ଯାଜପୁର, ୨୯/୦୮: 'କାଣୀ ନଦୀର ଘାଈ ମେରୁଦଣ୍ଡ ଭାଙ୍ଗିଦେଲା। ବଢି ପାଣିରେ ସବୁ ଭାସିଗଲା। ନା ଖାଇବାକୁ ଅଛି, ନା ପିନ୍ଧିବାକୁ ଅଛି। ଗରିବ ଗୁରୁବା ଲୋକ ବାବୁ, ଆମକୁ ସାହା ହୁଅ'... ଏ ହେଉଛି ବନ୍ୟା ପ୍ରଭାବିତ ଯାଜପୁର ଜିଲ୍ଲା ଦଶରଥପୁର ଦରଘାର ଦୃଶ୍ୟ। ଜିଲ୍ଲାପାଳଙ୍କୁ ଦେଖି କୋହ ସମ୍ଭାଳି ନପାରି କୁଣ୍ଢାଇ ପକାଇଲେ ଜଣେ ବନ୍ୟା ବିପନ୍ନ। ଆଉ କାନ୍ଦି କାନ୍ଦି ଜିଲ୍ଲାପାଳଙ୍କ ଆଗରେ କଲେ ଗୁହାରି ।
ବୈତରଣୀରେ ବନ୍ୟା ଆସିବା ଯୋଗୁଁ ଶାଖା ନଦୀ କାଣୀରେ ୧୫୦ଫୁଟ୍ ଘାଇ ସୃଷ୍ଟି ହୋଇଥିଲା। ଫଳରେ ଅନେକ ଅଞ୍ଚଳ କ୍ଷତିଗ୍ରସ୍ତ ହୋଇଥିଲା। ଦଶରଥପୁରର ମୁଖ୍ୟତଃ କସପା, ଅହିୟାସ, ମଲିକାପୁର ଆଦି ଅଞ୍ଚଳ ପ୍ରବଳ କ୍ଷତିଗ୍ରସ୍ତ ହୋଇଛି । ୩୦ରୁ ଅଧିକ ଗାଁ ବନ୍ୟା ପାଣି ଘେରରେ ରହିଛି। ଏବେ ବର୍ଷା ଥମିଛି, ବନ୍ୟା ପାଣି ବି କମିଛି, ହେଲେ ବନ୍ୟା ବିପନ୍ନଙ୍କ ଦୁର୍ଦ୍ଦଶା ବଢିଛି। ବନ୍ୟା ପ୍ରଭାବରେ ଜୀବନ, ଜୀବିକା ସବୁ ଉଜୁଡ଼ି ଯାଇଛି । ତଳିଆ ଅଞ୍ଚଳରେ ସ୍ଥିତି ସୁଧୁରିବା ନାଁ ଧରୁନି । ଅଦ୍ୟାବଧି ବ୍ଲକ୍ର ବିଭିନ୍ନ ରାସ୍ତା ବନ୍ୟା ପାଣିରେ ବୁଡ଼ି ରହିଥିବାରୁ ସମ୍ପୃକ୍ତ ଅଞ୍ଚଳରେ ଗମନାଗମନ ସ୍ୱାଭାବିକ ହୋଇନାହିଁ । ବିଭିନ୍ନ ବନ୍ୟା ପ୍ରଭାବିତ ଅଞ୍ଚଳରେ ଅନେକ ବନ୍ୟା ବିପନ୍ନଙ୍କ ଘର ଦ୍ୱାର, ଘରେ ଥିବା ଆସବାବପତ୍ର, ଟଙ୍କା, ଖାଦ୍ୟ ସାମଗ୍ରୀ, ଲୁଗାପଟା ଭାସିଯାଇଛି । ଅହିୟାସ ବଜାରରେ ତେଜରାତି, କପଡ଼ା, ପରିବା ଦୋକାନ କରିଥିବା ବହୁ ବ୍ୟବସାୟୀଙ୍କର ସବୁ ସାମଗ୍ରୀ ପାଣିରେ ବୁଡ଼ି ନଷ୍ଟ ହୋଇଛି । ହଠାତ ପାଣି ମାଡ଼ି ଆସିବାରୁ ଦୋକାନ ଭିତରୁ କିଛି ସାମଗ୍ରୀ କାଢ଼ି ହୋଇନଥିଲା । ସେଥିରୁ କେତେକ ଜିନିଷ ପାଣିରେ ଭାସିଯାଇଛି । କିଏ ବ୍ୟାଙ୍କ ଋଣ କରି ବ୍ୟବସାୟ ବୃଦ୍ଧି ଆଶା ରଖିଥିଲା ତ ଆଉ କିଏ ହାତ ଉଦ୍ଧାରି ଆଣି ନିଜ ବ୍ୟବସାୟରେ ଟଙ୍କା ବିନିଯୋଗ କରିଥିବାରୁ ଏବେ କେମିତି ସେ ଋଣ ପରିଶୋଧ କରିବେ ଚିନ୍ତାରେ ପଡ଼ିଛନ୍ତି।
ଏହାରି ଭିତରେ ଗୁରୁବାର ଯାଜପୁର ସାଂସଦ ଡ. ରବୀନ୍ଦ୍ର ନାରାୟଣ ବେହେରା, ଜିଲ୍ଲାପାଳ ଅମ୍ବର କୁମାର କର, ବିଡିଓ ଆକାଶ ପଟ୍ଟନାୟକ, ଅତିରିକ୍ତ ତହସିଲଦାର ରଶ୍ମିରଞ୍ଜନ ମଲ୍ଲିକ, ବ୍ଲକ୍ ଯୋଗାଣ ନିରୀକ୍ଷିକା, ପୂର୍ବତନ ଜିଲ୍ଲା ବିଜେପି ସଭାପତି, ବିଜେପି ନେତ୍ରୀ ବବିତା ମଲ୍ଲିକ, ସଞ୍ଜୟ ନାୟକ, ସଂଗ୍ରାମ ପାତ୍ର, ସବ୍ୟସାଚୀ ଦାସ, ସତ୍ୟଜିତ ସାମଲ, ସୁବାସ ମହାନ୍ତି, ପ୍ରମୋଦ ପଣ୍ଡା, ଦୀପ୍ତିରେଖା ମିଶ୍ରଙ୍କ ପ୍ରମୁଖ କାଣି ନଦୀ ପାର୍ଶ୍ୱ କସପା ପଞ୍ଚାୟତ ଦରଘା ନିକଟ ଘାଇ ଓ ନିକଟସ୍ଥ ପ୍ରଭାବିତ ଅଞ୍ଚଳ ଅନୁଧ୍ୟାନ କରିବା ସହ ଅନେକ ବନ୍ୟା ପ୍ରଭାବିତ ସ୍ଥାନୀୟ ବାସିନ୍ଦାଙ୍କ ସମସ୍ୟା ଶୁଣିଥିଲେ। ଏହି ସମୟରେ ଜଣେ ବନ୍ୟା ବିପନ୍ନ କୋହ ସମ୍ଭାଳି ନପାରି ଜିଲ୍ଲାପାଳଙ୍କୁ କୁଣ୍ଢାଇ କାନ୍ଦି ପକାଇଥିଲେ। କୋହଭରା କଣ୍ଠରେ ଜିଲ୍ଲାପାଳଙ୍କୁ ଗୁହାରି କରିଥିଲେ।
