ନୂଆଦିଲ୍ଲୀ,୦୪/୦୨: ରାତି ପାହିଲେ ଦିଲ୍ଲୀ ବିଧାନସଭା ନିର୍ବାଚନ । ଏହା ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ଅଡୁଆରେ ପଡିଛନ୍ତି । ତାଙ୍କ ବିରୋଧରେ ବିଏନଏସ ଧାରା ୧୮୮ରେ ମାମଲା ରୁଜ୍ଜୁ ହୋଇଛି । ଆତିଶୀ ଓ ତାଙ୍କ ସମର୍ଥକଙ୍କ ବିରୋଧରେ ସରକାରୀ କାମରେ ବାଧା ସୃଷ୍ଟି କରିଥିବା ନେଇ ମାମଲା ରୁଜ୍ଜୁ ହୋଇଛି । ଜଣେ ପୋଲିସ ଅଧିକାରୀଙ୍କୁ ଚାପୁଡା ମାରିବା ଘଟଣାରେ ଆତିଶୀ ଓ ତାଙ୍କ ସମର୍ଥକଙ୍କ ବିରୋଧରେ ମାମଲା ଦାୟର ହୋଇଛି ।
କଣ ମାମଲା- ଯେଉଁ ଭିଡିଓ ଆଧାରରେ ଦିଲ୍ଲୀ ପୋଲିସ ମାମଲା ରଜ୍ଜୁ କରିଛି ସେଥିରେ ସିଏମ ଆତିଶୀଙ୍କ ସମର୍ଥକ ସାଗର ମେହତା ଜଣେ ପୋଲିସଙ୍କୁ ଚାପୁଡା ମାରିଥିବା ଦେଖିବାକୁ ମିଳିଛି । ଦିଲ୍ଲୀ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଆତିଶୀ ଓ ତାଙ୍କ ସମର୍ଥକଙ୍କ ବିରୋଧରେ ବିଏନଏସ ଧାରା ୧୮୮ରେ ମାମଲା ରୁଜ୍ଜୁ ହୋଇଛି । ସରକାରୀ କାର୍ଯ୍ୟରେ ବାଧା ସୃଷ୍ଟି କରୁଥିବା ଅଭିଯୋଗରେ ମାମଲା ପଞ୍ଜୀକୃତ ହୋଇଥିବା ଜଣାପଡିଛି । ଜଣେ ପୋଲିସକର୍ମୀ ଭିଡିଓ କରୁଥିଲେ । ଗାଡିର ଲମ୍ବା ଲାଇନ ଲାଗିଥିଲା । ସେହି ସମୟରେ ଆତିଶୀ ତାଙ୍କ ସମର୍ଥକଙ୍କ ସହ ପହଞ୍ଚିଥିଲେ । ଜଣେ ସମର୍ଥକ ସାଗର ପୋଲିସଙ୍କ ଉପରକୁ ହାତ ଉଠାଇଥିଲେ । ଫଳରେ ଫୋନ୍ ତଳେ ପଡି ଯାଇଥିଲା ।
କଣ କହିଲେ ଆତୀଶୀ- ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ଆପ୍ ଦଳରୁ କାଲକାଜୀରୁ ପ୍ରାର୍ଥୀ ହୋଇଛନ୍ତି । ମାମଲା ରୁଜ୍ଜୁ ହେବାକୁ ନେଇ ନିର୍ବାଚନ କମିଶନରଙ୍କୁ ଟାର୍ଗେଟ କରିଛନ୍ତି ଆତିଶୀ । ସୋସିଆଲ ମିଡିଆ ଏକ୍ସରେ କହିଛନ୍ତି, ନିର୍ବାଚନ ଆୟୋଗ ବି ବଡ ଗଜବ! ରମେଶ ବିଧୁଡୀଙ୍କ ପରିବାର ସଦସ୍ୟ ଖୋଲାଖୋଲି ନିର୍ବାଚନ ଆଚରଣ ସଂହିତା ଉଲ୍ଲଘଂନ କରୁଛନ୍ତି । ତାଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ମୁଁ ଅଭିଯୋଗ ପାଇଁ ପୋଲିସକୁ ଡାକିଥିଲି । ଏହାକୁ ନେଇ ମୋ ଉପରେ ମାମଲା ଦାୟର ହୋଇଛି । ରାଜୀବ କୁମାର ଜୀ ଆପଣ ନିର୍ବାଚନ ପ୍ରକ୍ରିୟାର କେତେ ଅପମାନ କରିବେ ।'
ଏହା ବି ପଢନ୍ତୁ...ଦିଲ୍ଲୀ ବିଧାନସଭା ନିର୍ବାଚନ: ବୁଧବାର ୭୦ ଆସନରେ ଭୋଟିଂ, କାହାକୁ ଦିଲ୍ଲୀ ଦରବାରକୁ ପଠାଇବେ ଜନତା
କହି ରଖୁଛି କି, ଆସନ୍ତାକାଲି (ବୁଧବାର) ଗୋଟିଏ ପର୍ଯ୍ୟାୟରେ ଦିଲ୍ଲୀର ସମସ୍ତ ୭୦ଟି ଆସନରେ ମତଦାନ ଅନୁଷ୍ଠିତ ହେବ । ଦିଲ୍ଲୀରେ ଏଥରକ ୧.୫୬ କୋଟି ମତଦାତା ୧୩,୭୬୬ଟି ମତଦାନ କେନ୍ଦ୍ରରେ ସେମାନଙ୍କର ମତଦାନ ସାବ୍ୟସ୍ତ କରିବେ । ସେମାନଙ୍କ ମଧ୍ୟରୁ ୮୩.୭୬ ଲକ୍ଷ ପୁରୁଷ, ୭୨.୩୬ ଲକ୍ଷ ମହିଳା ଭୋଟର ରହିଛନ୍ତି । ୧୨୫୭ ଜଣ ତୃତୀୟ ଲିଙ୍ଗି ଭୋଟର ଅଛନ୍ତି । ଦିବ୍ୟାଙ୍ଗମାନଙ୍କ ଲାଗି ୭୩୩ଟି ମତଦାନ କେନ୍ଦ୍ର କରାଯାଇଛି । ୮ ତାରିଖରେ ଫଳାଫଳ ପ୍ରକାଶ ପାଇବ । ଦିଲ୍ଲୀରେ ଏଥରେ ଏକ ତ୍ରିକୋଣୀୟ ଲଢେଇ ଦେଖିବାକୁ ମିଳିବ । ଶାସକ ଆପ୍, ବିଜେପି ଓ କଂଗ୍ରେସ ମଧ୍ୟରେ ଜୋରଦାର ଟକ୍କର ହେବ । ଫେବୃଆରୀ ୨୩ ତାରିଖରେ ଦିଲ୍ଲୀ ବିଧାନସଭା କାର୍ଯ୍ୟକାଳ ଶେଷ ହେଉଛି ।
