ନୂଆଦିଲ୍ଲୀ: ହିମାଚଳ ପ୍ରଦେଶର କଂଗ୍ରେସ ସରକାର ୧୮ ମାସରେ ୨୭ ହଜାର କୋଟି ଋଣ କରିଛନ୍ତି । ଏନେଇ ସୋମବାର କହିଛନ୍ତି ବିଜେପି ସାଂସଦ ଅନୁରାଗ ଠାକୁର । ସୁଖବିନ୍ଦର ସିଂହ ସୁଖୁଙ୍କ ବିଧାନସଭା ମଣ୍ଡଳୀ ସମେତ ନିଜର ସଂସଦୀୟ କ୍ଷେତ୍ରରେ ଅନୁରାଗ ଠାକୁର ଏଭଳି ଦାବି କରିବା ପରେ ରାଜ୍ୟ ରାଜନୀତି ସରଗରମ ହୋଇଛି ।
ଅନୁରାଗ ଠାକୁର କହିଛନ୍ତି ଯେ, ‘ମାତ୍ର ୧୮ ମାସର କାର୍ଯ୍ୟକାଳରେ ରାଜ୍ୟ ସରକାର ୨୭ ହଜାର କୋଟିରୁ ଅଧିକ ଋଣ କରିଛନ୍ତି । କିନ୍ତୁ ରାଜ୍ୟର ଉନ୍ନତି ଲାଗି ସରକାରଙ୍କ ପାଖରେ କୌଣସି ଯୋଜନା ନାହିଁ । କଂଗ୍ରେସ ସରକାର କିଛି ଦେଇ ନାହିଁ ବରଂ ଲୋକଙ୍କ ପାଖରୁ ଲଗାତାର ଅର୍ଥ ଆଦାୟ କରୁଛି ।’
ସେ ଆହୁରି ଅଭିଯୋଗ କରିଛନ୍ତି, ସାରା ରାଜ୍ୟରେ ରାସ୍ତା ଖରାପ ହୋଇପଡ଼ିଛି । ଏପରିକି ମୁଖ୍ୟମନ୍ତ୍ରୀଙ୍କ ବିଧାନସଭା କ୍ଷେତ୍ରରେ ମଧ୍ୟ ସମାନ ସ୍ଥିତି । ସବୁ କ୍ଷେତ୍ରରେ ଆର୍ଥିକ ବୋଝ ଲଦି ହୋଇଯାଇଛି । ବିଜୁଳୀ, ରାସ୍ତା, ପାଣି, ସ୍ବାସ୍ଥ୍ୟ ଏବଂ ଶିକ୍ଷା କ୍ଷେତ୍ରରେ ରାଜ୍ୟର ଋଣ ଭାର ବଢ଼ି ବଢ଼ି ଚାଲିଛି । ବିଜେପି ସରକାର ସମୟରେ ବିଜୁଳୀ ବିଲ୍ ଉପରେ ସବସିଡି ମିଳୁଥିବା ବେଳେ ଏହାକୁ ସମାପ୍ତ କରିଦେଇଛନ୍ତି କଂଗ୍ରେସ ସରକାର । ଏପରିକି ଗ୍ରାମୀଣ ଅଞ୍ଚଳରେ ଲୋକେ ପାଣି ବିଲ୍ ଦେଇ ନୟାନ୍ତ ହୋଇପଡ଼ିଲେଣି ବୋଲି ଅନୁରାଗ ଠାକୁର କହିଛନ୍ତି ।
ଅନ୍ୟପଟେ, ରାଜ୍ୟରେ ୧୬ ଲକ୍ଷ ୫୦ ହଜାର ଲୋକ ବିଜେପିର ସଦସ୍ୟତା ଗ୍ରହଣ କରିଥିବା ବେଳେ ଏହି ଧାରା ଜାରି ରହିଛି । ବିଜେପି ପାଇଁ ତାର କାର୍ଯ୍ୟକର୍ତ୍ତା ହିଁ ସବୁକିଛି ବୋଲି ଅନୁରାଗ ଠାକୁର ଦାବି କରିଛନ୍ତି ।
