ଭୁବନେଶ୍ୱର/ବଳଙ୍ଗା,୨୧/୦୭: ପୁରୀ ଜିଲ୍ଲା ବଳଙ୍ଗାରେ ନାବାଳିକାକୁ ଜାଳିଦେବା ଘଟଣାକୁ ୨ ଦିନ ବିତିଲାଣି । ଏଯାବତ୍ କାଣ୍ଡ ଭିଆଇଥିବା ୩ ଦୁର୍ବୃତ୍ତଙ୍କ ପତ୍ତା ମିଳୁନି । ସେମାନେ ସ୍ପଷ୍ଟ ଦିବାଲୋକରେ କେମିତି ଏତେ ବଡ଼ କାଣ୍ଡ ଭିଆଇଲେ? ଏ କଥାକୁ ପୁଲିସ ହଜମ କରିପାରୁନି । ଅନ୍ୟପଟେ ପୀଡ଼ିତାଙ୍କ ପରିବାର ଲୋକ ଓ ଅଟକ ୨ ସାଙ୍ଗଙ୍କ ବୟାନରେ ତାଳମେଳ ରହୁନି ।
ଏହି ଜଘନ୍ୟ କାଣ୍ଡଟି ଦିନକୁ ଦିନ ଅଡୁଆ ସୂତାରେ ଛନ୍ଦି ହୋଇଚାଲିଛି । ଏପରିସ୍ଥଳରେ କଲ୍ ଡିଟେଲ୍ସ ରେକର୍ଡ (ସିଡିଆର୍) ଯାଞ୍ଚ ହିଁ ପୁଲିସର ଶେଷ ଭରସା ସାଜିଛି । ପୀଡ଼ିତାଙ୍କ ପରିବାର ଲୋକ, ସମ୍ପର୍କୀୟ ଓ ଅନ୍ୟ ସମ୍ପ୍ରଦାୟର ଜଣେ ସାଙ୍ଗଙ୍କ ସମେତ ୮ଜଣଙ୍କ ମୋବାଇଲ୍ ନଂ ସିଡିଆର ରିପୋର୍ଟ ମଗାଯାଇଛି । ସେମାନଙ୍କ ଫୋନରେ ବାର୍ତ୍ତାଳାପର ୩ ମାସର ଇତିହାସ ଉଣ୍ଡାଳୁଛି ପୁଲିସ ।
ଜଣେ ବରିଷ୍ଠ ପୁଲିସ ଅଧିକାରୀଙ୍କ କହିବା ମୁତାବକ, ବଳଙ୍ଗା-ହରିପୁର ରାସ୍ତାରେ ଘଟଣାସ୍ଥଳଠୁ ଆଖପାଖରେ ମାତ୍ର ୨ଜଣଙ୍କ ଘର ସାମ୍ନାରେ ସିସି କ୍ୟାମେରା ଖଞ୍ଜାଯାଇଛି । ଘଟଣାସ୍ଥଳଠୁ ୫୦୦ ମିଟର ଦୂରରେ ଥିବା ସିସି କ୍ୟାମେରାଟି ଅଚଳ ଅଛି । ୨-୩ କିମି ଦୂରରେ ଥିବା ସିସି କ୍ୟାମେରାଟି ସକ୍ରିୟ ଥିଲେ ହେଁ, କୌଣସି ସନ୍ଦିଗ୍ଧ ବାଇକ୍ ଆରୋହୀଙ୍କ ଗତିବିଧି ରେକର୍ଡ ହୋଇନାହିଁ । ସେପଟେ ପୀଡ଼ିତାଙ୍କ ପରିବାର ଲୋକ ଓ ପୀଡ଼ିତାର ସାଙ୍ଗଙ୍କୁ ଘନଘନ ପଚରାଉଚରା କରାଯାଉଛି । ସେମାନଙ୍କ ବୟାନରେ ତାଳମେଳ ରହୁନାହିଁ । ରବିବାର ପୀଡ଼ିତାର ପିଉସୀଙ୍କୁ ଅଜ୍ଞାତସ୍ଥାନକୁ ନେଇ ପୁଲିସ ପଚରାଉଚରା କରୁଛି । ପାର୍ସଲ୍ ଆସିଥିବା କହି ପୀଡ଼ିତାଜଣକ ତାଙ୍କ ସମ୍ପର୍କୀୟଙ୍କ ଘରକୁ ଯାଇଥିଲେ ବୋଲି ପରିବାର ଲୋକେ କହିଛନ୍ତି । ତେବେ କୌଣସି ଅନ୍ଲାଇନ୍ ସପିଂ ସଂସ୍ଥା ସକାଳ ୭ରୁ ୮ଟା ବେଳେ ପାର୍ସଲ ଦେଉନଥିବାରୁ ଏହି ତଥ୍ୟକୁ ସନ୍ଦେହ ନଜରରେ ଦେଖୁଛି ପୁଲିସ ।
ରବିବାର ଡିଜିପି ୱାଇ.ବି ଖୁରାନିଆ ଅଘଟଣସ୍ଥଳକୁ ଯାଇଥିଲେ । କେନ୍ଦ୍ରାଞ୍ଚଳ ଆଇଜି ଏସ୍ ପ୍ରବୀଣ କୁମାର ଓ ପୁରୀ ଏସ୍ପି ପିନାକ ମିଶ୍ର ଉପସ୍ଥିତ ଥିଲେ । ଉଭୟେ ପୀଡି଼ତାଙ୍କୁ ଉଦ୍ଧାର କରିଥିବା ତେରହଳ ଗ୍ରାମର ଦୁଃଖୀଶ୍ୟାମ ସେନାପତିଙ୍କ ଘରକୁ ଯାଇଥିଲେ । ବରିଷ୍ଠ ଅଧିକାରୀମାନେ ନାବାଳିକାର ଗାଁକୁ ଯାଇ ପଡ଼ୋଶୀମାନଙ୍କୁ ପଚରାଉଚରା କରିଥିଲେ । ରବିବାର ମଧ୍ୟାହ୍ନରେ ରାଜ୍ୟ ଅପରାଧ ବିଧି ବିଜ୍ଞାନଗାର (ଏସ୍ଏଫ୍ଏସ୍ଏଲ)ର ଫରେନ୍ସିକ୍ ଟିମ୍ ଘଟଣାସ୍ଥଳରୁ ପୀଡ଼ିତା ପିନ୍ଧିଥିବା ପୋଷାକର କିଛି ଦରପୋଡ଼ା ଅଂଶ ଓ ଅନ୍ୟାନ୍ୟ ପ୍ରମାଣପତ୍ର ସଂଗ୍ରହ କରିଛି । ରାସ୍ତାରୁ ପୋଡ଼ା ସାମଗ୍ରୀ, କିଛି ନମୁନା ସଂଗ୍ରହ କରିଥିଲେ । ଯେଉଁଠାରେ ପୀଡ଼ିତା ବସିଥିଲେ, ପାଣି ପିଇଥିଲେ ଓ ପୋଷାକ ବଦଳାଇ ଥିଲେ, ସେସବୁ ସ୍ଥାନକୁ ପୁଣି ଥରେ ଯାଞ୍ଚ କରିଥିଲେ ।
ରବିବାର ବିଜେଡି ନେତା ବଳଙ୍ଗା ଥାନା ଘେରିବାକୁ ଉଦ୍ୟମ କରିଥିଲେ । ପୂର୍ବତନ ମନ୍ତ୍ରୀ ଟୁକୁନି ସାହୁ, ବିଜେଡି ପୁରୀ ଜିଲ୍ଲା ସଭାପତି ଉମାକାନ୍ତ ସାମନ୍ତରାୟ, ପୂର୍ବତନ ବିଧାୟକ ରୁଦ୍ର ମହାରଥୀ ପ୍ରମୁଖ ଥାନା ଭିତରକୁ ଧସେଇ ପଶିବାକୁ ଉଦ୍ୟମ କରିଥିଲେ । ଫଳରେ ପୁଲିସ ସହ ଧସ୍ତାଧସ୍ତି ହୋଇଥିଲା ।
