ପଟ୍ଟାମୁଣ୍ଡାଇ,୦୧/୧୧: ନଭେମ୍ବର ୧ ତାରିଖରୁ ଆରମ୍ଭ କରି ସାତ ମାସ ପର୍ଯ୍ୟନ୍ତ ଗହୀର ମଥା ସାମୁଦ୍ରିକ ଅଭୟାରଣ୍ୟରେ ମାଛ ଧରା ଉପରେ ନିୟମକୁ କଡାକଡି କଟକଣା କରାଯାଇଛି । ଧାମରା ଠାରୁ ଦେବୀ ମୁହାଣ ଯାଏ ସମୁଦ୍ର କୂଳରୁ କୋଡିଏ କିଲୋମିଟର ପର୍ଯ୍ୟନ୍ତ ଟ୍ରଲର ମାଛ ମାରିବାକୁ ବାରଣ କରିଛି ରାଜନଗର ବନ ବିଭାଗ ।

ନଭେମ୍ବର ୧ତାରିଖ ଠାରୁ ମେ ୩୧ ତାରିଖ ଯାଏ ଗହୀର ମଥାକୁ ଶହ ଶହ ନଟିକାଲ ମାଇଲ ଅତିକ୍ରମ କରି ଦେଶ ବିଦେଶରୁ ଅଲିଭ ରିଡଲେ କଇଁଛ ବଂଶ ବିସ୍ତାର ପାଇଁ ଆସିଥାନ୍ତି । କଇଁଛମାନେ ପ୍ରଜନନ କରିବା ପରେ ଅଣ୍ଡା ଦେଇ ଛୁଆ ହେବା ପରେ ପୁଣି ନିଜ ନିଜ ଅଞ୍ଚଳକୁ ଫେରି ଯାଆନ୍ତି । ଟ୍ରଲର ଚଳାଚଳ ଯୋଗୁଁ କଇଁଛ ମରୁଥିବାରୁ ବନ ବିଭାଗ ଏଭଳି ପଦକ୍ଷେପ ନେଇଛି । ଏହି ଅଞ୍ଚଳରେ ତୀକ୍ଷ୍ଣ ନଜର ରଖିବା ସହ ସମୁଦ୍ର ଭିତରେ ଥିବା ସୀମାକୁ ଟପି ନିଷିଦ୍ଧାଞ୍ଚଳ ନଯିବାକୁ ମତ୍ସ୍ୟଜୀବୀ ମାନଙ୍କୁ ବନ ବିଭାଗ ନିବେଦନ କରିଛି ।