ନୂଆଦିଲ୍ଲୀ ୧୪/୦୬: ଆଖିରେ ଥିଲା ଆଖିଏ ସ୍ୱପ୍ନ । ମନରେ ଭବିଷ୍ୟତର ଅସୁମାରି ଆଶା । ରଙ୍ଗୀନ୍ ଦୁନିଆରେ ଉଡ଼ିବାର ଅଭିଳାଷ । ପ୍ରିୟଜନଙ୍କୁ ଭେଟିବାର ଉତ୍ସାହ । ପ୍ରେମ-ମିଳନର ପ୍ରତୀକ୍ଷା । କିନ୍ତୁ ନିଷ୍ଠୁର ନିୟତିର ନିଷ୍ପତ୍ତି ଥିଲା ଆଉ କିଛି । ମୁହୂର୍ତ୍ତକ ମଧ୍ୟରେ ସବୁ ଆଶା, ଆକାଂକ୍ଷା ପୋଡ଼ି ପାଉଁଶ ହୋଇଗଲା । ଧୂଳିସାତ୍ ହୋଇଥିଲା ସବୁ ସ୍ୱପ୍ନ । ଛାର୍ଖାର ହୋଇଗଲା ପରିବାର । ଅଜସ୍ର ଦୁଃଖ ଦେଇଗଲା ଅହମ୍ମଦାବାଦ ବିମାନ ଦୁର୍ଘଟଣା ।
ଏୟାର ଇଣ୍ଡିଆର ବୋଇଂ ବିମାନ ଯେଉଁ ମେଡିକାଲ କଲେଜର ହଷ୍ଟେଲ୍ ଉପରେ ପଡ଼ିଲା, ତା’ର ଠିକ୍ ବାହାରେ ଜଣେ ମହିଳା ଚା’ ଦୋକାନ କରିଥିଲେ । ସେଇ ପାଖରେ ତାଙ୍କ ପୁଅ ସପରେ ଶୋଇଥିଲେ । ବିମାନ ମାଡ଼ ହେବା ପରେ ପ୍ରଚଣ୍ଡ ବିସ୍ଫୋରଣ ଯୋଗୁ ତାଙ୍କର ମୃତ୍ୟୁ ହେଲା । ମହିଳା ଗମ୍ଭୀର ରୂପେ ଆହତ ହୋଇଛନ୍ତି । ମୃତକଙ୍କ ଜେଜେ ମା’ କହିଛନ୍ତି, ତାଙ୍କ ପରିବାରରେ ୩୦-୩୫ ଜଣ ଅଛନ୍ତି । ଦୁର୍ଘଟଣା ଦିନ କେବଳ ଜଣେ ନାତି ଦୋକାନକୁ ଆସିଥିଲା, ଯିଏ ଆଉ କେବେ ଘରକୁ ଫେରିବ ନାହିଁ।
