ହରଭଙ୍ଗା, ୧୨/୧୧ : ବସ୍‌କୁ ଓଭୋରଟେକ୍ କରିବା ବେଳେ ମର୍ମନ୍ତୁଦ ଦୁର୍ଘଟଣା। ଭାରସାମ୍ୟ ହରାଇ ରାସ୍ତାରେ ଘୋଷାଡ଼ି ହୋଇପଡିଲା ବାଇକ୍। ଭାଇ-ଭଉଣୀ ଗୁରୁତର। ହରଭଙ୍ଗା ଥାନା ଚାରିଛକ-ଶୀତଲପାଣି ପୂର୍ତ୍ତ ରାସ୍ତା ଖରଭୂଇଁ କଙ୍କଡା ପଥର ବୁଲାଣିରେ ଘଟିଛି ଏଭଳି ମର୍ମନ୍ତୁଦ ଦୁର୍ଘଟଣା।

ସୂଚନା ଅନୁଯାୟୀ, ବୌଦ୍ଧ ଜିଲ୍ଲା ହରଭଙ୍ଗା ଥାନା ଛତ୍ରଙ୍ଗ ଗ୍ରାମର ରାଜେନ୍ଦ୍ର ପ୍ରଧାନ (୨୫ ବର୍ଷ) ଓ ଭଉଣୀ ରୋଜାଲିନ ପ୍ରଧାନ(୨୧ ବର୍ଷ) ଏକ ବାଇକ୍ ଯୋଗେ ସକାଳ ପ୍ରାୟ ୭ଟାରେ ଚାରିଛକ ଯାଉଥିଲେ। ଏତିକି ବେଳେ ଚାରିଛକ-ଶୀତଲପାଣି ପୂର୍ତ୍ତ ରାସ୍ତା ଖରଭୂଇଁ କଙ୍କଡା ପଥର ବୁଲାଣିରେ ଏକ ବସ୍‌କୁ ଓଭୋରଟେକ୍ କରି ଆଗକୁ ଯାଇଥିଲେ। ରାସ୍ତା ବୁଲାଣି ଥିବାରୁ ଭାରସାମ୍ୟ ହରାଇ ବାଇକ୍‌ଟି ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ, ରୋଜାଲିନ୍ ପ୍ରାୟ ୫୦ ମିଟର ଦୂରକୁ ଛିଟିକି ପଡିଥିଲେ। ସେହିପରି ରାଜେନ୍ଦ୍ରଙ୍କ ମୁହଁ, ମୁଣ୍ଡ ମାଡ଼ ହେବା ସହିତ ହାତ ଆଙ୍ଗୁଠି ଛିଣ୍ଡି ପଡିଥିଲା। ସ୍ଥାନୀୟ ଲୋକେ ଉଭୟ ଭାଇ-ଭଉଣୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପୁରୁଣାକଟକ ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଦୁହିଁଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେବାକୁ ଭୁବନେଶ୍ଵରକୁ ସ୍ଥାନାନ୍ତର କରାଯାଇଛି।