ନୂଆଦିଲ୍ଲୀ, ୦୨/୧୨: ଆଗକୁ ଆସୁଛି ନୂଆବର୍ଷ । ସମସ୍ତେ ୨୦୨୫ର ଆଗମନକୁ ଚାହିଁ ବସିଛନ୍ତି । ବର୍ଷ ଆରମ୍ଭ ନ ହେଉଣୁ ଚର୍ଚ୍ଚାର ବିଷୟ ହେଲାଣି ଚନ୍ଦ୍ର ଗ୍ରହଣ । କାରଣ ଆସନ୍ତା ବର୍ଷ ଦୁଇଟି ଚନ୍ଦ୍ର ଗ୍ରହଣ ହେବାକୁ ଯାଉଛି । ଯାହା ବିଷୟରେ ଜ୍ୟୋତିର୍ବିଦମାନେ ପୂର୍ବାନୁମାନ କରିଛନ୍ତି । ତେବେ କେଉଁ କେଉଁ ଦିନରେ ଏହି ଚନ୍ଦ୍ର ଗ୍ରହଣ ପଡ଼ିବ, ସେ ବିଷୟରେ ଆସନ୍ତୁ ଜାଣିବା ।

ଜ୍ୟୋତିଷ ଶାସ୍ତ୍ର ଉପରେ ରୁଚି ରଖୁଥିବା ଲୋକମାନଙ୍କ ପାଇଁ ଏହି ବର୍ଷ ବହୁତ ଗୁରୁତ୍ତ୍ୱପୂର୍ଣ୍ଣ । ଆସନ୍ତା ବର୍ଷ ଦୁଇଟି ଚନ୍ଦ୍ର ଗ୍ରହଣ ହେବାକୁ ଯାଉଛି । ଆମେ ସମସ୍ତେ ଜାଣିଛେ ଯେ, ପୃଥିବୀ ସୂର୍ଯ୍ୟ ଚାରିପଟେ ପରିକ୍ରମା କରିଥାଏ । ଚନ୍ଦ୍ର ପୃଥିବୀର ଏକ ଉପଗ୍ରହ ଏବଂ ସେ ପୃଥିବୀ ଚାରିପଟେ ନିଜ ଅକ୍ଷରେ ବୁଲିଥାଏ । ଏହାରି ଭିତରେ ଯେତେବେଳେ ସୂର୍ଯ୍ୟ ଏବଂ ଚନ୍ଦ୍ରମା ମଧ୍ୟରେ ପୃଥିବୀ ଆସିଯାଏ, ସେତେବେଳେ ସୂର୍ଯ୍ୟାଲୋକ ଚନ୍ଦ୍ର ଉପରେ ପଡି ପାରି ନଥାଏ । ଯାହା ଫଳରେ ପୃଥିବୀର ପ୍ରତିବିମ୍ୱ ଚନ୍ଦ୍ର ଉପରେ ପଡ଼ିଥାଏ । ଏହି ଘଟଣାକୁ ଚନ୍ଦ୍ର ଗ୍ରହଣ କୁହାଯାଇଥାଏ । ଏହା କେବଳ ପୂର୍ଣ୍ଣିମା ଦିନ ହିଁ ହୋଇଥାଏ । 

୨୦୨୫ର ପ୍ରଥମ ଚନ୍ଦ୍ର ଗ୍ରହଣ ମାର୍ଚ୍ଚ ମାସର ୧୪ ତାରିଖରେ ହେବ । ଏହି ଦିନ ଚନ୍ଦ୍ର ଗ୍ରହଣ ସକାଳ ୧୦ଟା ୪୧ ରୁ ଆରମ୍ଭ ହୋଇ ଦ୍ୱିପ୍ରହର ୨ଟା ୧୮ରେ ଶେଷ ହେବ । ଆସନ୍ତାବର୍ଷର ଦ୍ୱିତୀୟ ଚନ୍ଦ୍ର ଗ୍ରହଣ ସେପ୍ଟେମ୍ୱର ୭ ତାରିଖରେ ହେବାକୁ ଯାଉଛି । ଏହି ଗ୍ରହଣ ରାତି ୯ଟା ୫୭ ରୁ ଆରମ୍ଭ ହୋଇ ମଧ୍ୟ ରାତ୍ରି ୧ଟା ୨୬ ପର୍ଯ୍ୟନ୍ତ ରହିବ । ତେବେ ଆସନ୍ତା ବର୍ଷର ଏହି ଦୁଇଟି ଗ୍ରହଣ ପୂର୍ଣ୍ଣ ଚନ୍ଦ୍ର ଗ୍ରହଣ ହେବ ବୋଲି ଜ୍ୟୋତିର୍ବିଦ ମାନେ ଆକଳନ କରିଛନ୍ତି । 

ମାର୍ଚ୍ଚ ମାସରେ ହେବାକୁ ଥିବା ଚନ୍ଦ୍ର ଗ୍ରହଣ ଭାରତର ଦେଖିବାକୁ ମିଳିବ ନାହିଁ । ଏହା କେବଳ ଆମେରିକା, କାନାଡ଼ା ଏବଂ ଦକ୍ଷିଣ ଆମେରିକୀୟ ମହାଦ୍ୱୀପରେ ଦୃଶ୍ୟମାନ ହେବ । ଏହା ସହ ଉତ୍ତର ଆଫ୍ରିକାର ପଶ୍ଚିମ ତଟରେ ସକାଳ ସମୟରେ ଏହି ଗ୍ରହଣ ଦେଖା ଦେଇପାରେ । ତେବେ ସେପ୍ଟେମ୍ୱର ମାସରେ ହେବାକୁ ଥିବା ଗ୍ରହଣକୁ ଭାରତବାସୀ ଦେଖି ପାରିବେ । ଏହା ସହ ଏସିଆ, ଅଷ୍ଟ୍ରେଲିଆ, ନ୍ୟଜିଲାଣ୍ଡ ଏବଂ ଆମେରିକାର ଅନେକ ସ୍ଥାନରେ ମଧ୍ୟ ଏହି ଚନ୍ଦ୍ର ଗ୍ରହଣ ଦେଖିବାକୁ ମିଳିବ ।