ଯାଜପୁର, ୨୩।୮ : ରିଲ୍ସ ବନାଇବା ହେଲା କାଳ। ଝରଣା ପାଣିରେ ବୁଡି ଚାଲିଗଲା ୨ ଯୁବକଙ୍କ ଜୀବନ। ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ସୁକିନ୍ଦା କୋଇଲୋ ଅଞ୍ଚଳରେ। ସ୍ଥାନୀୟ ମହାଗିରି ପାହାଡ଼ରେ ଥିବା ଝରଣାରେ ରିଲ୍ସ କରୁଥିବା ବେଳେ ବୁଡିଯାଇ ୨ ଜଣ ଯୁବକଙ୍କ ମୃତ୍ୟୁ ଘଟିଛି। ମୃତକମାନେ ହେଲେ କାଞ୍ଜିପାଳ ଗ୍ରାମର ପୁନିଆ ପ୍ରଧାନଙ୍କ ପୁଅ ସମ୍ଭୁ ପ୍ରଧାନ ଓ କୋଇଲା ଗ୍ରାମର ମନମୋହନ ମହାନ୍ତଙ୍କ ପୁଅ ମାନସ ମହାନ୍ତ ।
ମହାଗିରି ପାହାଡ଼ରେ ଥିବା ଝରଣାକୁ ୩ ଜଣ ସାଙ୍ଗ ଗାଧୋଇବାକୁ ଯାଇଥିଲେ। ଏହି ସମୟରେ ଝରଣାରେ ସମ୍ଭୁ ଓ ମାନସ ରିଲ୍ସ କରୁଥିଲେ। ଝରଣାର ପ୍ରଖର ସ୍ରୋତରେ ଉଭୟେ ବୁଡି ଯାଇଥିଲେ। ନିକଟରେ ଥିବା ଅନ୍ୟ ସାଙ୍ଗ ଜଣକ ଏହା ଦେଖି ଗ୍ରାମବାସୀ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ। ଅଗ୍ନିଶମ ବାହିନୀ ସେଠାରେ ପହଞ୍ଚି ବହୁ ଖୋଜାଖୋଜି କରିବା ପରେ ପ୍ରଥମେ ସମ୍ଭୁ ପ୍ରଧାନଙ୍କ ମୃତଦେହ ପାଣିରୁ ଉଦ୍ଧାର କରିଥିଲେ। ପରେ ନିଖୋଜ ଥିବା ମାନସଙ୍କ ମଧ୍ୟ ମୃତଦେହ ଉଦ୍ଧାର କରିଥିଲେ। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
