ନାରାୟଣପାଟଣା ୨୫/୧୧: ରାଜରାଜୁଡ଼ା ଅମଳରୁ ନାରାୟଣପାଟଣା ଠାରେ ଏକ ଟିଣ ଘରେ ପୂଜା ପାଉଛନ୍ତି ଚତୁର୍ଦ୍ଧାମୂର୍ତ୍ତି । ନୂତନ ମନ୍ଦିର ନିର୍ମାଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ମିଳିଛି ୪ କୋଟି ଟଙ୍କା । ଏ ଭିତରେ ବିତିଗଲାଣି ଦୀର୍ଘ ୨୦ ମାସ । ଅଥଚ ମନ୍ଦିର ପରିଚାଳନା କମିଟି ନ ଥିବାରୁ ଆଗେଇ ପାରୁନି କାମ । ଏହାକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଖୋଦ୍‌ ବ୍ଲକ୍‌ ଅଧ୍ୟକ୍ଷ ଏଥିରେ ହସ୍ତକ୍ଷେପ କରିବାକୁ ସେମାନେ ଜିଲ୍ଲାପାଳଙ୍କୁ ନିବେଦନ କରିଛନ୍ତି । 

ଏହି ମନ୍ଦିର ଦକ୍ଷିଣ ଓଡ଼ିଶାର ବହୁ ପୁରାତନ । ୧୫୭୦ ଖ୍ରୀଷ୍ଟାବ୍ଦରେ ଏହା ନିର୍ମାଣ କରାଯାଇଥିବା ମାଦଳା ପାଞ୍ଜିରେ ବର୍ଣ୍ଣନା ରହିଛି । କାଳକ୍ରମେ ରାଜରାଜୁଡ଼ା ଅମଳରୁ ଏକ ଟିଣ ଘରେ ଠାକୁର ପୂଜା ପାଇ ଆସୁଛନ୍ତି । ଦାନଦକ୍ଷିଣାରେ ନୀତିକାନ୍ତି କରାଯାଉଛି । ଅଞ୍ଚଳବାସୀଙ୍କ ପ୍ରଚେଷ୍ଟାରେ ନୂତନ ମନ୍ଦିର ନିର୍ମାଣ ଆରମ୍ଭ ହୋଇଛି । ସମ୍ପୂର୍ଣ୍ଣ କରିବା ପାଇଁ ୨୦୨୩ ଫେବ୍ରୁଆରୀ ୭ ତାରିଖରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୫-ଟି ଯୋଜନାରେ ୪ କୋଟି ଟଙ୍କା ପ୍ରଦାନ କରିଛନ୍ତି । ପୂର୍ତ୍ତ ବିଭାଗ ଅଧୀନରେ ଏହି କାମର ଟେଣ୍ଡର କରାଯାଇଛି । ଜୟପୁର ସହରର ଜଣେ ଠିକାଦାର ନିର୍ମାଣ ପାଇଁ ଟେଣ୍ଡର ପାଇଛନ୍ତି । ହେଲେ ମନ୍ଦିର ପରିଚାଳନା କମିଟି ନ ଥିବାରୁ କାମ ତ୍ୱରାନ୍ୱିତ ହୋଇପାରୁନି ବୋଲି ବିଭାଗୀୟ ଯନ୍ତ୍ରୀ ଓ ଠିକାଦାର କହିଛନ୍ତି । 

ମନ୍ଦିର ନିର୍ମାଣ କମିଟି ରହିଛି । ଉକ୍ତ କମିଟି ସଦସ୍ୟଙ୍କ ମଧ୍ୟରେ ସମନ୍ୱୟ ରହୁନି । ଏଣୁ ନିର୍ମାଣରେ ବାଧା ସୃଷ୍ଟି ହେଉଥିବା ବିଭାଗୀୟ ଅଧିକାରୀ କହିଛନ୍ତି । ଏହାରି ଭିତରେ ୨୦ ମାସ ବିତିଯାଇଥିଲେ ସୁଦ୍ଧା କାମ ଆଗେଇ ପାରୁନି । ବ୍ଲକ୍‌ ଅଧ୍ୟକ୍ଷ ଗାଲାଦି ତ୍ରିନାଥ କାର୍ଯ୍ୟ ତ୍ୱରାନ୍ୱିତ ପାଇଁ ଅଭିଯୋଗ ଶୁଣାଣି ପ୍ରକୋଷ୍ଠରେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି । ତୁରନ୍ତ ସ୍ଥାୟୀ ସମାଧାନ କରିବାକୁ ନିବେଦନ କରିଛନ୍ତି । ଯଥାଶୀଘ୍ର ଏକ ସ୍ଥାୟୀ ପରିଚାଳନା କମିଟି ଗଠନ କଲେ କାମ ଆଗେଇବ । ବିଳମ୍ବ ହେଲେ ମିଳିଥିବା ଅନୁଦାନ ଫେରିଯିବ ବୋଲି ବୁଦ୍ଧିଜୀବୀମାନେ କହିଛନ୍ତି ।  ଏ ସମ୍ପର୍କରେ ମନ୍ଦିର ନିର୍ମାଣ କମିଟି ଅଧ୍ୟକ୍ଷ ପି. ଜନାର୍ଦ୍ଦନ ସୁବୁଦ୍ଧି କହିଛନ୍ତି, କମିଟି ସଦସ୍ୟଙ୍କ ମଧ୍ୟରେ ମନାନ୍ତର ରହିଛି । ତେଣୁ କାମ ଆଗେଇ ପାରୁନି । ନୂତନ ପରିଚାଳନା କମିଟି ଗଠନ କରି ମନ୍ଦିର ନିର୍ମାଣ ତ୍ୱରାନ୍ୱିତ କରାଯାଉ ବୋଲି ସେ କହିଛନ୍ତି ।