ଦଶହରାରେ ବଳିପୂଜା ପ୍ରଥା ଆଜିବି ରହିଛି । କେଉଁଠି ବୋଦା ତ ଆଉ କେଉଁଠି କୁକୁଡ଼ା ବଳି ଦିଆଯାଉଛି । ଗାଡ଼ି ମୋଟରଠାରୁ ଆରମ୍ଭ କରି ବିଭିନ୍ନ କାରଖାନା ପୂଜାରେ ବଳି ପକାଯାଉଛି । ସୁବିଧା ଦୃଷ୍ଟିରୁ ଅଧିକାଂଶ ଲୋକ କୁକୁଡ଼ା ବଳି ଦେବାକୁ ଅଧିକ ପସନ୍ଦ କରୁଛନ୍ତି । ଗ୍ରାମାଞ୍ଚଳ ଓ ଡଙ୍ଗର ଅଞ୍ଚଳରୁ ସକାଳ ହେଲେ ସହରକୁ ଶତାଧିକ ଗଞ୍ଜା ଆସୁଛି । ଦର ବୃଦ୍ଧି ସତ୍ତ୍ଵେ କ୍ଷଣିକରେ ବିକ୍ରି ହୋଇଯାଉଛି । ଏକ କେଜିଠାରୁ କମ୍‌ ଓଜନର ଗଞ୍ଜା ଗୋଟାକ ହଜାରେ ଟଙ୍କାରେ ବିକ୍ରି ହେଉଛି । ଦଶହରା ପରେ ପିକନିକ୍‌ ଋତୁ ଆରମ୍ଭ ହେବ । ତେଣୁ ଦେଶୀ କୁକୁଡ଼ା ଦର ଆହୁରି ଉପରମୁହାଁ ହେବାର ସମ୍ଭାବନା ଥିବା ବ୍ୟବସାୟୀମାନେ କହିଛନ୍ତି ।