ପାତ୍ରପୁର,୧୦।୭ : ପାତ୍ରପୁର ବ୍ଲକ ସାମନ୍ତରାପୁର ଓ ଜରଡ଼ା ମଧ୍ୟସ୍ଥ ଠଣାଗାଁ ଛକ ନିକଟରେ ମର୍ମନ୍ତୁଦ ଦୁର୍ଘଟଣା। ୨ ବୁଲେଟ ମଧ୍ୟରେ ମୁହାଁମୁହିଁ ଧକ୍କା । ଏଥିରେ ବାପା-ପୁଅ ସମେତ ୩ ଜଣଙ୍କ ମୃତ୍ୟୁ ହୋଇଛି। ମୃତକମାନେ ହେଲେ ସାମନ୍ତରାପୁର ଗ୍ରାମର ଢଉ ଗୌଡ଼ (୫୫) ଓ ତାଙ୍କ ପୁଅ ସୁନିଲ କୁମାର ଗୌଡ଼(୨୫) ଏବଂ ଗୋଇଲୁଣ୍ଡି ଅଞ୍ଚଳର ରାଜେଶ ପାଣିଗ୍ରାହୀ(୨୫)।
ସାମନ୍ତରାପୁର ଗ୍ରାମର ସୁନିଲ କୁମାର ଗୌଡ଼ ତାଙ୍କ ବାପା ଢଉ ଗୌଡ଼ଙ୍କୁ ବୁଲେଟରେ ବସେଇ ଜରଡ଼ା ଆଡୁ ନିଜ ଗାଁ ଅଭିମୁଖେ ଫେରୁଥିଲେ। ବିପରୀତ ଦିଗରୁ ନିଜ ବୁଲେଟରେ ବ୍ରହ୍ମପୁର ଗୋଇଲୁଣ୍ଡି ଅଂଚଳର ରାଜେଶ ପାଣିଗ୍ରାହୀଙ୍କ ସହ ତାଙ୍କର ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ୩ ଜଣ ଗୁରୁତର ହୋଇଥିଲେ। ସ୍ଥାନୀୟ ଲୋକେ ତିନିଜଣଙ୍କୁ ପାତ୍ରପୁର ମେଡିକାଲରେ ଭର୍ତ୍ତି କରିଥିଲେ । ସେଠାରେ ତିନିଜଣଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ପୋଲିସ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ କରିଛି। ଖବର ପାଇ ପାତ୍ରପୁର ମେଡିକାଲରେ ପାତ୍ରପୁର ବିଡ଼ିଓ ଲକ୍ଷ୍ମଣ ସୋରେନ ଓ ତହସିଲଦାର ଅଶୋକ ପଟ୍ଟନାୟକ ପହଞ୍ଚିଥିଲେ। ଘଟଣାକୁ ନେଇ ପାତ୍ରପୁର ବ୍ଲକରେ ଶୋକର ଛାୟା ଖେଳି ଯାଇଛି
