ଲକ୍ଷ୍ନୌ: ଉତ୍ତର ପ୍ରଦେଶର ମୋରାଦାବାଦର ଜଣେ ଇରାନୀ ଝିଅ ପ୍ରଧାନମନ୍ତ୍ରୀ ମୋଦୀଙ୍କୁ ନିବେଦନ କରି ଚର୍ଚ୍ଚାକୁ ଆସିଛନ୍ତି । ଇରାନର ଝିଅ ଫୈଜା ମୋରାଦାବାଦର ଜଣେ ପୁଅ ଦିବାକରଙ୍କୁ ବିବାହ କରିଛନ୍ତି ଏବଂ ସେ ଭାରତରେ ରହୁଛନ୍ତି । ଏବେ ଇସ୍ରାଏଲ ଏବଂ ଇରାନ୍ ଯୁଦ୍ଧ ଚାଲିଥିବା ବେଳେ ସେ ନିଜ ପରିବାରକୁ ନେଇ ଚିନ୍ତିତ ହୋଇପଡ଼ିଛନ୍ତି ।  ପରିବାର ସଂପର୍କରେ ଭାବି ସେ ଭାବପ୍ରବଣ ହୋଇପଡ଼ିବା ସହ ସାହାଯ୍ୟ ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ନିବେଦନ କରିଛନ୍ତି ।

ସେ ତାଙ୍କ ସ୍ୱାମୀ ଦିବାକରଙ୍କ ସହ ମୋରାଦାବାଦରେ ରୁହନ୍ତି । ଯିଏ ଜଣେ YouTuber ଏବଂ ଏକ କାଫେ ଚଳାନ୍ତି। କିନ୍ତୁ ଇରାନ ଏବଂ ଇସ୍ରାଏଲ ମଧ୍ୟରେ ବର୍ତ୍ତମାନର ଯୁଦ୍ଧ ଫୈଜାଙ୍କୁ ଗଭୀର ଚିନ୍ତାରେ ପକାଇଛି। ସେ ଇରାନରେ ରହୁଥିବା ତାଙ୍କ ପରିବାର ସହିତ ଯୋଗାଯୋଗ କରିପାରୁନାହାଁନ୍ତି। ଫୈଜା କୁହନ୍ତି ଯେ, ତାଙ୍କ ପରିବାର ଇରାନର ହମଦାନ ଅଞ୍ଚଳରେ ରୁହନ୍ତି, ଯେଉଁଠାରେ ପରିସ୍ଥିତି ଖରାପ ହୋଇପଡ଼ିଛି । ସେଠାକାର ସାଧାରଣ ଲୋକ ଭୟରେ ବଞ୍ଚିବାକୁ ବାଧ୍ୟ ହେଉଛନ୍ତି। ଯୁଦ୍ଧ ଯୋଗୁଁ ପ୍ରତ୍ୟେକ ମୁହୂର୍ତ୍ତରେ ସେମାନଙ୍କ ଜୀବନ ଦୁର୍ବିସହ ହୋଇପଡ଼ିଛି । 

ଫୈଜା କହିଛନ୍ତି ଯେ, ଯୁଦ୍ଧ କେବଳ ଶାରୀରିକ ନୁହେଁ ବରଂ ମାନସିକ ଭାବରେ ମଧ୍ୟ ଲୋକଙ୍କୁ କ୍ଷତି ପହଞ୍ଚାଏ। ସେ କହିଛନ୍ତି ଯେ, ଆମେ ଆଶା କରୁଛୁ ପରିସ୍ଥିତି ଶୀଘ୍ର ସୁଧୁରିବ ଏବଂ ଯୁଦ୍ଧ ବନ୍ଦ ହେବ। ଯେତେବେଳେ ଫୈଜାଙ୍କୁ ତାଙ୍କ ପରିବାର ବିଷୟରେ ପଚରାଗଲା, ସେ ତାଙ୍କର ଲୁହକୁ ରୋକି ପାରିଲେ ନାହିଁ। ସେ ଭାବପ୍ରବଣ ହୋଇ କହିଛନ୍ତି, ସେ ତାଙ୍କ ପରିବାରର ସଦସ୍ୟଙ୍କ ସ୍ୱର ଶୁଣିବାକୁ ଆଗ୍ରହୀ। ସେ ଅନେକ ଦିନ ଧରି ତାଙ୍କ ପିତାମାତା ଏବଂ ଭାଇଭଉଣୀଙ୍କ ସହ କଥା ହୋଇନାହାଁନ୍ତି। ସେ ଏହା ମଧ୍ୟ କହିଛନ୍ତି ଯେ, ସେ ଭାରତ ସରକାରଙ୍କୁ ଏହି ଯୁଦ୍ଧ ବନ୍ଦ କରିବା ପାଇଁ ଦୃଢ଼ ପଦକ୍ଷେପ ନେବାକୁ ଅନୁରୋଧ କରୁଛନ୍ତି। 

ଫୈଜା ବିଶେଷ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଉଭୟ ଦେଶର ନେତାଙ୍କ ସହ ଯୋଗାଯୋଗ କରି ଶାନ୍ତି ପ୍ରତିଷ୍ଠା ଦିଗରେ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଫୈଜା ବିଶ୍ୱାସ ପ୍ରକାଶ କରିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀଙ୍କ ଭଳି ପ୍ରଭାବଶାଳୀ ନେତା ମଧ୍ୟସ୍ଥତା କଲେ ଯୁଦ୍ଧ ବନ୍ଦ ହୋଇପାରିବ ଏବଂ ନିର୍ଦ୍ଦୋଷ ଲୋକଙ୍କ ଜୀବନ ରକ୍ଷା ହୋଇପାରିବ।