କଟକ,୩୦/୦୮: କଟକ ସହରରେ ପୂଜା ଆୟୋଜନ ଦିନକୁ ଦିନ ଜଟିଳ ହେବାରେ ଲାଗିଛି । ହାଇକୋର୍ଟଙ୍କ ନିର୍ଦ୍ଦେଶ ଆଳ ଦେଖାଇ ପ୍ରଶାସନ ପକ୍ଷରୁ ଜବଦରଦସ୍ତ ବିଭିନ୍ନ ସର୍ତ୍ତ ଲଦି ଦିଆଯାଉଥିବା ଅଭିଯୋଗ ହୋଇଛି । ଯଦିଓ ପ୍ରଥମଥର ପାଇଁ ଏଥର ବ୍ୟବସ୍ଥାରେ ସୁଧାର ଆଣି ପ୍ରଶାସନ ତରଫରୁ ସିଙ୍ଗଲ୍ ୱିଣ୍ଡୋ ବ୍ୟବସ୍ଥା ଲାଗୁ କରାଯାଇଛି । ଅର୍ଥାତ୍ ପୂଜା ପାଇଁ ଆବଶ୍ୟକ ଅନୁମତି ପାଇବା ପୂର୍ବରୁ ଦରକାରୀ କାଗଜପତ୍ର ଗୁଡ଼ିକ ପୂଜା କମିଟି ଏବଂ କ୍ଲବ୍ମାନେ ବାରବାଟୀ ପ୍ୟାଲେସ୍ ଠାରେ ପାଇପାରିବେ । ଏଠାରେ ସବୁ ଲାଇନ୍ ଡିପାର୍ଟମେଣ୍ଟ୍କୁ ଏକାଠି କରାଯାଇଥିବା ବେଳେ ଗୋଟିଏ ଜାଗାରେ ସମସ୍ତ ଡକ୍ୟୁମେଣ୍ଟ୍ ପାଇବାର ସୁଯୋଗ ରହିଛି । କିନ୍ତୁ ପୂଜା ଆୟୋଜନ କରିବାରେ ଦିନକୁ ଦିନ କାଗଜପତ୍ର ବୋଝ ବଢ଼ି ଚାଲିଥିବାରୁ ଏହାକୁ ନେଇ ପୂଜା କମିଟିମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
ଗଣେଶ ପୂଜା ସରିଛି । ଆଗକୁ ତିନି ପର୍ଯ୍ୟାୟରେ ଭସାଣି ଯାତ୍ରା ଅନୁଷ୍ଠିତ ହେବ । ତା’ ପରକୁ ଆସୁଛି କଟକ ପ୍ରସିଦ୍ଧ ଦୁର୍ଗାପୂଜା । ଆୟୋଜନକୁ ନେଇ ପୂଜା କମିଟି, ଆୟୋଜକମାନେ ତତ୍ପର ହୋଇଥିବା ବେଳେ ପ୍ରଶାସନିକ କଟକଣା ଏବେ ଚିନ୍ତାର କାରଣ ପାଲଟିଛି । ନିକଟରେ ଗଣେଶ ପୂଜା ସମୟରେ ପ୍ରଶାସନ ଓ ପୁଲିସ ପକ୍ଷରୁ କଟକଣା ଜାରି କରାଯାଇଥିଲା । ଯେଉଁଠି ସ୍ୱାଗତ ତୋରଣ କରାଯାଇଥିଲା, ସେ ସବୁକୁ ଖୋଲିବାକୁ ନିର୍ଦ୍ଦେଶ ଦିଆଯାଇଥିଲା । ଏ ବାବଦରେ ହାଇକୋର୍ଟଙ୍କ ନିର୍ଦ୍ଦେଶ ରହିଥିଲା ବୋଲି ପୁଲିସ ସ୍ପଷ୍ଟୀକରଣ ଦେଉଛି । ତେବେ ହାଇକୋର୍ଟ କେଉଁଠି ସ୍ୱାଗତ ତୋରଣ କରିବାକୁ ମନା କରିନାହାନ୍ତି । ବରଂ ତୋରଣ କିଭଳି ରାସ୍ତା ଅବରୋଧ କରୁ ନଥିବ ସେ ଦିଗରେ ନଜର ଦେବାକୁ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି । କିନ୍ତୁ ପୁଲିସ ରାସ୍ତା ଅବରୋଧ ହେଉଛି କି ନାହିଁ ନଦେଖି ସିଧାସଳଖ ତୋରଣ କାଢ଼ିବାକୁ ପୂଜା ଆୟୋଜକ ବିଭିନ୍ନ କ୍ଲବ୍ ମାନଙ୍କୁ ମୌଖିକ ନିର୍ଦ୍ଦେଶ ଦେଇଥିଲା । ଏନେଇ କ୍ଲବ୍ କାର୍ଯ୍ୟକର୍ତ୍ତାଙ୍କ ଭିତରେ ଅସନ୍ତୋଷ ରହିଛି । ସେହିପରି ଆଗକୁ ଭସାଣି ଯାତ୍ରା ପାଇଁ ଅନୁମତି ପାଇବାକୁ ବିଭିନ୍ନ ସର୍ତ୍ତ ପ୍ରଶାସନ ପକ୍ଷରୁ ରଖାଯାଇଛି ।
ତେବେ ଚଳିତବର୍ଷ ପୂଜା ପାଇଁ ଅର୍ଥାତ୍ ଗଣେଶ ପୂଜା ଠାରୁ କାର୍ତ୍ତିକେଶ୍ୱର ପୂଜା ଯାଏ ସବୁଥିରେ ଅନୁମତି ପାଇବାକୁ ହେଲେ ତିନି ପର୍ଯ୍ୟାୟରେ ପ୍ରାୟ ୨୭ଟି ଡକ୍ୟୁମେଣ୍ଟ୍ ଦରକାର ପଡୁଛି । ପୂଜା ଓ ପ୍ରୋସେସନ୍ ପାଇଁ ୧୦ଟି, ମେଲୋଡି ଏବଂ ମ୍ୟୁଜିକାଲ୍ କାର୍ଯ୍ୟକ୍ରମ ପାଇଁ ୧୦ଟି ଏବଂ ତୋରଣ ପାଇଁ ୭ଟି ଡକ୍ୟୁମେଣ୍ଟ୍ ଲୋଡ଼ିବ ପ୍ରଶାସନ । ପୂଜା ଓ ପ୍ରୋସେସନ୍ ପାଇଁ ଆୟୋଜକମାନେ ଡିସିପିଙ୍କୁ ଏକ ଅନୁରୋଧପତ୍ର ଲେଖିବେ । ତା’ସହିତ ଦୁଇଟି ଟ୍ରେଜେରୀ ଚାଲାଣ, ଇଣ୍ଡେମ୍ନିଟି ବଣ୍ଡ୍, ବ୍ୟାଣ୍ଡ୍ ଓ ସାଉଣ୍ଡ୍ର ରସିଦ୍ ଦେବାକୁ ପଡ଼ିବ । ଏ ସବୁ ପ୍ରକ୍ରିୟା ପୂର୍ବରୁ ରହିଥିଲା । କିନ୍ତୁ ଏଥର ଜମି ପାଇଁ ସିଏମ୍ସି/ସିଡିଏ/ପୂର୍ତ୍ତ ବିଭାଗ/ ତହସିଲଦାରଙ୍କ ଠାରୁ ଏନ୍ଓସି ସହିତ ଅଗ୍ନିଶମ, ପୂର୍ତ୍ତ, ଇଲେକ୍ଟ୍ରିକାଲ୍ ଇନ୍ସପେକ୍ଟରଙ୍କଠାରୁ ଏନ୍ଓସି ହାସଲ କରିବାକୁ ହେବ ।
ସେହିପରି ମେଲୋଡି କାର୍ଯ୍ୟକ୍ରମ ପାଇଁ ସ୍ୱତନ୍ତ୍ର ଭାବେ ଆଉ ଏକ ଆବେଦନପତ୍ର ସହ ଚାଲାଣ, ଇଣ୍ଡେମ୍ନିଟି ବଣ୍ଡ୍, ଜମି, ଅଗ୍ନିଶମ, ପୂର୍ତ୍ତ, ଟାଟା ପାୱାର କର୍ତ୍ତୃପକ୍ଷଙ୍କ ଠାରୁ ଆଉ ଏକ ଲାଇସେନ୍ସ ହାସଲ କରିବାକୁ ଆୟୋଜକ ମାନେ ବାଧ୍ୟ ହେବେ । ପୂଜା କିମ୍ବା ପ୍ରୋସେସନ୍ ପାଇଁ ନେଇଥିବା ଲାଇସେନ୍ସ ସାଂସ୍କୃତିକ କାର୍ଯ୍ୟକ୍ରମ ପାଇଁ ଲାଗୁ ହେବ ନାହିଁ । ଲାଇସେନ୍ସ ପାଲା ସେତିକିରେ ଅଟକିନି । ବିଭିନ୍ନ ଗେଟ୍ ବା ତୋରଣ କରୁଥିବା ପୂଜା କମିଟିମାନେ ଉପରୋକ୍ତ ଦୁଇ ଲାଇସେନ୍ସ ଛଡ଼ା ଆଉ ଏକ ଅତିରିକ୍ତ ଲାଇସେନ୍ସ ହାତରେ ଧରିବେ । ସେଥିରେ ମଧ୍ୟ ସମାନ ଡକ୍ୟୁମେଣ୍ଟ୍ ଦରକାର ହେବ । ଏହାସହ ପୂର୍ତ୍ତ ବିଭାଗରୁ ଆୟୋଜକମାନେ ଏକ ସେଫ୍ଟି ସାର୍ଟିଫିକେଟ୍ ମଧ୍ୟ ଆବେଦନ କରି ହାସଲ କରିବାକୁ କୁହାଯାଇଛି । ଏହାକୁ ନେଇ ସମସ୍ୟା ଉପୁଜିବାର ଆଶଙ୍କା ରହିଛି ।
ମିଳିଥିବା ଖବର ମୁତାବକ, ପୂର୍ତ୍ତ ବିଭାଗକୁ ଆବେଦନ କରିବା ପରେ ଅଧିକାରୀ ଓ କର୍ମଚାରୀମାନଙ୍କ ଉପସ୍ଥିତିରେ ବାଉଁଶ ବନ୍ଧାଯିବ ।କେଉଁଠି କେତେ ଖୋଳାଯିବ, କେତେ ଫୁଟ୍ରେ ବାଉଁଶ ଷ୍ଟ୍ରକଚର୍ ରହିବ ଇତ୍ୟାଦି ସବୁ ପରଖିବେ ଅଧିକାରୀ। ପୂର୍ତ୍ତ ବିଭାଗ ଅଧିକାରୀମାନେ ଯେଉଁ ମାର୍ଗଦର୍ଶିକା ଜାରି କରିବେ ତାହାରି ମୁତାବକ, ତୋରଣ ଓ ଅସ୍ଥାୟୀ ପୂଜା ପେଣ୍ଡାଲ୍ କରାଯିବ । ଗୋଟିଏ ଗୋଟିଏ ପୂଜା କମିଟି ୧୦ରୁ ଅଧିକ ତୋରଣ (ଲାଇଟ୍, କପଡ଼ା ଓ ବିଭିନ୍ନ ପରିକଳ୍ପନାପୂର୍ଣ୍ଣ ଗେଟ୍) କରିଥାନ୍ତି । ତେଣୁ ପୂର୍ତ୍ତ ବିଭାଗ ଦେଢ଼ ଶହରୁ ଅଧିକ ପୂଜା କମିଟିର ତୋରଣ ବା ପୂଜା ପେଣ୍ଡାଲ୍ ଡେକୋରେସନ୍ କେମିତି ପରଖିବେ ତାକୁ ନେଇ ପ୍ରଶ୍ନ ଉଠିଲାଣି। ଏ ସମ୍ପର୍କରେ ରାଣୀହାଟ ପୂଜା କମିଟିର ସଭାପତି ବିଜୟ ସାହୁଙ୍କୁ ପଚାରିବାରେ ସେ କହିଛନ୍ତି, ପୂଜା ଆୟୋଜନରେ ବ୍ୟବସ୍ଥାକୁ ସରଳ କରାଯିବା ଦରକାର । କିନ୍ତୁ ଦିନକୁ ଦିନ ପ୍ରକ୍ରିୟା ଜଟିଳ ହେବାରେ ଲାଗିଛି ।
ପୂର୍ବବର୍ଷ ମାନଙ୍କରେ ଯେଉଁ ସବୁ ସର୍ତ୍ତ ରଖାଯାଇଛି, ସବୁଥିରେ ଆମେ ରାଜି ହୋଇଛୁ । ଏଥର ପୂର୍ତ୍ତ ବିଭାଗ ଯେଉଁ ତୋରଣ ସାର୍ଟିଫିକେଟ୍ ଦେବ ତାକୁ ନେଇ ଦ୍ୱନ୍ଦ୍ୱ ଉପୁଜିଛି । ସେହିପରି ଟାଉନ୍ହଲ୍ ପୂଜା କମିଟି ସମ୍ପାଦକ ଡ. ଦ୍ୱୀପାୟନ ପଟ୍ଟନାୟକ କହିଛନ୍ତି, ବାରମ୍ବାର ଆପତ୍ତି ଉଠାଇବା ପରେ ଏବେ ସିଙ୍ଗଲ ୱିଣ୍ଡୋ ବ୍ୟବସ୍ଥା କରାଗଲା । କିନ୍ତୁ ଏତେ ସଂଖ୍ୟାରେ କାଗଜପତ୍ର ଦରକାର ପଡୁଛି ଯେ, ଆୟୋଜକମାନେ ଆକର୍ଷଣୀୟ ଢଙ୍ଗରେ ପୂଜା କରିବାକୁ ଭୟ କରିବା ଆରମ୍ଭ କଲାଣି। ସତ୍ୟପାଠ କିମ୍ବା ଇନ୍ସରାନ୍ସ ବ୍ୟବସ୍ଥା କଲେ କାମ ସରନ୍ତା । କିନ୍ତୁ କାଗଜପତ୍ର ବୋଝ ବଢ଼ିବା ଆମକୁ ଅସୁବିଧାରେ ପକାଉଛି ।
