ନୂଆଦିଲ୍ଲୀ: ଅଣ୍ଡରୱାର୍ଲ୍ଡ ଡନ୍‌ ଦାଉଦ୍‌ ଇବ୍ରାହିମ୍‌ର ସ୍ବାସ୍ଥ୍ୟବସ୍ଥାକୁ ନେଇ ବଡ଼ ଖବର ସାମ୍ନାକୁ ଆସିଛି । ମୃତ୍ୟୁ ସହ ସଂଘର୍ଷ କରୁଛି ଦାଉଦ ଇବ୍ରାହିମ୍‌ ।  କେତେକ ରିପୋର୍ଟରେ, ଦାଉଦର ମୃତ୍ୟୁ ହୋଇସାରିଛି ବୋଲି ଦାବି ହୋଇଛି । କିନ୍ତୁ ଏନେଇ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ । ଗୁଇନ୍ଦା ସୂତ୍ର ଆଧାରରେ ଜାତୀୟ ଗଣମାଧ୍ୟମରେ ଖବର ପ୍ରକାଶ ଯାଇଛି ଯେ, ଦାଉଦ ଇବ୍ରାହିମ ଅନେକ ଗମ୍ଭୀର ରୋଗରେ ପୀଡିତ ଏବଂ ତାର ସ୍ବାସ୍ଥ୍ୟବସ୍ଥା ସଙ୍କଟାପନ୍ନ ଅବସ୍ଥାରେ ରହିଛି । ୨୦୨୩ ରେ ଦାଉଦ ଇବ୍ରାହିମକୁ ବିଷ ଦିଆଯାଇଥିବା ନେଇ ଖବର ଆସିଥିଲା । ଏହା ପୂର୍ବରୁ ନିଜର ଅସୁସ୍ଥତାକୁ ନେଇ ଦାଉଦ ଚର୍ଚ୍ଚାକୁ ଆସିଥିଲା । 

ରିପୋର୍ଟ ଅନୁସାରେ, ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ଦାଉଦ ଗ୍ୟାଙ୍ଗ୍ରିନ୍ ନାମକ ଏକ ରୋଗରେ ପୀଡିତ । ଏହି କାରଣରୁ, କରାଚୀର ଏକ ହସ୍ପିଟାଲରେ ତାଙ୍କର ଦୁଇଟି ଆଙ୍ଗୁଠି କାଟିବାକୁ ପଡିଥିଲା । କିନ୍ତୁ ଏନେଇ ସ୍ପଷ୍ଟ ସୂଚନା ମିଳିପାରି ନଥିଲା । ଗ୍ୟାଙ୍ଗ୍ରିନ୍ ଏକ ରୋଗ ଯେଉଁଥିରେ ଶରୀରର କିଛି ଅଂଶର ଟିସୁଗୁଡ଼ିକ ନଷ୍ଟ ହୋଇଯାଏ ।  ଫଳରେ କ୍ଷତ ସୃଷ୍ଟି ହୁଏ ଏବଂ ଶରୀରରେ ବ୍ୟାପିବା ଆରମ୍ଭ କରେ । ଯଦି ଏହାର ଚିକିତ୍ସା କରାନଯାଏ ତେବେ ଅବସ୍ଥା ଆହୁରି ଖରାପ ହୋଇପାରେ ।

ଅନେକ ରିପୋର୍ଟରେ ଏହା ମଧ୍ୟ କୁହାଯାଇଥିଲା ଯେ, ଦାଉଦ ଇବ୍ରାହିମ ନିଜ ପୁଅ ପାଇଁ ଅବସାଦରେ ରହିଛି । ଦାଉଦର ପୁଅ ମୋଇନ୍ ମୌଲାନା ହୋଇଯାଇ ଥିବାରୁ ସେ ବହୁତ ଦୁଃଖିତ । ଦାଉଦ ଚାହୁଁଥିଲା ମୋଇନ ତାର ସାମ୍ରାଜ୍ୟ ସମ୍ଭାଳୁ । ମୋଇନ ତାଙ୍କ ବାପା ଭଳି ପଳାତକ ଜୀବନ ବଞ୍ଚିବାକୁ ଚାହାଁନ୍ତି ନାହିଁ । 

ଦାଉଦ୍ ଦୀର୍ଘ ଦିନ ଧରି ମଧୁମେହ ଏବଂ ଉଚ୍ଚ ରକ୍ତଚାପ ଭଳି ରୋଗରେ ପୀଡିତ । ବୟସ ବୃଦ୍ଧି ସହିତ, ତାର କିଡନୀ ମଧ୍ୟ ଠିକ୍ ଭାବରେ କାର୍ଯ୍ୟ କରୁନାହିଁ । ସେ ସମ୍ପୂର୍ଣ୍ଣ ଭାବରେ ଡାକ୍ତରଙ୍କ ଉପରେ ନିର୍ଭରଶୀଳ ।  ତାର ନିୟମିତ ଭାବରେ ଡାଏଲିସିସ୍ ହେଉଥିବା କୁହାଯାଉଛି । କିଛି ରିପୋର୍ଟରେ କୁହାଯାଇଛି ଯେ, ସେ କରାଚୀର ଏକ ଉଚ୍ଚ ସୁରକ୍ଷା ବିଶିଷ୍ଟ ହସ୍ପିଟାଲରେ ଚିକିତ୍ସାଧୀନ ଅଛି । ତାକୁ ISI ସୁରକ୍ଷାରେ ରଖାଯାଇଛି ଏବଂ କାହାକୁ ତା ସହିତ ସାକ୍ଷାତ କରିବାକୁ ଅନୁମତି ନାହିଁ। ତଥାପି, ପାକିସ୍ତାନ ସବୁବେଳେ ଦାଉଦର ଉପସ୍ଥିତିକୁ ଅସ୍ୱୀକାର କରିଆସିଛି ।