ନୂଆଦିଲ୍ଲୀ ୧୯/୦୫: ଜାତିସଂଘର ସୂଚନା ଅନୁସାରେ ବିଶ୍ୱରେ ଏବେ ୧୯୩ ଦେଶ ଅଛନ୍ତି । କିନ୍ତୁ ଏଭଳି ୧୨ଟି ଅନ୍ୟ ଦେଶ ରହିଛନ୍ତି ଯେଉଁମାନେ ଜାତିସଂଘର ସଦସ୍ୟ ନୁହନ୍ତି । ଅର୍ଥାତ୍ ଏହାକୁ ମିଶାଇଲେ ବିଶ୍ୱରେ ଏବେ ମୋଟ ଦେଶ ସଂଖ୍ୟା ହେଉଛି ୨୦୫ । ଏହି ୨୦୫ଟି ଦେଶରେ ରହୁଛନ୍ତି ୭୦୦ କୋଟିରୁ ଅଧିକ ଲୋକ । କିନ୍ତୁ ସମଗ୍ର ବିଶ୍ୱକୁ ଗୋଟିଏ ଭୟ ସବୁବେଳେ ଲାଗି ରହିଛି । ତାହା ହେଉଛି ଯଦି ପରମାଣୁ ଯୁଦ୍ଧ ଲାଗିବ ତେବେ ସମଗ୍ର ବିଶ୍ୱ ଧ୍ୱଂସ ପାଇଯିବ ।
ଏପରିସ୍ଥଳେ ଗୋଟିଏ ପ୍ରଶ୍ନ ମନକୁ ଆସୁଛି କି ମଣିଷ କ’ଣ ଏତେ ଆଣବିକ ବୋମା ତିଆରି କରିଛି ଯେ ସମଗ୍ର ବିଶ୍ୱକୁ ଧ୍ୱଂସ କରିହେବ । କ’ଣ ୭୦୦ କୋଟି ଲୋକଙ୍କୁ ଏକାଥରକେ ମାରିବାର କ୍ଷମତା ମଣିଷ ପାଖରେ ରହିଛି । ଏହାର ଉତ୍ତର ପାଇବାକୁ ହେଲେ ଜାଣିବାକୁ ହେବ କି ବିଶ୍ୱରେ ବର୍ତ୍ତମାନ କେତେ ପରମାଣୁ ଅସ୍ତ୍ର ରହିଛି ଏବଂ କେଉଁ ଦେଶ ପାଖରେ ଅଛି । ବିଶ୍ୱରେ ମାତ୍ର ୯ଟି ଦେଶ ହେଉଛନ୍ତି ପରମାଣୁ ଶକ୍ତି ସମ୍ପନ୍ନ । ସେମାନଙ୍କ ମଧ୍ୟରେ ଅଛନ୍ତି ଆମେରିକା, ରୁଷ, ବ୍ରିଟେନ, ଫ୍ରାନ୍ସ, ଚୀନ୍, ଇସ୍ରାଏଲ, ଭାରତ, ଦକ୍ଷିଣ ଆଫ୍ରିକା ଓ ପାକିସ୍ତାନ । ଉତ୍ତର କୋରିଆ ଦଶମ ଦେଶ ଭାବେ ପରମାଣୁ ଅସ୍ତ୍ରର ଅଧିକାରୀ ହୋଇଥିଲା । ତେବେ ଦକ୍ଷିଣ ଆଫ୍ରିକା ନିଜେ ପ୍ରସ୍ତୁତ କରିଥିବା ପରମାଣୁ ଅସ୍ତ୍ର ନଷ୍ଟ କରି ଆଣବିକ ଶକ୍ତି ସଂପନ୍ନ ରାଷ୍ଟ୍ରରୁ ନିଜକୁ ବାହାର କରିନେଇଥିଲା । ତେଣୁ ବର୍ତ୍ତମାନ ୯ଟି ଦେଶ ପାଖରେ ପରମାଣୁ ବୋମା ଅଛି ।
ବୁଲେଟିନ ଅଫ୍ ଆଟମିକ୍ ସାଇଣ୍ଟିଷ୍ଟସର ସଦ୍ୟତମ ରିପୋର୍ଟ ଅନୁସାରେ ବର୍ତ୍ତମାନ ବିଶ୍ୱର ୯ଟି ଦେଶ ପାଖରେ ୧୨ ହଜାରରୁ ଅଧିକ ପରମାଣୁ ଅସ୍ତ୍ର ରହିଛି । ସେଥିରୁ ରୁଷ ପାଖରେ ସର୍ବାଧିକ ୫୫୦୦ ରହିଥିଲାବେଳେ ଆମେରିକା ପାଖରେ ୫୦୪୪, ଚୀନ୍ ପାଖରେ ୫୦୦, ଫ୍ରାନ୍ସ ପାଖରେ ୨୯୦, ବ୍ରିଟେନ ପାଖରେ ୨୨୫, ଭାରତ ପାଖରେ ୧୭୨, ପାକିସ୍ତାନ ପାଖରେ ୧୭୦, ଇସ୍ରାଏଲ ପାଖରେ ୯୦ ଓ ଉତ୍ତର କୋରିଆ ପାଖରେ ୫୦ ପରମାଣୁ ଅସ୍ତ୍ର ରହିଛି । ଏସବୁକୁ ମିଶାଇଲେ ମୋଟ ପରମାଣୁ ଅସ୍ତ୍ରର ସଂଖ୍ୟା ହେଉଛି ୧୨,୦୪୧ । ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ କେବଳ ୫୦୦ ପରମାଣୁ ଅସ୍ତ୍ର ଯାହାର ଓଜନ ୩୦- ୪୦ କିଲୋଟନ ହେବ । ଏତିକି ଅସ୍ତ୍ର ବିଶ୍ୱର ୭୦୦ କୋଟିରୁ ଅଧିକ ଲୋକଙ୍କୁ ମାରିବା ପାଇଁ ଯଥେଷ୍ଟ ହେବ । କିନ୍ତୁ ଯଦି ପୃଥିବୀର ସମସ୍ତ ୧୫ କୋଟି ବର୍ଗ କି.ମି ଧରିତ୍ରୀକୁ ଧ୍ୱଂସ କରିବାକୁ ହୁଏ ତେବେ ଏଥିପାଇଁ ୧ ଲକ୍ଷ ୨୮ ହଜାର ପରମାଣୁ ଅସ୍ତ୍ର ଆବଶ୍ୟକ । ଅର୍ଥାତ ବର୍ତ୍ତମାନ ସମୟରେ ଯେଉଁ ପରମାଣୁ ଅସ୍ତ୍ର ବିଭିନ୍ନ ଦେଶ ପାଖରେ ରହିଛି ସେଥିରେ କେବଳ ମଣିଷକୁ ଧ୍ୱଂସ କରିହେବ । ସମଗ୍ର ପୃଥିବୀକୁ ଏତିକି ପରମାଣୁ ଅସ୍ତ୍ରରେ ଧ୍ୱଂସ କରାଯାଇପାରିବ ନାହିଁ ।
