ନୂଆଦିଲ୍ଲୀ: ଶନିବାର ହମାସ ଆଉ ତିନି ଜଣ ଇସ୍ରାଏଲ୍ ବନ୍ଧକଙ୍କୁ ମୁକ୍ତ କରିଛି। ବନ୍ଧକ ମାନଙ୍କୁ ମୁକ୍ତ କରିବା ପୂର୍ବରୁ ହାମାସ୍ ଉକ୍ତ ବନ୍ଧକମାନଙ୍କୁ ଗାଜାର ହଜାର ହଜାର ଲୋକଙ୍କ ସାମ୍ନାରେ ପରେଡ୍ କରେଇବା ସହ ମଞ୍ଚରେ ନିଜ ଭାଷଣ ରଖିବାକୁ କୁହାଯାଇଥିଲା। ତେବେ ପୂର୍ବରୁ ମୁକ୍ତ କରାଯାଇଥିବା ବନ୍ଧକମାନଙ୍କ ସହ ଏପରି ଅନୁଚିତ ବ୍ୟବହାର ପ୍ରଦର୍ଶନ କରାଯାଇ ନଥିଲା। ଏହାଲହ ବନ୍ଧକମାନଙ୍କୁ ମୁକ୍ତ କରାଯିବା ସମୟରେ, ସେଠାରେ ବହୁ ସଂଖ୍ୟାରେ ହାମାସର ସଶସ୍ତ୍ର ଯୋଦ୍ଧା ଉପସ୍ଥିତ ରହିଥିଲେ।
ଇସ୍ରାଏଲ ଏବଂ ହାମାସ ମଧ୍ୟରେ ଚାଲିଥିବା ଅସ୍ତ୍ରବିରତି ଚୁକ୍ତି ଅନେକ ବାଧାବିଘ୍ନ ସତ୍ତ୍ୱେ ଜାରି ରହିଛି। ହୋଇଥିବା ଚୁକ୍ତିନାମା ଅନୁଯାୟୀ ଗାଜା ପକ୍ଷରୁ ଶନିବାର ଆଉ ତିନି ଜଣ ବନ୍ଧକଙ୍କୁ ମୁକ୍ତ କରାଯାଇଥିଲା। ସୂଚନା ମୁତାବକ, ହାମାସର ଆତଙ୍କୀ ଗୋଷ୍ଠୀ ଅକ୍ଟୋବର ୭ ତାରିଖ ୨୦୨୩ ମସିହାରେ ଇସ୍ରାଏଲ ଉପରେ ଆକ୍ରମଣ କରି ଇସ୍ରାଏଲି ନାଗରିକମାନଙ୍କୁ ବନ୍ଧକ କରି ନେଇଥିଲେ। ଆଉ ଏହାପରେ ଉଭୟଙ୍କ ମଧ୍ୟରେ ଯୁଦ୍ଧ ଆରମ୍ଭ ହୋଇଯାଇଥିଲା। ପରେ ଯୁଦ୍ଧବିରତି ମାଧ୍ୟମରେ ଉଭୟ ପକ୍ଷ ଉଭୟଙ୍କ ଦେଶରେ ଥିବା ବନ୍ଧୀ ନୀଗରିକମାନଙ୍କୁ ମୁକ୍ତ କରିବାକୁ ନିଷ୍ପତ୍ତି ନେଇଥିଲେ। ଇସ୍ରାଏଲ ଏବଂ ହମାସ୍ ମଧ୍ୟରେ ଏହା ହେଉଛି ପଞ୍ଚମ ଅଦଳବଦଳ ପ୍ରକ୍ରିୟା| ଏହି ଅଦଳବଦଳ ପ୍ରକ୍ରିୟାରେ ଇସ୍ରାଏଲ ଦ୍ୱାରା ଶହ ଶହ ପାଲେଷ୍ଟାଇନ ବନ୍ଦୀଙ୍କୁ ମୁକ୍ତ କରାଯାଇଛି।
ସୂଚନା ମୁତାବକ, ଇସ୍ରାଏଲ ଏବଂ ହାମାସ ମଧ୍ୟରେ ହୋଇଥିବା ଏହି ଅସ୍ତ୍ରବିରତି ଚୁକ୍ତି ଏକ ଅତ୍ୟନ୍ତ ସମ୍ବେଦନଶୀଳ ମାମଲା। ଅନେକ ଥର ଏହି ଚୁକ୍ତି ଭଙ୍ଗ ହେବାର ଆଶଙ୍କା କରାଯାଉଥିଲା। ଗତଥର ଜଣେ ମହିଳା ବନ୍ଧକଙ୍କୁ ମୁକ୍ତ କରିବା ସମୟରେ ଉଭୟ ପକ୍ଷ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଗତ ମଙ୍ଗଳବାର ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଆମେରିକା ଗସ୍ତ ସମୟରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗାଜାକୁ ନିୟନ୍ତ୍ରଣ କରିବା ଏବଂ ବିସ୍ଥାପିତ ଲୋକମାନଙ୍କୁ ଗାଜା ବାହାରେ ଅବସ୍ଥାପିତ କରିବାକୁ ପରାମର୍ଶ ଦେଇଥିଲେ। ଟ୍ରମ୍ପଙ୍କ ଏହି ପରାମର୍ଶକୁ ନେଇ ଆରବ ଦେଶମାନଙ୍କ ସହ ପାଲେଷ୍ଟାଇନବାସୀ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି।
ବର୍ତ୍ତମାନ ଦ୍ୱିତୀୟ ପର୍ଯ୍ୟାୟ ଅସ୍ତ୍ରବିରତି ସମ୍ପର୍କରେ ଇସ୍ରାଏଲ ଏବଂ ହାମାସ ମଧ୍ୟରେ ଆଲୋଚନା ଚାଲିଛି। ତେବେ ଉଭୟ ଦେଶ ମଧ୍ୟରେ ଏନେଇ ଏପର୍ଯ୍ୟନ୍ତ ଯାଏ କୈଣସି ସହମତି ହୋଇପାରି ନାହିଁ। ଦ୍ୱିତୀୟ ପର୍ଯ୍ୟାୟରେ ପ୍ରାୟ ୧୨ରୁ ଅଧିକ ଇସ୍ରାଏଲି ବନ୍ଧକ ମୁକ୍ତ ହୋଇପାରନ୍ତି। ଶନିବାର ଦିନ ଇସ୍ରାଏଲ ପକ୍ଷରୁ ମୁକ୍ତ କରାଯାଇଥିବା ପାଲେଷ୍ଟାଇନ ନାଗରିକମାନଙ୍କ ମଧ୍ୟରେ ଏପରି ୧୮ ଜଣ ଲୋକ ରହିଛନ୍ତି ଯେଉଁମାନେ ଆଜୀବନ କାରାଦଣ୍ଡାଦେଶ ଭୋଗୁଥିଲେ।
